މަގުމަތިވި ތިން މައިން ޖެންޑަރގެ ބެލުމުގެ ދަށަށް
އާއިލާއަށް ބޭނުންވާ ޚަރަދު ހަމަޖައްސާނެ ކަމަށް މަމްސް ޖަމިއްޔާއިން ބުނޭ
ސަމީރާ ގެންގުޅުނު ހުރިހާ އެއްޗެއް ބޭރަށް އުކާލާފައި
މިދިޔަ ހަފުތާގައި ކުރީގެ ފިރިމީހާ ގެއިން ނެރެލުމުން ހާލުގައި ޖެހުނު ތިން މައިން ޖެންޑަރ މިނިސްޓްރީގެ ބެލުމުގެ ދަށަށް ގެންގޮސްފިއެވެ.
މިކަން ހާމަކޮށްފައިވަނީ އެ ތިން މައިންނަށް އެހީވުމަށް އާއްމުންގެ އެހީތެރިކަމަށް ހުޅުވާލި "މަމްސް" ޖަމިއްޔާއިންނެވެ. އެ ޖަމިއްޔާއިން ހުކުރު ދުވަހުގެ ރޭ ނެރުނު ބަޔާނެއްގައި ބުނީ މިދިޔަ ހަފުތާގެ އާދީއްތަ ދުވަހު ދަންވަރު ގަޑިއެއްގައި ދެ ކުދިން ގޮވައިގެން ވަރަށް ދަތި ހާލުގައި އުޅޭ އެކަނިވެރިމަޔަކަށް އެހީއަށް އެދި ހިއްސާ ކުރި އާއިލާއަށް އެ ޖަމިއްޔާއިން އެހީތެރިކަން ފޯރުކޮށްދެމުން ދަނިކޮށް ކުއްލިއަކަށް ޖެންޑަރ މިނިސްޓްރީގެ ބެލުމުގެ ދަށަށް ގެންގޮސްފައިވާ ކަމަށެވެ.
އެ ޖަމިއްޔާއިން މީގެ ކުރިން ބުނެފައިވާ ގޮތުގައި އެ އަންހެންމީހާ ދެ ދަރިން ގޮވައިގެން ދިރިއުޅެމުން އައީ އޭނާގެ ކުރީޣެ ފިރިމީހާގެ ގޭގެ ކޮޓަރިއެއްގަ އެވެ. އޭރުވެސް އެ ފިރިހެން މީހާގެ ފަރާތުން އަނިޔާތަކާއި ދަތިތައް ދިމާވާ ކަމަށާއި ކުއްލިއަކަށް ދެ ދަރިންނާއެކު ގެއިން ބޭރުކޮށްލީ ކަމަށެވެ. އަދި ގެންގުޅުނު ހުރިހާ ސާމާނެއް ވެސް ބޭރަށް އެއްލާލި ކަމަށް ވަނީ ބުނެފައެވެ. ގެއިން ބޭރުކުރުމުން އަންހެން މީހާ އުޅެމުން އައީ ރޮށިފިހެގެން ލިބޭ ފައިސާ ދައްކައިގެން ދުވަހު ކުއްޔަށްދޭ ކޮޓަރިއެއްގައެވެ. އެހެންވެ، ދަރިންނަށް ބޭނުންވާ ތަކެތި ހޯދައިނުދެވޭތީ އާއި އެ ތިން މައިން އުޅޭނެ ތަނެއް ހޯދައިދިނުމަށް މަމްސް ޖަމިއްޔާއިން އެހީއަށް ހުޅުވާލިއެވެ.
އާއްމުންގެ އެހީއަށް ހުޅުވާލިތާ ކުޑަވަގުތުކޮޅެއްގެ ތެރޭގައި ބޭނުންވާ ވަރަށް ފައިސާ ލިބިފައިވާ ކަމަށް އެ ޖަމިއްޔާއިން ބުނެފައިވެއެވެ. އެގޮތުން، 164،730 ރުފިޔާ ލިބިފައވާ ކަމަށާއި އެ ފައިސާއިން އެ އާއިލާއަށް ބޭނުންވާ ހަރަދުތައްކޮށް، ދިރިއުޅޭނެ ތަނެއް ހޯދައި އާއިލާ ބަދަލު ކުރުމުގެ މަސައްތަ ކުރަމުން އައި ކަމަށް ވެސް މަމްސް ޖަމިއްޔާއިން ބުނެއެވެ.
އެ ޖަމިއްޔާއިން ބުނީ ޖެންޑަރ އިން އާއިލާއާ ހަވާލުވި ނަމަވެސް އެ އާއިލާގެ ޚަރަދުތައް އެ ޖަމިއްޔާއިން ބަލަހައްޓާނެ ކަމަށެވެ. އަދި ޖެންޑަރގެ ޕްރޮގްރާމް ނިންމައި އާއިލާ އަނބުރާ މުޖުތަމައަށް ނުކުތުމުން ދިރިއުޅޭނެ ތަނެއް ހަމަޖައްސައި، ސްކޫލް ޚަރަދާއި ކާބޯތަކެއްޗާއި ކައުންސިލިން އަދި އިތުރު އާމްދަނީއެއް ލިބޭނެ މަގުފަހިކޮށްދެވޭނެ ކަމަށް ވެސް މަމްސް ޖަމިއްޔާއިން ބުންޏެވެ.
މަމްސް ޖަމިއްޔާއިން ބުނެފައިވާ ގޮތުގައި އެ އާއިލާގެ ޚަރަދުތައް ބަލަހައްޓާނީ އެ ޖަމިއްޔާއިން ހުޅުވާލި ފުރުސަތުގައި ލިބުނު ފަންޑުންނެވެ.
