ރ އަތޮޅު ދެކުނު ބިތުގައި އެއާޕޯޓް އަޅާނެ ރަށެއް އަދި ނިންމާފައެއްނުވޭ: މިނިސްޓަރ

ރ އަތޮޅުގެ ދެކުނު ބިތުގައި އެއާޕޯޓް އަޅާނެ ރަށެއް އަދިވެސް ނިންމާފައިނުވާކަމަށް ހައުސިން މިނިސްޓަރ މުހައްމަދު އަސްލަމް ވިދާޅުވެއްޖެއެވެ.

ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި މަޑުއްވަރީ ދާއިރާގެ މެމްބަރ އާދަމް ޝަރީފް ރ އަތޮޅު ދެކުނު ބިތުގައި އަޅާ އެއާޕޯޓްގެ މަސައްކަތް ގޮސްފައިވާ ހިސާބާ ގުޅޭގޮތުން ކުރެއްވި ސުވާލަށް ޖަވާބު ދެއްވަމުން މިނިސްޓަރ ވިދާޅުވީ އެކަމާއި ގުޅޭގޮތުން ދާދިފަހުން ރ އަތޮޅު ކައުންސިލާއެކު މަޝްވަރާކުރެއްވިކަމަށެވެ. މިނިސްޓަރ ވިދާޅުވީ ރ އަތޮޅު ދެކުނު ބިތުގައި އެއާޕޯޓް އެޅުމުގައި ދެ ތަނެއްގެ ވާހަކަ ދެކެވޭކަމަށެވެ.

އޭގެތެރެއިން އެއް ތަނަކީ ބެރިޔަންފަރުކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ ރ އަތޮޅުގައި އަދި އެގޮތް ނޯވެދާނެކަމަށާއި މިހާތަނަށް ބެލިބެލުމުން އެގޮތް ނުފެންނަކަމަށެވެ.

ރ އިފުރުގައި މިހާރުވެސް އެއަރޕޯޓް ހިންގަމުން އަންނައިރު އެއަތޮޅު އަލިފުށީގައި އަންނަނީ އެއާޕޯޓެއް އެޅުމުގެ މަސައްކަތްކުރަމުންނެވެ. އަލިފުށީގައި ގާއިމުކުރާ ވައިގެ ބަނދަރުގެ މަސައްކަތް މިއަހަރު ތެރޭގައި ނިމި ޚިދުމަތް ދޭންފެށޭނެކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވަނީ ވިދާޅުވެފައެވެ. އަދި ރ އަތޮޅު ދެކުނު ބިތުގައި އަޅާ އެއާޕޯޓާއި ގުޅޭ ފުރަތަމަ މަރުޙަލާގެ މަސައްކަތްތައް ވަރަށް ބާރަށް ކުރިޔަށްދާކަމަށް ރައީސް ވިދާޅުވިއެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ރ އަތޮޅަށް ކުރެއްވި ދަތުރުފުޅެއްގައި، އެއަތޮޅުގެ ދެކުނު ބިތުގެ ރަށްރަށުގެ ކައުންސިލްތަކުން ރައީސާ ބައްދަލުކުރައްވައި، ދެކުނު ބިތަށް އެއަރޕޯޓެއް މުހިންމުކަމުގެ ވާހަކަ ވަނީ ހިއްސާކުރައްވާފައެވެ.

އެދަތުރުފުޅުގައި ރައީސް ވަނީ ރ އަތޮޅުގެ ދެކުނު ބިތުގައިވެސް އެއަރޕޯޓެއް އަޅުއްވައިދެއްވާނެކަމަށް ވައުދުވެވަޑައިގެންފައެވެ. އެއީ 2021 ވަނަ އަހަރުގެ ސެޕްޓެމްބަރ މަހުގެ ތެރޭގައެވެ.