އެޑެކްސް އޯޝަން މިޝަންގައި ރާއްޖޭގެ ޑައިވް ހަރަކާތްތައް ޕްރޮމޯޓްކޮށްފި

މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އާއި ރާއްޖޭގެ އިންޑަސްޓްރީ ޕާޓްނަރުން ގުޅިގެން ރާއްޖޭގެ ޑައިވް ހަރަކާތްތަކާއި ކަނޑުއަޑީގެ ރީތިކަން އެޑެކްސް އޯޝަން މިޝަން 2023ގައި ޕްރޮމޯޓްކޮށްފިއެވެ.

މި ހަރަކާތް ކުރިއަށްދިޔައީ 31 މާރިޗް 2023 އިން 2 އޭޕްރީލް 2023 އަށް، ސިންގަޕޫރުގެ ސޭންޑްސް އެކްސްޕޯ އެންޑް ކޮންވެންޝަން ސެންޓަރުގައެވެ.

26 އަހަރުގެ ދިގު މުއްދަތެއްގައި ބާއްވަމުން އަންނަ އެޑެކްސްއަކީ އޭޝިއާގައި ބާއްވާ އެންމެ ބޮޑު އަދި އެންމެ ދިގު މުއްދަތަކަށް ކުރިއަށް ގެންގޮސްފައިވާ ޑައިވް އެކްސްޕޯއެވެ. މި އެކްސްޕޯގައި ދުނިޔޭގެ އެކި ކަންކޮޅުތަކުން ފާހަގަކޮށްލެވޭ މި ދާއިރާގެ މުހިންމު ފަރާތްތަކާއި ސައިންސްވެރިންނާއި ކަނޑުގެ ކޮންޒަވޭޝަނިސްޓުންނާއި ކަނޑު އަޑީގެ ފޮޓޯގްރާފަރުންނާއި ވީޑިއޯގްރާފަރުންނާއި އެހެނިހެން ފަރާތްތައް އެއްތަނަކުން ބައްދަލުވުމަށް މަގުފަހިކޮށްދެއެވެ. އަދި މިއީ ޑައިވް އޮޕަރޭޓަރުންނާއި، އިކުއިޕްމަންޓް އުފައްދާ ފަރާތްތަކާއި، ގައުމީ ޓޫރިޒަމް ބޯޑުތައް ފަދަ އެކިއެކި އެގްޒިބިޓަރުން ބައިވެރިވާ ހަރަކާތެކެވެ.

އެމްއެމްޕީއާރުސީން ވަނީ މި އިވެންޓުގެ ޒަރިއްޔާއިން ޑައިވްކުރުމަށް ޝައުގުވެރިވާ ފަރާތްތަކަށް ރާއްޖޭގެ އެންމެ ފަހުގެ މައުލޫމާތު ފޯރުކޮށްދީ، ރާއްޖެއަކީ ޑައިވް ކުރުމަށް އިސްކަންދޭ މަންޒިލެއްގެ ގޮތުގައި ހޭލުންތެރިކަން އިތުރުކޮށްފައެވެ. މީގެ އިތުރުން، މި އެކްސްޕޯ އަކީ ޑައިވިން ފަދަ ނީޝް ސެގްމަންޓަކަށް އަމާޒުކޮށްގެން މާކެޓް އިންޓެލިޖެންސް އެއްކުރުމަށާއި، އޭޝިއާ އަދި ދެކުނުއިރުމަތީ އޭޝިއާގެ މާކެޓްތަކުން ޑައިވަރުންނާއި ޑައިވްކުރުމަށް ޝައުގުވެރިވާ މީހުންގެ ޝުއޫރުތައް ދެނެގަތުމަށް ވެސް ރަނގަޅު ޕްލެޓްފޯމެއް ކަމަށް އެމްއެމްޕީއާރުސީން ބުނެއެވެ.

އެމްއެމްޕީއާރުސީން މި އިވެންޓުގައި ބައިވެރިވެފައިވަނީ، ރާއްޖެއިން ލިބޭ ޑައިވިން އަދި ކަނޑުއަޑީގެ ތަޖުރިބާތައް ދައްކާލުމަށް އެކުންފުނިން ކުރާ މަސައްކަތުގެ ދަށުން، ދެކެނު އޭޝިއާގެ ފަތުރުވެރިންގެ މެދުގައި، އަދި ވަކިން ޚާއްޞަކޮށް ސިންގަޕޫރުގެ ފަތުރުވެރިންގެ މެދުގައި އެންމެ މަޤްބޫލު މަންޒިލެއްގެ ގޮތުގައި ރާއްޖެ ޕްރޮމޯޓްކުރުމަށެވެ.

