އުނގޫފާރު މަގުހެދުމުގެ 51 އިންސައްތަ މަސައްކަތް ނިމިއްޖެ
2 އެޕްރީލު 2023 | އާދީއްތަ 16:43ބާރް ސްޕީޑްގައި މަސައްކަތް ކުރިއަށްދޭ
އުނގޫފާރު މަގުހެދުމުގެ މަސައްކަތުގެ ތެރެއިން
ރ. އުނގޫފާރު މަގުހެދުމުގެ މަޝްރޫއު (ދެވަނަ ފިޔަވަހި) ގެ ދަށުން، މަސައްކަތުގެ 51 އިންސައްތަ މަސައްކަތް ނިމިފައިވާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ބުނެފިއެވެ.
އެމްޓީސީސީން ބުނީ އުނގޫފާރު މަގުހެދުމުގެ މަޝްރޫއުގެ މަސައްކަތް ބާރު ސްޕީޑްގައި ކުރިއަށްދާ ކަމަށާއި، ދެވަނަ ފިޔަވަހިގެ ދަށުން، މަސައްކަތުގެ 51 އިންސައްތަ މަސައްކަތް ފުރިހަމަވެފައިވާ ކަމަށެވެ. އަދި މަގުބައްތި ހަރުކުރުމުގެ 89 އިންސައްތަ މަސައްކަތް ނިމިފައިވާ ކަމަށާއި ސަބްގްރޭޑް ތައްޔާރުކުރުމުގެ 40 އިންސައްތަ މަސައްކަތް ނިމިފައިވާ ކަމަށް އެމްޓީސީސީން ބުނެއެވެ.
މީގެ އިތުރުން، ސައިޓުގައި މިހާރު ކުރިއަށްދަނީ ދުވާރު އެޅުމުގެ މަސައްކަތެވެ.
މިއީ 21.6 މިލިއަން ރުފިޔާގެ މަޝްރޫއެކެވެ. މިމަޝްރޫއުގެ ދަށުން 7511.70 އަކަ މީޓަރުގެ ދުއްވާ ސަރަަޙައްދެއްގައި ސަބްގްރޭޑް، ސަބްބޭސް އަދި ތާރު އެޅުމުގެ މަސައްކަތް ކުރުމާއި، 2291.75 އަކަ މީޓަރުގެ ސަރަޙައްދެއްގައި ދުވާރު ހެދުން ހިމެނެއެވެ. އަދި ފެންހިންދާ ނިޒާމެއް ގާއިމުކުރުމާއި، މަގުމަތީ ނިޝާން ހަރުކުރުމާއި، މަގުބައްތި ހަރުކުރުމުގެ މަސައްކަތްވެސް ހިމެނެއެވެ.
އަލަށް ތަރައްގީކުރާ މަގުތަކާއެކު މުޅި މަޝްރޫއު އެއްކޮށް ނިމޭއިރު ރަށުގެ 17 މަގެއް ތާރުއަޅާ ތަރައްގީ ކުރެވިގެންދާނެއެވެ.
