މާޒިޔާ އަށް ފައިސާ ދީފައި އެހެން ކުލަބުތައް "ބާކީ" ވެފައި

ޔޫތު މިނިސްޓްރީން މިއަހަރުގެ ތެރޭގައި މާޒިޔާ ސްޕޯޓްސް އެންޑް ރެކްރިއޭޝަނަށް މިލިއަނެއްހާ ރުފިޔާ ދީފައިވަނީ އެހެން ކުލަބުތަކަށް ވެސް ދެމުން އަންނަ އުސޫލުން، އޭއެފްސީ ކަޕްގައި ވާދަ ކުރާތީ ކަމަށް ޔޫތު މިނިސްޓަރު އަޙުމަދު މަޚްލޫފް ވިދާޅުވެއްޖެ އެވެ.

ހާމަވެފައިވާ މައުލޫމާތުތަކުން ފެންނަ ގޮތުގައި ޔޫތު މިނިސްޓްރީން ވަނީ އަހަރުގެ މިހާތަނަށް ތިން ފަހަރެއްގެ މަތިން މާޒިޔާ އަސް ފައިސާގެ އެހީތެރިކަން ފޯރުކޮށްދީފަ އެެވެ. އެގޮތުން ޖަނަވަރީ މަހުގެ 10 ވަނަ ދުވަހު ވަނީ އެ ކުލަބަށް 368،299.60 (ތިން ލައްކަ ފަސްދޮޅަށް އަށް ހާސް ނުވަދިހަ ނުވަ ރުފިޔާ، ފަސް ދޮޅަށް ލާރި) ދީފަ އެވެ. އެއީ އޭއެފްސީ ކަޕް 2022 ގެ ގްރޫޕް ސްޓޭޖުގެ މެޗުތަކުގައި ބައިވެރިވުމަށް އިންޑިއާ އަށް ކުރި ދަތުރުގެ ޓިކެޓު ފައިސާ އެވެ. އޭގެ ފަހުން ފެބްރުވަރީ އެއް ވަނަ ދުވަހު ވަނީ 1،000،000 (އެއް މިލިއަން ރުފިޔާ) ދީފަ އެވެ. އެއީ މިއަހަރުގެ ފުޓުބޯޅަ ސީޒަނަށް ތައްޔާރުވުމުގެ ގޮތުން ދީފައިވާ ފައިސާ އެވެ. އޭގެ ހަ ދުވަސް ފަހުން ފެބްރުވަރީ ހަތް ވަނަ ދުވަހު ވަނީ 247،500.00 (ދެ ލައްކަ ސާޅީސް ހަތް ހާސް ފައްސަތޭކަ ރުފިޔާ) ދީފަ އެވެ. އެއީ ފުޓުބޯޅަ ސީޒަނަށް ތައްޔާރުވުމުގެ ގޮތުން ދީފައިވާ ފައިސާ އެވެ. މި ފައިސާތަކުގެ ޖުމުލަ އަކީ 1،615،799.60 (އެއް މިލިއަން ހަ ލައްކަ ފަނަރަ ހާސް ހަތް ސަތޭކަ ނުވަދިހަ ނުވަ ރުފިޔާ، ފަސް ދޮޅަށް ލާރި) އެވެ.

އެކަމާ ގުޅިގެން ޔޫތު މިނިސްޓަރު މަޚްލޫފް ރާއްޖެ އެމްވީ އަށް ވިދާޅުވީ، އެއީ ސަރުކާރުން ޓީމުތަކަށް ދެމުން އަންނަ އެހީތެރިކަމެއް ކަމަށެވެ. އަދި ބިދޭސީ ކުޅުންތެރިންގެ މުސާރަ ބޮޑު ކަމަށާއި، އިންޑިއާ ކަހަލަ ޤައުމުތަކާ ވާދަކުރަންދާއިރު އެކަމުގައި ސަރުކާރުގެ ސަޕޯޓެއް ވެސް އޮންނަން ވާނެ ކަމަށެވެ. މީގެ އިތުރުން މިނިސްޓަރު ވިދާޅުވީ އެ ވާހަކަ ވާނީ އެކި ފަހަރު މަތިން ރައްޔިތުންގެ މަޖިލީހުގައި ވެސް އަަދި އެކިއެކި ކުޅިވަރު ޕްރޮގްރާމްތަކުގައި ވެސް ދައްކާފައިވާނެ ކަމަށެވެ. އަދި އެއީ މާޒިޔާ އަށް އެކަނި ކޮށްދެމުން އަންނަ ކަމެއް ނޫން ކަމަށެވެ. އެގޮތުން މީގެ ކުރިން 2020 ވަނަ އަހަރު ޓީސީ ސްޕޯޓްސް ކުލަބުން އޭއެފްސީ ކަޕްގައި ވާދަކުރިއިރު ވެސް ސަރުކާރުން އެހީތެރިކަން ފޯރުކޮށްދީފައިވާނެ ކަމަށް މިނިސްޓަރު ވިދާޅުވިއެވެ. އެފަހަރު ޓީސީ އަށް ގާތްގަނޑަކަށް 1.49 މިލިއަނެއްހާ ރުފިޔާ ދީފާއިވާނެ ކަމަށް ވެސް ވިދާޅުވި އެވެ.

މީގެ ކުރިން މިދިޔަ އަހަރު ކުލަބް ވެލެންސިއާ އިން ވަނީ އޭއެފްސީ ކަޕްގެ ދެ ވަނަ ބުރުގައި ވާދަކުރަށް އޮތް މެޗަށް ނުދާން ނިންމައިފަ އެވެ. ވެލެންސިއާ އިން ކޮލިފައިން އަށް ނުދާން އޭރު ނިންމާފައި ވަނީ ވެސް ސަރުކާރުން ނުވަތަ ޔޫތު މިނިސްޓްރީން ފައިސާގެ ކަންކަން ހަމަނުޖެހުމުގެ ސަބަބުންނެވެ. އެކަމާ ގުޅިގެން މިނިސްޓަރު މަޚްލޫފް އޭރު ވިދާޅުވީ، ކުލަބުތަކުގެ އިދާރީ ކަންކަން ހަމަޖެއްސުމަކީ އެކުލަބެއްގެ ކަމެއް ކަމަށެވެ. ހަމައެއާއެކު އޭރު ވެލެންސިއާ އަށް ވެސް ފައިސާގެ އެހީތެރިކަން ފޯރުކޮށްދިނުމަށް ނިންމާފައިވާ ކަމަށާއި، ފައިސާ ދިނުމުގައި މައްސަލަ ދިމާވީ ވެލެންސިއާގެ އަމިއްލަ އެކައުންޓެއް ނެތުމުން ކަމަށެވެ. އެކަމުގައި ޔޫތު މިނިސްޓްރީ އާއި ވެލެންސިއާއާ ދެމެދު ވަނީ ދެބަސްވުންތަކެއް ވެސް ހިނގައިފަ އެވެ.

ސަރުކާރުން މާޒިޔާ އަށް މިލިއަނަކަށް ވުރެ ގިނަ ފައިސާ ދީފައިވާއިރު، އެ ވާހަކަ ވަނީ ސޯޝަލް މީޑިއާގައި ވެސް ފެތުރިފަ އެވެ. މީގެ އިތުރުން އެ މައްސަލަ އެންޓި ކަރަޕްޝަން ކޮމިޝަން (އޭސީސީ) އަށް ވެސް ހުށަހެޅުމަށް ވަނީ ގޮވާލައިފަ އެވެ.