ގުރައިދޫ ދާއިރާގެ ބައި-އިލެކްޝަން: މޮނިޓަރުންނާއި އޮބްޒާވަރުންނާއި މަންދޫބުން ސެޝަންގައި ބައިވެރިނުވާނަމަ ފާސް ނުލިބޭނެ
އިންތިހާބު އޮންނާނީ އޭޕްރީލް މަހު 15ގައި
ގުރައިދޫ ދާއިރާގެ ބައި އިލެކްޝަންގައި ވާދަކުރައްވާ 3 ކެންޑިޑޭޓުން
ގުރައިދޫ ދާއިރާގެ ބައި-އިލެކްޝަންގައި ހަރަކާތްތެރިވާ މޮނީޓަރުންނާއި، އޮބްޒާވަރުން އަދި ކެންޑިޑޭޓުންގެ މަންދޫބުން އާދީއްތަ ދުވަހު އޮންނަ އޮންލައިން ސެޝަންގައި ބައިވެރި ނުވާނަމަ ފާސް ނުލިބޭނަކަމަށް އިލެކްޝަންސް ކޮމިޝަނުން ބުނެފިއެވެ.
ރާއްޖެޓީވީގެ ފަލަސުރުހީ ޕްރޮގްރާމުގައި ބައިވެރިވެވަޑައިގެން، ވާހަކަ ދައްކަވަމުން، އިލެކްޝަންސް ކޮމިޝަންގެ ސެކްރެޓަރީ ޖެނެރަލް ހަސަން ޒަކަރިއްޔާ ވިދާޅުވީ ގުރައިދޫ ދާއިރާގެ ބައިއިލެކްޝަންގެ އިންތިހާބުގައި އޮބްޒާވްކުރުމާއި މޮނިޓަރ ކުރުމަށް އެދޭ ފަރާތްތަކަށް އެ ފުރުސަތު ހުޅުވާލާ އަދި އެކަމަށް ކުރިމަތިލި ފަރާތްތަކުގެ މައުލޫމާތު ސެޝަން ކުރިއަށްގެންދިއުމަށް ތައްޔާރުވެފައިވާ ކަމަށެވެ. އަދި އޮބްޒާވަރުންނާއި މޮނީޓަރުން އަދި ކެންޑިޑޭޓުންގެ މަންދޫބުންނަށް ހާއްސަކޮށްގެން ބާއްވާ މައުލޫމާތު ދިނުމުގެ ބައްދަލުވުމެއް އާދީއްތަ ދުވަހު ކުރިއަށްގެންދާނެ ކަމަށެވެ.
ހަސަން ވިދާޅުވީ ހުރިހާ ސިޔާސީ ޕާޓީތަކަށް، މައުލޫމާތުދިނުމުގެ މި ބައްދަލުވުމަކީ ވަރަށް މުހިންމު ބައްދަލުވުމެއްކަން އަންގާފައިވާނެ ކަމަށެވެ. އަދި މިއީ އެޕްލިކޭޝަން ހުށަހެޅި ހުރިހާ ފަރާތަކަށް އޮންލައިންކޮށް ބައިވެރިވެވޭގޮތަށް ކުރިއަށްގެންދާ ބައްދަލުވުމެއް ކަމަށާއި، މައުލޫމާތު ސެޝަން ފުރިހަމަ ކުރުމުން ފާސްދޫކުރުމުގެ ކަންކަން ކުރިއަށްގެންދާނެ ކަމަށެވެ.
ހަސަން ވިދާޅުވީ ގުރައިދޫ ދާއިރާގައި ހިމެނޭ ތިން ރަށުގައިވެސް ވޯޓު ފޮށި ބަހައްޓާނެ ތަންތަން ކަނޑައަޅާ އޮފިޝަލުން ކަނޑައެޅުމުގެ މަސައްކަތް ކުރަމުންދާ ކަމަށެވެ. އަދި ވޯޓު ޗާޕްކުރުމުގެ މަސައްކަތް މި ހަފްތާތެރޭގައި ފަށާނެ ކަމަށް އޭނާ ވިދާޅުވިއެވެ.
އޭޕްރީލް މަހުގެ 15 ވަނަ ދުވަހު ބާއްވަން ނިންމައިފައިވާ މި އިންތިހާބުގެ ރަޖިސްޓަރީއަށް ޝަކުވާ ހުށަހެޅުމަށް އެދި ހުޅުވައިލައިފައިވަނީ ބުރާސްފަތި ދުވަހުއެވެ. އިލެކްޝަންސް ކޮމިޝަނުން ބުނާ ގޮތުގައި ޝަކުވާ ހުށަހެޅުމުގެ ފުރުސަތު އަންނަ ހޮނިހިރު ދުވަހާ ހަމައަށް ވަނީ ހުޅުވައިލެވިފައެވެ.
އެ ކޮމިޝަނުން ބުނީ ޝަކުވާ ހުށަހަޅަން ބޭނުންވާނަމަ ޝަކުވާ ހުށަހަޅާނީ "ވޯޓު ދިނުމުގެ ހައްގު ލިބިފައިވާ މީހުންގެ ރަޖިސްޓަރީއާ ބެހޭ ޝަކުވާ ހުށަހަޅާ ފޯމު"އިން ކަމަށާއި އެ ފޯމު އިލެކްޝަންސް ކޮމިޝަނުގެ ރަސްމީ ވެބްސައިޓުން ލިބޭނެ ކަމަށެވެ.
ގުރައިދޫ ދާއިރާގެ ބައި އިލެކްޝަނުގައި ތިން ޕާޓީއަކުން ވާދަކުރެއެވެ. އެއީ ވެރިކަންކުރާ މައި ޕާޓީ، އެމްޑީޕީ އާއި އިދިކޮޅު މައި ޕާޓީ ޕީޕީއެމް އާއި އަދި އެމްއެންޕީއެވެ. ކެންޑިޑޭޓު ނަންބަރު އެކެއް ލިބިވަޑައިގަތީ ޕީޕީއެމްގެ ކެންޑިޑޭޓް ޙުސައިން ރިޒާ އާދަމް އަށެވެ. ކެންޑިޑޭޓް ނަންބަރު ދޭއް އެމްޑީޕީގެ ކެންޑިޑޭޓް އިބްރާހީމް ޝާޒަށް ލިބިވަޑައިގެންނެވިއިރު ކެންޑިޑޭޓް ނަންބަރު ތިނެއް ލިބިވަޑައިގަތީ އެމްއެންޕީގެ ކެންޑިޑޭޓް ޢަލީ ޢަރީފް އަށެވެ.
