އުތުރު ކޮރެއާގެ މިސައިލް ޓެސްޓާ ގުޅިގެން އަސްކަރީ ބާރު ބޭނުން ކުރަން ޖެހިއްޖެ ނަމަ އެކަން ކުރާނެ: އެމެރިކާ
6 ޖުލައި 2017 | ބުރާސްފަތި 05:30ޖަޕާނު ކަނޑަށް މިސައިލް ވެއްޓުމާ ގުޅިގެން ޖަޕާނުން ވަނީ ވަރަށް ހިތްހަމަ ނުޖެހިފައި
ނިކީ ހޭލީ
އުތުރު ކޮރެއާ އިން އަންގާރަ ދުވަހު ކުރި ދުރު ރާސްތާ މިސައިލް ޓެސްޓާ ގުޅިގެން އުތުރު ކޮރެއާއާ ދެކޮޅަށް "އަސްކަރީ ބާރު ބޭނުން ކުރަން ޖެހިއްޖެ ނަމަ އެކަން ކުރާނެ" ކަމަށް އެމެރިކާ އިން ބުދަ ދުވަހު ބުނެފިއެވެ.
އެމެރިކާ އިން އދ. އަށް ކަނޑައަޅުއްވާފައިވާ އެމްބެސެޑަރު ނިކީ ހޭލީ ވިދާޅުވީ އުތުރު ކޮރެއާއާ ދެކޮޅަށް އާ ގަރާރެއް ވެސް އދ. އަށް ހުށަހަޅާނެ ކަމަށެވެ. ނިކީ ހޭލީ އިތުރަށް ވިދާޅުވީ އުތުރު ކޮރެއާ އިން އަންގާރަ ދުވަހު ކުރި މިސައިލް ޓެސްޓަކީ އަސްކާރީ ގޮތުން ކަންކަން ހަލަބޮލި ކުރަން އުޅުނު ކަމެއްގެ ގޮތުގައި ސިފަ ކުރައްވާ ކަމަށާއި އަދި އުތުރު ކޮރެއާއާ ދެކޮޅަށް އިގްތިސާދީ ގޮތުން ފިއްތުންތައް ކުރިމަތި ކުރަން ވެސް އިންޒާރު ދޭ ކަމަށެވެ.
އުތުރު ކޮރެއާއާ ބެހޭ ގޮތުން ނިކީ ހޭލީ ވާހަކަ ދެއްކެވިތާ މާ ގިނައިރުތަކެއް ނުވެ އެމެރިކާ އާއި ދެކުނު ކޮރެއާ އިން ވަނީ އަސްކަރީ ތަމްރީނުތަކެއްގައި މިސައިލްތަކެއް ޖަޕާނު ކަނޑަށް ފޮނުވާލާފައެވެ.
އުތުރު ކޮރެއާ އިން ބުނަމުން ގެންދަނީ އެމެރިކާގެ "ރުޅިވެރިކަމުގެ އަމަލުތައް" ހުއްޓާ ނުލަނީސް މަޝްވަރާއަކަށް ނުދާނެ ކަމަށެވެ.
އަންގާރަ ދުވަހު އުތުު ކޮރެއާ އިން ޓެސްޓް ކުރި ބެލިސްޓިކް މިސައިލް ފޮނުވާލީ ޕެންހިއޮން ވައިގެ ސަރަހައްދުންނެވެ. އެމެރިކާ ޕެސިފިކް ކޮމާންޑުން ބުނީ އުތުރު ކޮރެއާ އިން އުދުއްސާލި މިސައިލް 37 މިނިޓަށް އުދުހުމަށް ފަހު ވެއްޓިފައި ވަނީ ޖަޕާނު ކަނޑަށް ކަމަށެވެ.
އުތުރު ކޮރެއާ އިން ފޮނުވާލި މިސައިލް ޖަޕާނު ކަނޑަށް ވެއްޓުމާ ގުޅިގެން ޖަޕާނުން ވަނީ ވަރަށް ހިތްހަމަ ނުޖެހިފައެވެ. އެގޮތުން ޖަޕާނުގެ ބޮޑު ވަޒީރު ޝިންޒޯ އަބޭ ވިދާޅުވީ އުުުތުރު ކޮރެއާ އިން އުުދުއްސާލި މިސައިލުން " ސީދާ އެނގިގެން ދަނީ ބިރުވެރިކަން ބޮޑުވެފައިވާ" ކަން ކަމަށެވެ.
އުތުރު ކޮރެއާ އިން ދަނީ ތަކުރާރުކޮށް މިސައިލް ޓެސްޓްތަކާއި އަދި ނިއުކްލިއާ ހަތިޔާރު ފައްކާ ކުރުމުގެ ޕްރޮގްރާމްތައް ހިންގަމުންނެވެ. އެކަމުގެ ސަބަބުން ދެކޮރެއާ ސަރަހައްދު ވަނީ ހަލަބޮލިވެފައެވެ. އަދި އެމެރިކާ އާއި އުތުރު ކޮރެއާގެ ގުޅުން ވެސް ވަނީ ވަރަށް ގޯސްވެފައެވެ. އުތުރު ކޮރެއާ އިން ކުރާ މިސައިލް ޓެސްޓްތަކާއި އަދި ނިއުކްލިއާ ހަތިޔާރު ފައްކާ ކުރުމުގެ ޕްރޮގްރާމްތަކާ ގުޅިގެން އދ. އިން ދާދިފަހުން ވަނީ އުުތުރު ކޮރެއާ އާ ދެކޮޅަށް އާ ދަތިކުުރުމުގެ ފިޔަވަޅުތަކެއްް ވެސް އަޅާފައެވެ.
