ލައިސަން ޤަވާއިދުގައި ވަރަށް ތަފްސީލްކޮށް ކުށް ބަޔާންކޮށްފައިވާނެކަމަށް ޓްރާންސްޕޯޓް މިނިސްޓްރީގެ ޑިރެކްޓަރު ހުސެއިން ނަޒީރު ވިދާޅުވެއްޖެއެވެ.
އޭނާ އެފަދައިން ވިދާޅުވީ ރާާއްޖެ ޓީވީގެ ފަލަސުރުހީ ޕްރޮގްރާމްގައި ރާއްޖޭގެ ލޯކަލް ނުވަތަ އެތެރޭގައި ކަނޑު އުޅަނދުފަހަރު ދުއްވުމުގެ ލައިސަންސް އާ ބެހޭ އާ ގަވާއިދާ ގުޅޭގޮތުން ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަފުޅު ދައްކަވަމުންނެވެ. އޭނާ ވިދާޅުވި އުޅަނދުތައް ފަޅުން ވަންނަ އިރު ބާރު ސްޕީޑުގައި ދުއްވާފައި ދިއުމާއި، އުޅަނދުތައް ކައިރިކޮށްގެން މާ ބާރަށް ދުއްވާފައި ދިއުން ފަދަ ކަންކަން މިހާރު ހިނގާ ކަމަށާއި، އެފަދަ ކަންކަމަކީ ކުށްތައް ކަމަށް އެ ޤަވާއިދުގައި ބަޔާންކޮށްފައިވާ ކަމަށް އޭނާ ވަނީ ވިދާޅުވެފައެވެ.
އެފަދަ ކަންކަމަށް ދޭންވާ ސަމާލުކަން ނުދިނުމުގެ ސަބަބުން ހިތާމަވެރި ހާދިސާތައް ހިނގާފައިވާ ކަމަށް ނަޒީރު ވަނީ ވިދާޅުވެފައެވެ. އެގޮތުން މި އަހަރުވެސް ބާރު ސްޕީޑުގައި އުޅަނދެއް ފަޅުތެރެއަށް ވަނުމުގެ ސަބަބުން ހިނގި ހާދިސާއެއްގައި ބައެއްގެ ފުރާނައަށް ނުރައްކާވެފައިވާ ކަމަށް އޭނާ ވިދާޅުވިއވެެ. އަދި އެނަމާ ބޯޓު ބަންޑުން ޖަހާލި ހާދިސާ އަކީ ވެސް ގިނަ މީހުން އަރުވައިގެން ދަތުރުކުރަނިކޮށް އެ ސަރަހައްދުން އެހެން އުޅަނދެއް ބާރު ސްޕީޑުގައި ދުއްވާފައި ދިއުމުން އުފެދުނު ބާނީތަކުގެ ސަބަބުން ހިނގި ހާދިސާ އެއް ކަމަށް ވިދާޅުވިއެވެ. އެހެންކަމުން އާ ގަވާއިދާއި އެކު އެފަދަ ހާދިސާތައް މަދުކުރުމަށް، ކުށް ބަޔާންކޮށް ފިޔަވަޅު އެޅޭނެ މަގު ފަހިކޮށްދީފައިވާނެ ކަމަށް އޭނާ ވިދާޅުވިއެވެ.
ނަޒީރު ވިދާޅުވީ އާ ގަވާއިދާއި އެކު ކަނޑުމަތީގައި އުޅަނދު ދުއްވަމުން ދަނިކޮށް ކުރާ ކުށަކާއި ގުޅިގެން ލައިސެންސް ވަގުތީގޮތުން ހިފެހެއްޓުމުގެ ފުރުސަތުވެސް އާ ޤަވާއިދުގެ ދަށުން ފަހިކޮށްދީފައިވާ ކަމަށެވެ. އެގޮތަށް އަމަލުކުރާ އިރު އުޅަނދު ދުއްވަން އިން މިހާ އަށް އެ ދާންވާ ތަނަކަށް ދިއުމަށް ވަގުތީ ހުއްދައެއް ދޭނެ ކަމަށް ވެސް ވިދާޅުވިއެވެ.
