އާ ސީޒަނަށް މާޒިޔާގެ ކެޕްޓަނަކަށް ޑިފެންޑަރު ސަމޫހު އަލީ (ސަމުއްޓެ) ހަމަޖައްސައިފިއެވެ.

ސަމުއްޓެއަކީ ޤައުމީ ފުޓްބޯޅަ ޓީމު އެންމެ ފަހުން ޕާކިސްތާނާ ދެކޮޅަށް ކުޅުނު ބައިނަލްއަޤްވާމީ ރަހުމަތްތެރިކަމުގެ މެޗުގައި ވެސް ކެޕްޓަނެވެ. ޤައުމީ ޓީމުގެ ކެޕްޓަން އަކުރަމް އަބުދުލްޣަނީއަށް އަނިޔާވި ފަހުން, ޓީމުގެ ކެޕްޓަނަކީ ޑިފެންޑަރު ސަމޫހުއެވެ. މިދިޔަ އަހަރުތަކުގައި މާޒިޔާގެ ކެޕްޓަން ބޭންޑް އަޅައިގެން ވެސް ގިނަ މެޗުތަކެއް އޭނާ ކުޅުނެވެ. ޚާއްޞަކޮށް މިދިޔަ ސީޒަންގައި ކެޕްޓަން އަސަދުالله އަނިޔާގައި ބޮޑުބައެއް ހޭދަކުރިއިރު ޓީމު ލީޑްކުރުމުގައި ސަމުއްޓެގެ ދައުރު ބޮޑެވެ. އޭނާ މާޒިޔާއާ ގުޅުނީ 2016 ވަނަ އަހަރުއެވެ. އޭނާ އަކީ ފިޓްކޮށް ހުންނަ ނަމަ ޤައުމީ ޓީމާއި މާޒިޔާގައި ވެސް ފުރަތަމަ އެގާރަ ޔަޤީން ކުޅުންތެރިއެކެވެ.

މާޒިޔާގެ ވައިސްކެޕްޓަނުންނަށް ހަމަޖެއްސީ މިދިޔަ ދެ ސީޒަންގައި ވެސް ވައިސް ކެޕްޓަނުންގެ ގޮތުގައި ތިބި މިޑްފީލްޑަރ މުޙައްމަދު އިރުފާނު (އިރޭ) އާއި, ޑިފެންޑަރު ހަސަން ޝިފާޒު (ޑުންގާ) ގެ އިތުރުން މިދިޔަ ދެ އަހަރުގެ ރާއްޖޭގެ އެންމެ މޮޅު ކުޅުންތެރިޔާ ހަމްޒާ މުޙައްމަދު (ހަމްޕު) އެވެ.

މިދިޔަ އަހަރުތަކުގައި މާޒިޔާގެ ކެޕްޓަންކަންކުރި އަސަދުالله އަބުދުالله ވަނީ ކްލަބް ދޫކޮށްލާފައެވެ. އޭނާ ބަދަލުވާނެކަމަށް ބެލެވެނީ ވެލެންސިޔާއަށެވެ. އަސަދުالله މާޒިޔާ ދޫކޮށްލަނީ 11 އަހަރަށްފަހުއެވެ. މާޒިޔާ ފުރަތަމަ ޑިވިޝަންގައި ހޯދި ހުރިހާ ކާމިޔާބީއެއްގައި އަސަދުالله އަކީ ޓީމްގެ ލީޑަރެވެ. އެންމެ މުހިއްމު ކުޅުންތެރިޔާއެވެ.

ސީޒަންގައި މާޒިޔާގެ ރަސްމީ ފުރަތަމަ މެޗުގައި ހޯމަދުވަހުގެރޭ ނުކުންނާނީ އީގަލްސްއާ ދެކޮޅަށެވެ. އެއީ ސީޒަން ހުޅުވަން ކުޅޭ ޗެރިޓީ ޝީލްޑް މެޗަށެވެ.