ސާފް ޗެމްޕިއަންޝިޕްގައި ވާދަކުރާނެ ސަރަހައްދުން ބޭރުގެ ދެ ޤައުމަކަށް ސައުދީ އާއި މެލޭޝިޔާ
ސާފް ސަރަހައްދުން ބައިވެރިވާނެ ފަސް ޤައުމަކީ ރާއްޖެ، އިންޑިއާ، ބަންގްލަދޭޝް، ބޫޓާން، ނޭޕާލް އަދި ޕާކިސްތާން
2021 ވަނަ އަހަރު އޮތް މުބާރާތުގައި އިންޑިއާ އާއި ރާއްޖެ ބައްދަލުކުރި މެޗުގެ ތެރެއިން
ސާފް ޗެމްޕިއަންޝިޕްގައި ވާދަ ކުރުމަށް ސައުދީ އަރަބިއްޔާ އާއި މެލޭޝިޔާ އަށް ދައުވަތު ދީފައިވާ ކަމަށް ސައުތު އޭޝިއަން ފުޓުބޯޅަ ފެޑެރޭޝަން (ސާފް) އިން ހާމަކޮށްފި އެވެ.
މިއަހަރުގެ ސާފް ޗެމްޕިއަންޝިޕް ބޭއްވުމަށް ނިންމާފައި ވަނީ މިއަހަރުގެ ޖޫން މަހުގެ 21 އިން ޖުލައި މަހުގެ ތިން ވަނަ ދުވަހަށް އަވައްޓެރި އިންޑިއާގެ ބެންގަލޫރުގަ އެވެ. މިއަހަރުގެ މުބާރާތުގެ ފޯރިގަދަ ކުރުމާއި، މުބާރާތް ވާދަވެރިކުރުމުގެ ގޮތުން ސަރަހައްދުން ބޭރުގެ ދެ ޤައުމަކަށް ދައުވަތު ދިނުމަށް ދާދި ފަހުން ވަނީ ސާފްގެ ހިންގާ ކޮމެޓީގައި ވެސް މަޝްވަރާކޮށްފަ އެވެ. މީޑިއާ އިން ކުރި ސުވާލަކަށް ޖަވާބުދެއްވަމުން ސާފްގެ ރައީސް ކާޒީ ސަލާޙުއްދީން ވިދާޅުވީ މުބާރާތުގައި ބައިވެރިވުމުގެ ދައުވަތު ސައުދީ އާއި މެލޭޝިޔާ އަށް ފޮނުވާފައިވާނެ ކަމަށެވެ. ނަމަވެސް މިހާތަނަށް ދެ ޤައުމުން ކުރެ އެއްވެސް ޤައުމަކުން ދައުވަތު ޤަބޫލުކޮށްފައިވާކަމެއް ނުވަތަ ނޫން ކަމެއް އޭނާ ހާމަކުރައްވާފައެއް ނުވެ އެވެ.
މުބާރާތުގައި ބައިވެރިވުމުގެ ދައުވަތު ސައުދީ އާއި މެލޭޝިޔާ އިން ޤަބޫލުކޮށްފި ނަމަ، މިއަހަރުގެ މުބާރާތުގައި ވާދަކުރާނީ ހަތް ޤައުމެވެ. އެއީ ސާފް ސަރަހައްދުގެ ފަސް ޤައުމު ކަމަށްވާ، ރާއްޖެ، އިންޑިއާ، ބަންގްލަދޭޝް، ބޫޓާން، ނޭޕާލް އަދި ޕާކިސްތާނާއެކު އެވެ. ސްރީ ލަންކާ އަށް މިއަހަރުގެ މުބާރާތުގައި ވާދަ ކުރެވޭނެ ކަމަކަށް ނުބެލެވެ އެވެ. ސަބަބަކީ އެ ޤައުމު މިހާރު އޮތީ ދުނިޔޭގެ ފުޓުބޯޅައިގެ މައި އިދާރާ (ފީފާ)ގެ ސަސްޕެންޝަންގައި ކަމަށް ވާތީ އެވެ.
ސަރަހައްދުން ބޭރުގެ ދެ ޤައުމު ބައިވެރިކުރުމުގެ ޚިޔާލަކީ އިންޑިއާ އިން ހުށަހެޅި ޚިޔާލެއް ކަމަށް ރިޕޯޓުތައް ބުނެ އެވެ. ސާފް ޗެމްޕިއަންޝިޕާ ގުޅޭ ގޮތުން ބޭއްވި ޕްރެސްއެއްގައި އޯލް އިންޑިއަން ފުޓުބޯޅަ ފެޑެރޭޝަން (އޭއައިއެފްއެފް)ގެ ރައީސް ކަލްޔަން ޗޯބޭ ވަނީ އެ ވާހަކަ ދައްކަވައިފަ އެވެ. އޭނާ އޭރު ވިދާޅުވީ ސަރަހައްދުން ބޭރުގެ ޤައުމަކަށް މުބާރާތުގައި ބައިވެރިވުމަށް ފުރުސަތު ދީފި ނަމަ، މިހާރަށް ވުރެ ހުރިހާ ގޮތަކުން ވެސް މުބާރާތް ފޯރި ގަދަވާނެ ކަމަށެވެ.
އެންމެ ފަހުން ސާފް ޗެމްޕިއަންޝިޕް ބާއްވާފައި ވަނީ 2021 ވަނަ އަހަރު ރާއްޖޭގަ އެވެ. އެ އަހަރުގެ މުބާރާތުގައި ފަސް ޤައުމަކުން ވާދަކޮށްފައިވާއިރު، މުބާރާތް ކާމިޔާބުކޮށްފައި ވަނީ އިންޑިއާ އިންނެވެ.
