ރޯދަމަހު ޚިދުމަތް ދެމުންދާ ވަގުތުތަކަށް ސަމާލުވުމަށް ބީއެމްއެލްއިން އިލްތިމާސްކޮށްފި
ކިއުބީއިން ނަންބަރު ނަގާނަމަ ހެނދުނު 11:30ގެ ކުރިން ނަންބަރު ނަގަންޖެހޭ
ބޭންކް އޮފް މޯލްޑިވްސްގެ އޮންލައިން ބޭންކިންގ ހިދުމަތަށް އޮތެންޓިކޭޓަރ އެޕް ބޭނުންކުރެވޭ ގޮތް ވަނީ ހަދާފައި
ރަމަޟާން މަހު ޚިދުމަތް ދެމުންދާ ވަގުތުތަކަށް ސަމާލުވުމަށް ބޭންކް އޮފް މޯލްޑިވްސް (ބީއެމްއެލް) އިން އިލްތިމާސްކޮށްފިއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ބީއެމްއެލްގެ ޕީއާރު ކޯޑިނޭޓަރު މަރިޔަމް ނުޒުހަތު ވިދާޅުވީ ރޯދަމަހާއި ދިމާކޮށް ބޭންކުން ދެމުންދާ ޚިދުމަތްތަކުގެ ވަގުތުތަކަށް ބަދަލު ގެނެސްފައިވާ ކަމަށެވެ.
ނުޒުހަތު ވިދާޅުވީ ރޯދަ މަސް ނިމެންދެން ބްރާންޗުތަކާއި ސަރވިސް ސެންޓަރުތައް ހުޅުވާފައި ހުންނާނީ ސަރުކާރު ބަންދު ނޫން ދުވަސްތަކުގެ ހެނދުނު 9:30ން މެންދުރު 12:00އާ ހަމައަށް ކަމަށެވެ. އަދި ޝައްވާލު މަހުގެ ފުރަތަމަ ހަތް ދުވަހު ވެސް ބޭންކު ހުޅުވާފައި ހުންނާނީ މި ގަޑިތަކުގައި ކަމަށެވެ.
ބީއެމްއެލްގެ ޕަބްލިކް ރިލޭޝަންސް މެނޭޖަރު މުހައްމަދު ސައީދު ވިދާޅުވި ގޮތުގައި، ރާއްޖޭން ބޭރަށް ފައިސާ ފޮނުވުން ނުވަތަ ޓީޓީ އާއި ބީއެމްއެލްގެ ޗެކު ޕްރޮސެސް ކުރުމާއި މުވައްޒަފުންނަށް މުސާރަ ޖަމާކޮށްދިނުމާއި ލޯކަލް ޓްރާންސްފަރ އަދި ޕޭމަންޓުގެ ޚިދުމަތް އޮންލައިންކޮށް ލިބޭނެ ކަމަށެވެ. ނަމަވެސް އެ ދުވަހުން ދުވަހަށް ޚިދުމަތް ލިބޭނީ ކޮންމެ ދުވަހެއްގެ ވެސް ހެނދުނު 11:00 ގެ ކުރިން ލިބޭ ރިކުއެސްޓުތަކަށް ކަމަށާއި، އެވަގުތަށް ސަމާލުވުމަށް އެދޭ ކަމަށެވެ. އަދި އެދުވަހު ޕްރޮސަސް ކުރަން ބޭނުންވާނަމަ އެދުވަހެއްގެ 11:00ކުރިން ރިކުއެސްޓް ކުރުމަށް އޭނާ އެދިފައިވެއެވެ.
ސައީދު ވިދާޅުވީ ބީއެމްއެލްގެ ސެންޓަރުތަކުން ކިއުބީ މެދުވެރިކޮށް ނަންބަރު ދޫކުރަމުންދާ ކަމަށެވެ. ހެނދުނު 9:30ން 12:00ށް ޚިދުމަތް ދިން ކަމުގައިވީ ނަމަވެސް ހެނދުނު 11:30 ގެ ފަހުން ނަންބަރު ދޫނުކުރާނެ ކަމަށް އޭނާ ވިދާޅުވިއެވެ. އަދި ވިދާޅުވީ އެފަދަ ޚިދުމަތެއް ބޭނުންވާނަމަ އެދުވަހެއްގެ 11:30ގެ ކުރިން ނަންބަރު ނެގުމަކީ ވަރަށް މުހިންމު ކަމެއް ކަމަށެވެ.
ބޭސިކް ބޭންކިން ސަރވިސް 24 ގަޑިއިރު ލިބޭއިރު، އެ ބޭންކުން ކަސްޓަމަރުންގެ ފަރާތުން އެދިފައިވަނީ އިންޓަރނެޓް ބޭންކިން އަދި މޯބައިލް އެޕްލިކޭޝަން މެެދުވެރިކޮށް ޚިދުމަތް ހޯދުމަށެވެ.
