އޭޝިއަން ކަޕް އަންނަ އަހަރުގެ ޖަނަވަރީ އަދި ފެބްރުވަރީގައި

އޭޝިއަން ކަޕް އަންނަ އަހަރުގެ ޖަނަވަރީ އަދި ފެބްރުވަރީ މަހު ޤަތަރުގައި ބާއްވަން ހަމަޖައްސައިފި އެވެ.

އޭޝިއަން ފުޓުބޯޅަ ކޮންފަޑެރޭޝަން (އޭއެފްސީ) އިން ބުދަ ދުވަހު ބުނީ ޤަތަރުގައި މުބާރާތް ބާއްވާނީ ޖަނަވަރީ މަހުގެ 12 އިން ފެބްރުވަރީ މަހުގެ 10 ވަނަ ދުވަހަށް ކަމަށެވެ. މި މުބާރާތް ބޭއްވުމުގެ ފުރުސަތު 2019 ވަނަ އަހަރު ވަނީ ޗައިނާ އަށް ވެސް ދީފަ އެވެ. ނަމަވެސް ކޯވިޑު ބަލިމަޑު ކަމުގެ ސަބަބުން ޗައިނާގައި މުބާރާތް ބޭއްވޭ ގޮތް ވަނީ ނުވެފަ އެވެ. ޤަތަރަށް މުބާރާތް ބޭއްވުމުގެ ފުރުސަތު ލިބުނީ އިންޑޮނޭޝިއާ އަދި ސައުތު ކޮރެއާ އިން ކުރި ބިޑަށްވުރެ، ޤަތަރުގެ ބިޑު ރަނގަޅު ވުމުންނެވެ. މީގެ ކުރިން އެ މުބާރާތް މިއަހަރުގެ މެދު ތެރޭގައި ބާއްވަން ނިންމި ނަމަވެސް، ޤަތަރުގެ ހޫނުގެ ސަބަބުން މުބާރާތްް އަންނަ އަހަރަށް ފަސްކުރީ ޤައުމުތަކުގެ ވެސް އެދުމުގެ މަތީންނެވެ.

މީގެ ކުރިން ދެ އަހަރަކު ވަނީ ޤަތަރުގައި އޭޝިއަން ކަޕް ބާއްވައިފަ އެވެ. އެއީ 1988 ވަނަ އަހަރާއި 2011 ވަނަ އަހަރު އެވެ. މިއީ ޤަތަރުގައި އޭޝިއަން ކަޕް ބާއްވާނެ ތިން ވަނަ ފަހަރެވެ. އެންމެ ފަހުން 2019 ވަނަ އަހަރު ބޭއްވި އޭޝިއަން ކަޕް ވެސް ކާމިޔާބުކޮށްފައި ވަނީ ޤަތަރުންނެވެ. އޭއެފްސީން ބުނީ މުބާރާތް ކުރިއަށް ގެންދާނީ 8 ސްޓޭޑިއަމެއްގައި ކަމަށާއި، އޭގެ ތެރެއިން ހަ ސްޓޭޑިއަމަކީ ފީފާ ވޯލްޑް ކަޕްގެ މެޗުތައް ކުޅުމަށް ވެސް ބޭނުން ކުރި ސްޓޭޑިއަމްތައް ކަމަށެވެ. ޤަތަރުން ވަނީ މިދިޔަ އަހަރުގެ ނޮވެމްބަރުން ޑިސެމްބަރަށް ކުރިއަށް ދިޔަ ފީފާ ވޯލްޑް ކަޕް ވެސް ހޯސްޓުކޮށްފަ އެވެ. ދުނިޔޭގެ ފުޓުބޯޅައިގެ މައި އިދާރާ (ފީފާ) އިން ދެކޭ ގޮތުގައި ޤަތަރުގައި ބޭއްވުނު ވޯލްޑް ކަޕަކީ މިހާތަނަށް ބޭއްވުނު އެންމެ ކާމިޔާބު މުބާރާތެވެ.

އޭޝިއަން ކަޕް ބާއްވާނީ ޖެނުއަރީ 13 އިން ފެބްރުއަރީ 11 އަށް ކުރިއަށްދާ އެފްރިކާ ކަޕް އޮފް ނޭޝަންސް މުބާރާތާ ވެސް ދިމާކޮށެވެ.