ވާދޫ ޓީމުގެ ކުޅުންތެރިންނަށް ޖާޒީ ހަވާލުކޮށްފި، ޓީމުގެ ކެޕްޓަނަކީ އަޔާ

ގޯލްޑަން ފުޓްސަލް ޗެލެންޖުގައި ވާދަކުރާ ގދ.ވާދޫ ޓީމުގެ ކުޅުންތެރިންނާއި އޮފިޝަލުންނަށް ޖާޒީ ހަވާލުކޮށްފި އެވެ.

އެ ޓީމުގެ ކުޅުންތެރިންނާއި އޮފިޝަލުންނަށް ޖާޒީ ހަވާލުކޮށްފައި ވަނީ ބުދަ ދުވަހުގެ ރޭ ސޮލައިޓް ކެފޭ ގައި އެކަމަށްޓަަކައި ބޭއްވި ޚާއްސަ ރަސްމިއްޔާތެއްގަ އެވެ. ކުޅުންތެރިންނާއި އޮފިޝަލުންނަށް ޖާޒީ ހަވާލުކޮށްދެއްވީ މައިފޫނާ ފައުންޑޭޝަންގެ ވެރިޔާ އަދި ފެނަކަ ކޯޕަރޭޝަންގެ މެނޭޖިން ޑައިރެކްޓަރ އަޙުމަދު ސައީދު މުޙައްމަދާއި، ބަންކާގެ އޯނަރު އަމީޒު މުޙައްމަދު އެވެ. މައިފޫނާ ފައުންޑޭޝަން އަދި ބަންކާ އަކީ މުބާރާތުގައި ވާދަކުރާ ވާދޫ ޓީމުގެ ދެ ސްޕޮންސަރުންނެވެ.

މީގެ އިތުރުން އެ ރަސްމިއްޔާތުގައި ވަނީ އެ ޓީމުގެ ކެޕްޓަނާއި، ދެ ވައިސް ކެޕްޓަނުން ވެސް އިއުލާންކޮށްފަ އެވެ. އެ ޓީމުގެ ކެޕްޓަނަކަށް ހަމަޖެއްސީ އަޙުމަދު އަޔާޒް (އަޔާ) އެވެ. ދެ ވައިސް ކެޕްޓަނުންނަކީ ޒައިދާން އަޙުމަދާއި، މުޙައްމަދު އިޔާދު އަލީ އެވެ. މުބާރާތުގައި ވާދޫ ޓީމުގެ ފުރަތަމަ މެޗުގައި ބުރާސްފަތި ދުވަހުގެ ރޭ ނުކުންނާނީ ގައްދޫއާ ދެކޮޅަށެވެ.

މުބާރާތުގެ ގްރޫޕް ސްޓޭޖުގައި ވާދޫ އިން ޖުމުލަ ހަތަރު މެޗު ކުޅެން ޖެހެ އެވެ. ދެ ވަނަ މެޗުގައި މި މަހުގެ 16 ވަނަ ދުވަހު ނުކުންނާނީ ހޯޑެއްދޫއާ ދެކޮޅަށެވެ. އޭގެ ފަހުން 18 ވަނަ ދުވަހު މަޑަވެއްޔާ ދެކޮޅަށް ނުކުންނައިރު، ގްރޫޕް ފަހު މެޗުގައި ތިނަދޫއާ ދެކޮޅަށް ނުކުންނާނީ 21 ވަނަ ދުވަހު އެވެ.