ތިން ލަނޑުން ޤަތަރަށް ފަސޭހަ މޮޅެއް

އޭޝިއަން ކަޕް ފުޓްބޯޅަ މުބާރާތް ހުޅުވި މެޗު ލެބަނަންއާ ވާދަކޮށް ފަސޭހަކަމާއެކު 3-0އިން ޤަތަރު ކާމިޔާބުކޮށްފި އެވެ.

އެންމެ ފަހުގެ ވޯލްޑް ކަޕް ފައިނަލް ކުޅުނު ލުސައިލް ސްޓޭޑިއަމުގައި ޤަތަރުގެ ފުރަތަމަ ދެ ގޯލު ޖެހީ ޓީމުގެ އެންމެ އަލިގަދަ ތަރި އަކްރަމް އަފީފެވެ. ފަހު ލަނޑު ޖެހީ އަލްމުއީޒް އަލީ އެވެ. މިއާއެކު އޭޝިއަން ކަޕުގައި ދެ ވަނަ އަށް އެންމެ ގިނަ ގޯލު ޖެހި ދެކުނު ކޮރެޔާގެ ލީ ޑޮންގް ގުކް ޖަހާފައިވާ ގޯލުގެ އަދަދާ އޭނާ ވަނީ ހަމަހަމަކޮށްފަ އެވެ.

މި މެޗުގައި ޤަތަރުން ދަނޑުގައި ތިބި 80000 މީހުންގެ ކުރިމަތީގައި މޮޅަށްކުޅެ ގިނަ ހަމަލާތަކެއް އުފެއްދި އެވެ. މީގެ ބަދަލުގައި ލެބަނަން އަށް އެކަށީގެންވާ ގޮތަކަށް ކުޅެވިފައިނުވެ އެވެ.

މުބާރާތަށް ދޮޅު މަހަށްވެފައި އޮއްވައި ޤަތަރުން ކޯޗު ކާލޮސް ކުއެރޯޒް މަގާމުން ވަކިކޮށް، ޓީމު ހަވާލު ކުރި އައު ކޯޗާއެކު ޓީމަށް ދިރުން ލިބިފައިވާ ކަމަށް މެޗަށް ފަހު ބައެއް ސަޕޯޓަރުން ވަނީ ބުނެފަ އެވެ.

މުބާރާތުގެ ތަށި ދިފާއު ކުރުމަށް ޤަތަރުން މޮޅަކާއެކު ކެމްޕޭން ފެށިއިރު މުބާރާތް ހުޅުވަން ރޭ ވަނީ ކުލަގަދަ ރަސްމިއްޔާތެއް ބާއްވައިފަ އެވެ. މި ރަސްމިއްޔާތުގައި ފީފާގެ ރައީސް ޖިއާނީ އިންފަންޓީނޯ ވެސް ބައިވެރިވި އެވެ.