މާޒިޔާގެ އެއްބަސްވުން ޔާމްބެވެސް އާކޮށްފި

މާޒިޔާ ސްޕޯޓްސް އެންޑް ރެކްރިއޭޝަނަށް ކުޅެމުން އަންނަ މޫސާ ޔާމީން (ޔާމްބެ) ކުރިޔަށް ސީޒަނުގައިވެސް ކުޅެން ނިންމައި، އާ އެއްބަސްވުމުގައި ސޮއިކޮށްފިއެވެ.

މާޒިޔާއާ 2014 ވަނަ އަހަރު ގުޅުނު ޔާމްބެ ވަނީ އެޓީމާއެކު ފާއިތުވެދިޔަ ސީޒަންތަކުގައި މޮޅު ކުޅުމެއް ދައްކާ ގިނަ ކާމިޔާބީތަކެއްވެސް ހޯދާފައެވެ.

ތޮއްޑޫ ޓީމާއެކު ފުރަތަމަ ޑިވިޝަނުން ފެނުނު ޔާމްބެ ވަނީ އޯލް ޔޫތް ލިންކޭޖް (އޭވައިއެލް) އަދި ނިއުރޭޑިއަންޓް ސްޕޯޓްސް ކްލަބަށްވެސް ކުޅެ، ކާމިޔާބީތަކެއް ހޯދާފައެވެ.

ޔާމްބެގެ އިތުރުން މާޒިޔާ އަށް ކުޅެމުން އަންނަ މުހައްމަދު އިރުފާން (އިރޭ) ވެސް ވަނީ މާޒިޔާއާއެކު ހަދާފައިވާ އެއްބަސްވުން އާކޮށްފައެވެ. މާޒިޔާ އިން އަންނަނީ ކުރިޔަށް އޮތް ސީޒަނަށް ޓީމު ވަރުގަދަކުރަމުންނެވެ. އެގޮތުން އެޓީމުން ވަނީ ބައެއް ކުޅުންތެރިންގެ އެއްބަސްވުން އާކޮށް، އިތުރު ކުޅުންތެރިން ހޯދުމަށް މަސައްކަތް ފަށާފައެވެ.

ފާއިތުވެދިޔަ ތިން ސީޒަނުގައި މާޒިޔާގައި މުހިންމު ދައުރެއް އަދާކުރި މުހައްމަދު އުމެއިރު ވަނީ އެ ކްލަބް ދޫކޮށް،ނިއުރޭޑިއަންޓް ސްޕޯޓްސް ކްލަބާ ގުޅިފައެވެ. އެގޮތުން އުމެއިރު ނެތްތަން ފޫބެއްދުމަށް މާޒިޔާއިން ޓީސީ ސްޕޯޓްސް ކްލަބަށް ކުޅެމުން އަންނަ ނާއިޒް ހަސަން (ދާދު) ގެންނަން އުޅޭކަމަށް ދަނީ އަޑުތައް ފެތުރެމުންނެވެ. އެހެން ނަމަވެސް މިކަން އެ ދެ ކްލަބުން ވެސް ދޮގުކުރެއެވެ.