ކ. މާލެ
|
2 އޭޕްރިލް 2023 | އާދީއްތަ 18:18
ހަންކެޑެ މަޝްރޫއު ކުރިއަށްދާ ސަރަހައްދު މަޝްރޫއުގެ ކޮންޓްރެކްޓަރަށް ދައްކާލަނީ
ހަންކެޑެ މަޝްރޫއު ކުރިއަށްދާ ސަރަހައްދު މަޝްރޫއުގެ ކޮންޓްރެކްޓަރަށް ދައްކާލަނީ
އައްޑޫސިޓީ ކައުންސިލް މީޑިއާ
ހަންކެޑެ އިންޓަގްރޭޓެޑް ޓޫރިޒަމް މަޝްރޫއު
ހަންކެޑެ މަޝްރޫއުގެ ކުރިއަށްދާނެ ކަމުގެ ފުރިހަމަ ޔަގީންކަން އެބައޮތް: ނިޒާރު
 
މި މަޝްރޫއުގެ ސަބަބުން އައްޑޫ ސިޓީއަށް އިގްތިސާދީ ގޮތުންނާއި އިޖުތިމާއީ ގޮތުން ފައިދާ ވާނެ ކަމަށް ވިދާޅުވި
 
ސަރުކާރުން ވައުދުވި 8000 އެދު އައްޑޫ ސިޓީއަށް އަންނާނެ ކަަމަށް ވިދާޅުވި
 
މި މަޝްރޫއު ކާމިޔާބު ކަމާއެކު ކުރިއަށްގެންދިއުމަށް ޗައިނާ ސަރުކާރުގެ ވަރަށް ބޮޑު އެއްބާރުލުމެއް ލިބޭކަން ފާހަގަކުރެއްވި

އައްޑޫ ސިޓީ ހަންކެޑެ އިންޓަގްރޭޓެޑް ޓޫރިޒަމަށް ތަރައްގީ ކުރުމުގެ މަޝްރޫއުގެ މަސައްކަތް ކުރިއަށްދާނެ ކަމުގެ ފުރިހަމަ ޔަގީންކަން އެބައޮތް ކަމަށް އެ ސިޓީގެ މޭޔަރ އަލީ ނިޒާރު ވިދާޅުވެއްޖެއެވެ.

މޯލްޑިވްސް ފަންޑް މެނޭޖްމަންޓް ކޯޕަރޭޝަނުން މި މަޝްރޫއުގެ މަސައްކަތް ހަވާލު ކޮށްފައިވަނީ ޗައިނާގެ، ޗައިނާ ނެޝަނަލް އިލެކްޓްރިކަލް އިންޖިނިއަރިން ކޮމްޕެނީ (ސީއެންއީސީ) އާއެވެ. އެ ކުންފުނީގެ ބޭފުޅުންނާއި ފަންޑު މެނޭޖްމަންޓް ކޯޕަރޭޝަނުގެ ބޭފުޅުން ވަނީ ހޮނިހިރު ދުވަހު މަޝްރޫއު ކުރިއަށްދާ ސައިޓު ބައްލަވާލައްވައިފައެވެ. އަދި އެ މަޝްރޫއާ ގުޅޭގޮތުން ސިޓީ ކައުންސިލާ މަޝްވަރާ ވެސް ކޮށްފައިވެއެވެ.

މި ޒިޔާރަތާ ގުޅޭގޮތުން "ރާއްޖެ އެމްވީ" އަށް މައުލޫމާތު ދެއްވަމުން ނިޒާރު ވިދާޅުވީ ހަންކެޑެ މަޝްރޫއު ހަވާލުކޮށްފައިވާ ކުންފުންޏަކީ ޗައިނާގެ ސަރުކާރުގެ ކުންފުންޏަކަށްވެފައި އެ ކުންފުންޏަކީ ތަޖުރިބާކާރު ކުންފުންޏަކަށްވާތީ މަޝްރޫއު ކުރިއަށްދާނެ ކަމުގެ ފުރިހަމަ ޔަގީންކަން އެބައޮތް ކަމަށެވެ. އެގޮތުން، މިހާރުވެސް މި މަޝްރޫއުގެ ޑިޒައިނިންގެ މަރުހަލާ ކުރިއަށްދާ ކަމަށާއި ކުރިއަށް އޮތް ދެ މަސްދުވަހުގެ ތެރޭގައި ސައިޓު މޮބިލައިޒް ކުރާނެ ކަމުގެ މައުލޫމާތު ލިބިފައިވާ ކަމަށް ވެސް އޭނާ ވިދާޅުވިއެވެ.

މީގެ އިތުރުން މި މަޝްރޫއު ކާމިޔާބު ކަމާއެކު ކުރިއަށްގެންދިއުމަށް ޗައިނާ ސަރުކާރުގެ ވަރަށް ބޮޑު އެއްބާރުލުމެއް ލިބޭކަން ވެސް އޭނާ ފާހަގަކުރެއްވިއެވެ.

