ޖޭޕީން ވަކިވީ ސަރުކާރާއެކު މަސައްކަތްކުރެއްވުމަށް އޮތް ޝައުގާއި ފޯރީގެ ސަބަބުން ކަމަށާއި، ހަވާލުކުރާ މަސައްކަތްތައް ފޯރިއާއި ޖޯޝުގައި ކުރަން ބޭނުންނަމަ ހުންނަންވާނީ ރައީސުލްޖުމްހޫރިއްޔާއާ އެކުގައި ކަމަށް ގަބޫލުކުރައްވާ ކަމަށް، އެމްޑަބްލިއުއެސްސީގެ މެނޭޖިންގ ޑިރެކްޓަރ ހަސަން ޝާހް ވިދާޅުވެއްޖެއެވެ.
ޝާހު މިފަދައިން ވިދާޅުވީ ރާއްޖެ އެމްވީން ދެންނެވި ސުވާލަކަށް ޖަވާބުދެއްވަމުންނެވެ.
ޖުމްހޫރީ ޕާޓީގެ ކައުންސިލް މެންބަރު، ހަސަން ޝާހް އެ ޕާޓީން ވަކިވެވަޑައިގެންފައި ވަނީ މާރޗް 31 ވަނަ ދުވަހުއެވެ.
އެމްޑަބްލިއުއެސްސީގެ މެނޭޖިން ޑިރެކްޓަރގެ މަގާމުގައި ހުންނަވައިގެން، އެހެން ފިކުރަކަށް ނުވަތަ ރިޔާސީ އިންތިޚާބުގައި ވާދަކުރާ މީހަކާއެކު މަސައްކަތްކުރެއްވުމަކީ ގަބޫލުކުރައްވާ ކަމެއް ނޫންކަަމަށް ޝާހު ވިދާޅުވިއެވެ. އަދި ޖޭޕީން ވަކިވެވަޑައިގެންނެވީ ރިޔާސީ އިންތިޚާބު ރައީސް އިބްރާހީމް މުހައްމަދު ސާލިހަށް ކާމިޔާބުކޮށްދެއްވުމުގެ ރޫހާއި ޝައުގު ހުރުމުން ކަމަށްވެސް ޝާހު ވިދާޅުވިއެވެ.
ބުރާސްފަތި ދުވަހުގެ ރޭ ޝާހު ކުރެއްވި ޓްވީޓެއްގައި، 2023ގެ ރިޔާސީ އިންތިހާބުގައި ރައީސް އިބްރާހީމް މުހައްމަދު ސާލިހަށް ތާއީދު ކުރައްވާތީ ޖުމްހޫރީ ޕާޓީން ވަކިވެވަޑައިގެންފައިވާކަމަށް ވިދާޅުވެފައިވެއެވެ. އަދި އޭނާ ވަނީ އެ ކަން ސިޓީއަކުން ޖުމްހޫރީ ޕާޓީގެ ލީޑަރު ގާސިމް އިބްރާހިމަށް ދަންނަވާފައެވެ. ޝާހު އެ ސިޓީގައި ވިދާޅުވެފައިވަނީ، ރައީސް އިބްރާހީމް މުހައްމަދު ސާލިހުގެ ރިޔާސީ ދައުރުގައި ހޯއްދަވައިދެއްވާފައިވަނީ ގައުމުގެ ހަމަޖެހުމާއި އަސާސީ ހިދުމަތް ފޯރުކޮށްދިނުމާއި ތަރައްގީ ކަމަށެވެ.
