ސިންގަލްސް ބައިގެ ޗެމްޕިއަންކަން ފާއިހާއި އަޔާނީއަށް

ޓެނިސް އެސޯސިއޭޝަން އޮފް މޯލްޑިވްސްއިން އިންތިޒާމުކޮށްގެން ބޭއްވި 8 ވަނަ މޭރީބްރައުން ޓެނިސް ޗެމްޕިއަންޝިޕްގެ ފިރިހެން އޯޕަން ސިންގަލްސް ބައިގެ ޗެމްޕިއަންކަން އަބްދުﷲ ފާއިހް ފަޒީލް ހޯދިއިރު، އަންހެން އޯޕަން ސިންގަލްސް ބައިގެ ޗެމްޕިއަންކަން އަޔާނީ މޫސާ ކަލީމް ހޯދައިފި އެވެ.

މިއަހަރުގެ މުބާރާތް ކުރިއަށް ދިޔައީ މި މަހުގެ 13 އިން 20 ގެ ނިޔަލަށެވެ. މިއަހަރުގެ މުބާރާތްވެސް ރާވާ ކުރިއަށް ގެންދިޔައީ އަކޫ އެކަޑަމީންނެވެ.

މުބާރާތުގެ ފިރިހެން އޯޕަން ސިންގަލްސް ބައިގެ ޗެމްޕިއަންކަން ފާއިހް ހޯދީ ފައިނަލްގައި އާމިރު މަންސޫރު ބަލިކުރުމަށްފަހު އެވެ. އަދި އަންހެން އޯޕަން ސިންގަލްސް ބައިގެ ޗެމްޕިއަންކަން އަޔާނީ ހޯދީ ފައިނަލްގައި ޒެއިނާ އަބްދުލް ރަޝީދު ބަލިކުރުމަށްފަހު އެވެ.

މީގެ އިތުރުން މި މުބާރާތުގެ ފިރިހެން އޯޕަން ޑަބަލްސް ބައިގެ ޗެމްޕިއަންކަން މުހައްމަދު ފަޒީހާއި އަހުމަދު އަކުރަމްގެ ޕެއަރ ހޯދިއިރު، އަންހެން އޯޕަން ޑަބަލްސް ބައިގެ ޗެމްޕިއަންކަން ހޯދީ އަޔާނީ އާއި ޒެއިނާގެ ޕެއަރ އިންނެވެ.

މިއަހަރުގެ މުބާރާތުގައި 105 ކުޅުންތެރިން ވާދަކުރި ކަމަށް ޓެނިސް އެސޯސިއޭޝަނުން މައުލޫމާތު ދެއެވެ. އެއީ ފިރިހެން 48 ކުޅުންތެރިންނާއި، އަންހެން 57 ކުޅުންތެރިންނެވެ.

މިއަހަރުގެ މުބާރާތުގައިވެސް ކުރިއަށްދިޔައީ 8 އަހަރުން ދަށާއި، 10 އަހަރުން ދަށާއި، 12 އަހަރުން ދަށާއި، 14 އަހަރުން ދަށާއި، 18 އަހަރުން ދަށާއި، 45 އަހަރުން މަތީގެ ސިންގަލްސް އަދި ޑަބަލްސް އަދި އޯޕަން ބައިގެ ކުޅުމެވެ.

ޓެނިސް އެސޯސިއޭޝަނުން ބުނީ މި މުބާރާތުގެ ސަބަބުން އުމުރުފުރާތަކުގެ މެދުގައި އޮންނަ ވާދަވެރިކަން އިތުރުވެ، ކުޅުންތެރިންގެ ކުޅުމުގެ ފެންވަރު ރަނގަޅު ކުރުމަށް އެހީތެރިވެދިނުމުގެ އިތުރުން ޓެނިހުގެ މަގުބޫލުކަން އިތުރުވެގެންދާ ކަމަށެވެ.