މުލަކޭއާއި އަޔާ ނިއުރޭޑިއަންޓަށް!

ޔަސްފާދު ހަބީބު (މުލަކޭ)އާއި, އަހުމަދު އަޔާޒު (އަޔާ) ދެވަނަ ޑިވިޝަންގައި ނިއުރޭޑިއަންޓަށް ކުޅެން ސޮއިކޮށްފިއެވެ.

ފުރަތަމަ ޑިވިޝަންގައި ކުޅެމުން އައި މުލަކޭ އަކީ ކުރިން ޤައުމީ ސްކޮޑްގައިވެސް ހިމެނުނު ކުޅުންތެރިއެކެވެ. އީގަލްސްއާއި މާޒިޔާގެ އިތުރުން ސުޕަރ ޔުނައިޓެޑް ސްޕޯރޓްސް (ސަސް)ގައި ރަނގަޅު ކުޅުމެއް ދެއްކި ކިޑްފީލްޑަރަކީ މިއަހަރު ނިއުރޭޑިއަންޓަށް ކުޅެން ސޮއިކުރިކަން އެކްލަބުން އިއުލާންކުރި ފުރަތަމަ ކުޅުންތެރިޔާއެވެ. އަޔާ ފުރަތަމަ ޑިވިޝަންގައި ކުޅުނު ނަމަވެސް ބޮޑަށް ފާހަގަކުރެވެނީ މޮޅު ފުޓްސަލް ކުޅުންތެރިއެއްގެ ގޮތުގައެވެ. އޭނާއަކީ ފުޓްސެލްގައި ރާއްޖޭގެ އެންމެ މޮޅު އެއް ކުޅުންތެރިޔާއެވެ. އެކަމަކު ދޭތެރެ ދޭތެރެއިން ފުރަތަމަ ޑިވިޝަނުންވެސް ފެނެއެވެ.

ދެވަނަ ޑިވިޝަންގައި ވާދަކޮށް އަލުން ފުރަތަމަ ޑިވިޝަނަށް ޕްރޮމޯޓްވާން ކުރާ މަސައްކަތުގައި ނިއުރޭޑިއަންޓުން ވަނީ ޓީމުގެ ކޯޗިންގ ޓީމްވެސް އެކުލަވާލާފައެވެ. ކޯޗަކީ އަހުމަދު ނިމާދު (ނިމާ) އެވެ. އެސިސޓެންޓް ކޯޗަކީ އެޓީމްގެ ކުރީގެ ކުޅުންތެރިޔާ ފަރުހާދު އިސްމާއީލް (ފަރޭ) އެވެ.