ފިރިހެން ޑިވިޝަންގެ ޗެމްޕިއަންކަން ނައިޓް ކިންގްސް އަށް، އަންހެން ޑިވިޝަން ޔުނިޓީ އަށް

ފީއަލީ ޞިއްޙީ މަރުކަޒުން އިންތިޒާމުކޮށްގެން ކުރިއަށްގެންދިޔަ ހެލްތު ޕްރޮމޯޝަން ވޮލީ ބޯޅަ މުބާރާތުގެ ފިރިހެން ޑިވިޝަންގެ ޗެމްޕިއަންކަން ނައިޓް ކިންގްސް އިން ހޯދިއިރު، އަންހެން ޑިވިޝަންގެ ޗެމްޕިއަންކަން ޔުނިޓީން ހޯދަައިފި އެވެ.

ފިރިހެން ޑިވިޝަންގެ ޗެމްޕިއަންކަން ނައިޓް ކިންގްސް އިން ހޯދީ ފައިނަލްގައި ވާންވާނޭގެ މައްޗަށް ކުރި ހޯދައިގެންނެވެ. ނައިޓް ކިންގްސް އިން މެޗު ކާމިޔާބު ކުރީ ސީދާ ތިން ސެޓުންނެވެ. ފިރިހެން ޑިވިޝަންގެ އެންމެ މޮޅު ހަ ކުޅުންތެރިންނަށް ހޮވުނީ، ޗެމްޕިއަން ނައިޓް ކިންގްސްގެ އާނިމް އަޙުމަދު، އާޒިމް އަޙުމަދު، އަޒީމް އަޙުމަދު، ރަނަރަޕް ވާންވާނޭގެ ޒިޔާން ޙުސެއިން، ޑީޓެން އެކްސްޕްރެސްގެ ޔޫޝައު ޙަސަން އަދި އަޙުމަދު ޝަރީފް އެވެ. މި ޑިވިޝަންގެ އެންމެ މޮޅު ލިބަރޯއަކަށް ހޮވުނީ ނައިޓް ކިންގްސްގެ އައްސަދު އަޙުމަދު އެވެ. 21 އަހަރުން ދަށުގެ އެންމެ މޮޅު ކުޅުންތެރިޔަކަށް އަލް ހަދީދުގެ އަޒާން ފަތުހުﷲ ހޮވުނުއިރު، އެންމެ މޮޅު ކޯޗަކަށް ހޮވުނީ ޗެމްޕިއަން ނައިޓް ކިންގްސްގެ އަޙުމަދު ޝިފާއު އެވެ. މުޅި މުބާރާތުގެ އެންމެ މޮޅު ކުޅުންތެރިޔަކީ އެ ޓީމުގެ އާނިމް އެވެ.

އަންހެން ޑިވިޝަންގެ ޗެމްޕިއަންކަން ޔުނިޓީން ހޯދީ ފައިނަލްގައި އެންމެ ފަހުގެ ޗެމްޕިއަން ކަމަނަ ބަލިކޮށްގެންނެވެ. މި ޑިވިޝަންގެ އެންމެ މޮޅު ހަ ކުޅުންތެރިންނަކީ ޗެމްޕިއަން ޔުނިޓީގެ، އައިޝަތު ވަރުދާ، ރަނިއްޔާ، ރިފްދާ އިބްރަހީމް، ކަމަނަގެ އައިޝަތު ރީމާ، އިންޝާ އަލީ އަދި ޓީމު ބިންގެ މިޒްނާ އިބްރާހީމް އެވެ. މި ޑިވިޝަންގެ 21 އަހަރުން ދަށުގެ އެންމެ މޮޅު ކުޅުންތެެރިޔަކަށް ޓީމު ބިންގެ އިބާ ޢަބްދުﷲ ހޮވުނުއިރު، އެންމެ މޮޅު ކޯޗަކީ ޗެމްޕިއަން ޔުނިޓީގެ އަލީ ޝާތިރު އެވެ. މުޅި މުބާރާތުގެ އެންމެ މޮޅު ކުޅުންތެރިޔަކީ ކަމަނަގެ ރީމާ އެވެ.

މުބާރާތުގެ އިނާމު ފައިސާގެ ގޮތުގައި ކޮންމެ ޑިވިޝަނެއްގެ ޗެމްޕިއަން ޓީމަށް ވަނީ 5000 ރުފިޔާ ދީފަ އެވެ. ދެ ވަނަ ޓީމަކަށް ވަނީ 2500 ރުފިޔާ ދީފަ އެވެ. މިއީ ފީއަލީ ޞިއްހީ މަރުކަޒުން އިސް ނަގައިގެން ކޮންމެ އަހަރެއްގެ ރަމަޟާން މަހުގައި ބާއްވަމުން އަންނަ މުބާރާތެކެވެ.