މި އެކްސްޕޯގައި އެމްއެމްޕީއާރުސީން ވަނީ ފޮޓޯބޫތަކާއި، ރާއްޖޭގެ ކަނޑުއަޑީގެ ދިރުންތަކާ ބެހޭ މައުލޫމާތު އެކުލެވޭ ފްލެޝް ކާޑުތަކާއި، ރާއްޖޭގެ އެކި ޑައިވް ލޮކޭޝަންތައް ދައްކާ އާޓްވޯކްތައް ދައްކާލާފައެވެ.

މި ހަރަކާތުގައި އެމްއެމްޕީއާރުސީގެ ޗީފް އެގްޒެކެޓިވް އޮފިސަރު އަދި މެނޭޖިން ޑިރެކްޓަރު އަލްފާޟިލް ތޮއްޔިބު މުޙައްމަދު ވާހަކަފުޅު ދެއްކެވިއެވެ. ތޮއްޔިބްގެ ވާހަކައިގައި ދެމެހެއްޓެނިވި ފަތުރުވެރިކަމާއި ޑައިވިން ވެންޗަރތަކަށް އެހީތެރިވުމަށް އެމްއެމްޕީއާރުސީއިން ހިންގާ ހަރަކާތްތަކަށް އަލިއަޅުއްވާލައްވާ، ސަނީ ސައިޑް އޮފް ލައިފްގެ އެންމެ ފަހުގެ އަޕްޑޭޓްތައް ދެއްވިއެވެ. މީގެ އިތުރުން ސައުުތު އީސްޓް އޭޝިއާ މާކެޓްގެ މުހިންމުކަމާއި އެޑެކްސްގެ އޯގަނައިޒަރުންގެ ފަރާތުން ރާއްޖެއަށް ލިބެމުންދާ ސަޕޯޓާ ފާހަގަކުރައްވާ، ޑައިވް ސެގްމަންޓް އިތުރަށް ޕްރޮމޯޓްކޮށް ހަރުދަނާކުރުމަށް އެޑެކްސް އޯގަނައިޒަރުން ކުރައްވަމުން ގެންދަވާ މަސައްކަތްތައް ތޮއްޔިބު ފާހަގަކުރެެއްވިއެވެ.

2022ވަނަ އަހަރު ނިމުނުއިރު ދެކުނުއިރުމަތީ އޭޝިއާ މާކެޓުން ޖުމްލަ 23,080 ފަތުރުވެރިން ރާއްޖެއަށް ޒިޔާރަތްކޮށްފައި ވާއިރު، މި އަހަރުގެ ޖެނުއަރީ މަހުން ފެށިގެން ފެބްރުއަރީ މަހުގެ ނިޔަލަށް، މި މާކެޓުން 5,897 ފަތުރުވެރިންނަށް ރާއްޖެއިން ވަނީ މަރުހަބާ ކިޔާފައެވެ. މި މާކެޓަށް އަމާޒުކޮށްގެން އެމްއެމްޕީއާރުސީން ގެންދަނީ ބޮޑެތި ސްޓޭކްހޯލްޑަރުންނާއެކު ޖޮއިންޓް މާކެޓިން ކެމްޕޭންތަކާއި، އައުޓްޑޯ އިޝްތިހާރު ކެމްޕޭންތައް ހިންގުމުގެ އިތުރުން، ފެއަރތަކުގައި ބައިވެރިވުމާއި، ވެބިނަރތައް ބާއްވައި، އީ-ލާނިން ޕްރޮގްރާމްތަކާއި އެހެނިހެން ހަރަކާތްތައް ބާއްވަމުނެވެ. މީގެ ތެރޭގައި އައިޓީބީ އޭޝިއާ 2023 ގައި ބައިވެރިވުމާއި، ސައުތު އީސްޓް އޭޝިއާގައި ރޯޑްޝޯއެއް ހިންގުމާއި، ރޮބް ރިޕޯޓާއެކު މީޑިއާ ކެމްޕޭނެއް ހިންގުން ހިމެނެއެވެ.