ނިޒާރު ވިދާޅުވީ މި މަޝްރޫއަކީ އައްޑޫ ރައްޔިތުން ވަރަށް ކުރިން ފެށިގެން އިންތިޒާރު ކުރަމުން އައި މަޝްރޫއެއް ކަމަށާއި އެހެންވެ، އެ ސިޓީގެ ރައްޔިތުން ތިބީ ވަރަށް އުފަލުން ކަމަށެވެ. އަދި މި މަޝްރޫއުގެ ސަބަބުން އައްޑޫ ސިޓީއަށް އިގްތިސާދީ ގޮތުންނާއި އިޖުތިމާއީ ގޮތުން ފައިދާ ވާނެ ކަމަށާއި ގިނަ އަދަދެއްގެ ވަޒީފާ އުފެދިގެންދާނެ ކަމަށް ވެސް އޭނާ ވިދާޅުވިއެވެ.

ގަން އިންޓަނޭޝަނަލް އެއަރޕޯޓު ފުރިހަމަ ގޮތުގައި ހިންގުމަށްވެސް ހަންކެޑެ މަޝްރޫއު ވަރަށް ބޮޑު އެހީއަކަށް ވެގެންދާނެ ކަމަށް ވެސް ނިޒާރު ވިދާޅުވިއެވެ.

ނިޒާރު އިތުރަށް ވިދާޅުވީ ހަންކެޑެ މަޝްރޫއު ސަރުކާރުން 2 އަހަރު ދުވަހުގެ ތެރޭގައި ނިންމާ ގޮތަށް ހަވާލުކޮށްފައިވާއިރު ހަންކެޑެ ވަކިކުރުމަށް އެފްކޮންސް އިން ކުރިއަށްގެންދާ ބްރިޖުގެ މަސައްކަތާއެކު އެ މަސައްކަތް ވެސް ކުރިއަށްދާނެ ކަމަށް ވިދާޅުވިއެވެ. އަދި މިހާރު ކުރިއަށްދާ ޓޫރިޒަމްގެ މަޝްރޫއުތަކާއެކު ސަރުކާރުން ވައުދުވި 8000 އެދު އައްޑޫ ސިޓީއަށް އަންނާނެ ކަަމަށް ވެސް އޭނާ ވިދާޅުވިއެވެ.

ހަންކެޑެ މަޝްރޫއަކީ ޗައިނާގެ ބޭންކަކުން އެމްއެފްއެމްސީއަށް ނަގާފައިވާ 142 މިލިއަން ޑޮލަރު (2.2 ބިލިއަން ރުފިޔާ) ފައިނޭންސިން ފެސިލިޓީއެއްގެ ކުރިއަށްގެންދާ މަޝްރޫއެކެވެ. އެ ކުންފުނިން ބުނެފައިވާ ގޮތުގައި އެ ހަންކެޑެ ޓޫރިޒަމް ޑެވެލޮޕްމަންޓް ޕްރޮޖެކްޓުގެ ދަށުން 2082 އެނދު ހިމެނޭގޮތަށް 1،041 ކޮޓަރި ތަރައްގީ ކުރާނެއެވެ. މި ޕްރޮޖެކްޓުގެ ދަށުން ތައާރަފު ކުރާ ތަފާތު ގިންތީގެ ހޮޓަލުތަކުގެ ތެރޭގައި ދެ ގްރޭންޑް، ދެ ޑީލަކްސް އަދި 10 ބުޓީކް ހޮޓެލް ހިމެނޭ ކަމަށް ވެސް އެ ކުންފުނިން ބުންޏެވެ.

މި މަޝްރޫއުގެ ތެރޭގައި 64 ސާވިސްޑް އެޕާޓްމަންޓާއި 17 ބީޗް ވިލާވެސް ހިމެނޭއިރު ނޮލެޖް ސެންޓަރ، މިކްސްޑް ސްޕޯޓް ބިލްޑިން، އައުޓްޑޯ ބީޗް ސްޕޯޓްސް އަދ ތިއޭޓަ ފަދަ ރެކްރިއޭޝަނަލް ހިދުމަތްތަކާއި ފުޑް ކޯޓާއި ތަފާތު ރެސްޓޯރަންޓްތަކާއި ފިހާރަތައް ވެސް މި މަޝްރޫއުގެ ތެރޭގައި ހިމެނެއެވެ.

ހަންކެޑެ އިންޓަގްރޭޓަޑް ޓޫރިޒަމް ޑިވެލޮޕްމަންޓް މަޝްރޫއުގެ ސަބަބުން ރާއްޖޭގެ ޓޫރިޒަމް ސިނާޢަތް ސިންދަފާތުކޮށް، އިންގިލާބީ ބަދަލުތަކެއް އަންނާ ކަމަށް ފަންޑް މެނޭޖްމަންޓް ކޯޕަރޭޝަނުން ދެކެއެވެ.

އެންމެ ފަހުން އަޕްޑޭޓް ކުރީ: 3 ހަފްތާ ކުރިން
ރިވިއު ކުރީ: ފާޠިމަތު ޒުހައިރާ
0%
0%
0%
0%
0%
0%
ކޮމެންޓް
ގުޅުންހުރި