ކުނި އަލުން ބޭނުންކުރެވޭނެ އީޖާދުތައް ތައާރަފްކުރުމަށް މާލީ އެހީތެރިކަން ފޯރުކޮށްދެނީ
14 އެޕްރީލު 2023 | ހުކުރު 05:48އަންހެނުން އިސްވެ ހިންގާ ޖަމްއިއްޔާތަކަށް އިސްކަންދެވޭނެ
ތިލަފުށީގައި ކުނި އަންދަނީ
ކުނި އަލުން ބޭނުންކުރެވޭނެ އީޖާދުތައް ތައާރަފްކުރުމުގެ މަސައްކަތް ކުރުމަށް މާލީ އެހީތެރިކަން ހޯދުމުގެ ފުރުސަތު މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީން ހުޅުވާލައިފިއެވެ.
މިނިސްޓްރީ އޮފް އެންވަޔަރަންމަންޓް، ކްލައިމެޓް ޗޭންޖް އެންޑް ޓެކްނޯލޮޖީން ބުނީ ''އެލިމިނޭޓިންގް ޕަރސިސްޓަންޓް އޯގަނިކް ޕޮލިއުޓަންޓްސް ތްރޫ ސައުންޑް މެނޭޖްމަންޓް އޮފް ކެމިކަލްސް" މަޝްރޫއުގެ ދަށުން އުކާލާ ނުވަތަ އަންދާ ކުނި މަދުކޮށް އަލުން ބޭނުންކުރެވޭ ފަދަ ކުނި އަލުން ބޭނުންކުރެވޭނެ އީޖާދުތައް ތައާރަފްކުރުމަށް، އަދި ރާއްޖޭގައި ބޭނުންކުރެވޭ ނުރައްކާތެރި ކެމިކަލް އަދި ކެމިކަލް އެކުލެވޭ ތަކެތީގެ އަލްޓަނޭޓިވްސް ތައާރަފްކުރުމަށް ހަމަޖެހިފައިވާ ގްރާންޓް ސްކީމަށް ޕްރޮޕޯސަލް ހުށަހެޅުމުގެ ފުރުސަތު ހުޅުވާލާފައިވާ ކަމަށެވެ.
މި ގްރާންޓް ސްކީމްގެ ދަށުން މަޝްރޫއުތައް ހިންގުމަށް މާލީ އެހީތެރިކަށް ހޯދުމުގެ ފުރުސަތު ކައުންސިލްތަކަށާއި، މަދަނީ ޖަމްއިއްޔާތައް (ޚާއްސަކޮށް ގައުމީ އަދި ރަށު ފެންވަރުގައި ހިލޭސާބަހަށް މަސައްކަތްކުރާ އެންޖީއޯ) ތަކަށާއި، ކޮމިއުނިޓީ ބޭސްޑް އޯގަނައިޒޭޝަންސް (ސީ.ބީ.އޯ)، މަދަރުސާ އަދި ކޮލެޖު ޔުނިވާސިޓީތަކަށް ވެސް ހުޅުވާލާފައިވާ ކަމަށެވެ. އަދި އަންހެނުން އިސްވެ ހިންގާ ޖަމްއިއްޔާތަކަށް އިސްކަންދެވޭނެ ކަމަށް މިނިސްޓްރީން ބުނެއެވެ.
މިނިސްޓްރީން ބުނީ މާލީ އެހީއަށް އެދި ހުށަހަޅަން ޖެހޭ ކޮންސެޕްޓް ޕްލޭން ހުށަހެޅުމުގެ އެންމެ ފަހު ތާރީޚަކީ 14 މެއި 2023 ވާ އާދީއްތަ ދުވަހުގެ 14:00އެވެ. ކޮންސެޕްޓް ޕްލޭން ހުށަހަޅާނީ އީމެއިލް ޒަރިއްޔާއިން ކަމަށެވެ. އަދި މައުލޫމާތެއް ސާފުކުރަން ބޭނުންވާނަމަ 7 މެއި 2023 ވާ އާދީއްތަ ދުވަހުގެ ކުރިން aishath.alhan@environment.gov.mv އަށް އީމެއިލް ޒަރިއްޔާއިން ނުވަތަ ފޯން ނަންބަރ 3018410 އަށް ގުޅައިގެން ސުވާލު ހުށަހެޅިދާނެ ކަމަށެވެ.
މައުލޫމާތު ފުރިހަމަނޫން އެޕްލިކޭޝަންތައް ބަލައި ނުގަތުމުގެ ފުރިހަމަ އިޚްތިޔާރު މިނިސްޓްރީއަށް ލިބިގެންވާ ކަމަށެވެ.
