ޗެލްސީން ވަކިކޮށްލުމުން ގްރެހަމް ޕޮޓާ ރާއްޖެ އަށް

ޗެލްސީގެ ކޯޗުކަމުން ވަކިކޮށްލުމުން ކޯޗު ގްރެހަމް ޕޮޓާ ރާއްޖެ އައިސް ރާއްޖޭގައި ޗުއްޓީ ހޭދަކުރަން ފަށައިފި އެވެ.

އިނގިރޭސި ނޫސްތަކުން ބުނާ ގޮތުގައި ހުސްވި ހަފުތާގައި ޗެލްސީގެ ކޯޗުކަމުން ވަކިކުރި ޕޮޓާ ރާއްޖެ އައީ މީގެ ދެ ދުވަސްކުރިންނެވެ. ނަމަވެސް އޭނާ ހުރީ ކޮން ރިސޯޓެއްގައި ކަމެއް ނުބުނެ އެވެ. އެކަމަކު ރާއްޖޭގައި ހުރުމަށް އޭނާ 20000 ޕައުންޑް ހޭދަކުރާނެ ކަމަށްވެ އެވެ. ޗެލްސީގެ ކޯޗުކަމުން ވަކިކުރުމުން ކޮންޓްރެކްޓް ބާކީބަޔަށް އޭނާ އަށް ބަދަލެއްގެ ގޮތުން 13 މިލިއަން ޕައުންޑް ދޭންޖެހުނެވެ.

އިނގިރޭސި ނޫސްތަކުން ބުނާގޮތުގައި ޕޮޓާ ރާއްޖެ އައީ ޑުބާއީ މަގުންނެވެ. އޭނާ ޑުބާއީގައި ޓްރާންސިޓްކުރި ވަގުތު ޗެލްސީ އާއި ލިވަޕޫލް އިނގިރޭސި ޕްރެމިއާ ލީގުގައި ކުޅެ 0-0އިން އެއްވަރުވި މެޗުގެ ސްކޯ ޗެކްކޮށްފައިވާ ކަމަށް ވެސް ނޫސްތަކުން ބުނެ އެވެ.

މިދިޔަ ސެޕްޓެމްބަރު މަހު ޗެލްސީގެ ކޯޗުކަން ހަވާލުކުރި ޕޮޓާ މަގާމުން ވަކިކުރީ ނަތީޖާތައް މާބޮޑަށް ގޯސްވުމުންނެވެ. އޭނާ އަށް ޗެލްސީގެ ބޯޑުން އެތައް ފުރުސަތެއްދިން ނަމަވެސް ނަތީޖާތައް އެއް ފެންވަރެއްގައި ނުހިފެހެއްޓި ޗެލްސީ މިވަގުތު އޮތީ އަންނަ ސީޒަންގައި ޔޫރަޕުގެ މުބާރާތްތަކުން ފުރުސަތު ނުލިބޭ ހިސާބުގަ އެވެ.

އޭނާއަށް ފަހު މި ސީޒަން ނިމެންދެން ޗެލްސީގެ ކޯޗުކަން ދީފައިވަނީ އެކުލަބަށް އެންމެ ގިނަ ގޯލު ޖަހައިދިން ކުޅުންތެރިޔާ އަދި ކުރީގެ ކޯޗު ފްރޭންކް ލަމްޕާޑަށެވެ.