ގަތަރުގައި މިމަހު ފަށާ އޭޝިއަން ކަޕް ފުޓްބޯޅަ މުބާރާތުގެ ފައިނަލް މެޗުގެ ރަސްމީ ބޯޅަ ވަނީ ދައްކާލައިފަ އެވެ. ކެލްމޭއިން ތައްޔާރުކުރި ބޯޅައިން ބުނެދެނީ ކޮން ވާހަކައެއް ހެއްޔެވެ؟

މި ބޯޅައަށް ކިޔަނީ ވާޓެކްސާ23 ޕްލަސް އެވެ. މި ބޯޅައިގައި ވަނީ މައިގަނޑު ދެ ކުލަ އެވެ. އެއީ ރަން ކުލަ އާއި މެރޫން ކުލަ އެވެ. މުބާރާތުގެ އެހެން މެޗުތަކުގައި ބޭނުންކުރާ ބޯޅައިގެ ނަމަކީ ވާޓެކްސާ 23 އެވެ. މި ބޯޅައިގެ ކުލަތަކަކީ ހުދާއި މެރޫން އަދި މަޑު ރަތްކުލަ އެވެ.

ފައިނަލް މެޗު ކުޅޭ ބޯޅައިގައިވާ ރަންކުލައިން ދޭހަކޮށްދެނީ ގަތަރުގެ ސަހަރާތަކުގައިވާ ރަންކުލައިގެ ވެއްޔެވެ. މެރޫން ކުލައަކީ ގަތަރުގެ ގައުމީ ދިދާގައިވާ ކުލަ އެވެ. މުޅި ބޯޅަ އަށް ފެތުރާފައިވާ މަޑުމަޑު ރަންކުލައަކީ ކުޅިވަރުގެ ވާދަވެރިކަމާއި ކާމިޔާބީގެ ވަގުތުގައި ފެނިގެންދާ އާދަޔާހިލާފު އިހުސާސްތަކާއި ވާދައިގެ ތައްޓާއި ރަންކުލައި ބާރެވެ.

އޭއެފްސީގެ ޖެނެރަލް ސެކްރެޓަރީ ދާކުކް ސެރީ ވިންސާ ޖޯން ބުނީ ކެލްމޭއިން ބޯޅަ ތައްޔާރުކޮށްފައިވަނީ ގަތަރުގެ ކާމިޔާބީ އާއި ވިސްނުމާއި އަމާޒަށް ވާސިލްވާނެ ގޮތަށް ކަމަށެވެ.

ކެލްމޭގެ ޗެއާމަން ވިދާޅުވީ މި ބޯޅައިން އޭއެފްސީ އޭޝިއަންކަޕުގެ ހައިބަތު އިތުރުކޮށްދޭނެ ކަމަށާއި ބޯޅަ ތައްޔާޜުކޮށްފައިވާނީ ތިމާވެއްޓާއި އެންމެ ފަހުގެ ޓެކްނޮލިޖީ ވެސް ހިމަނައިގެން ކަމަށެވެ.