މެލޭޝިއާގެ އެއަރލައިނެއްކަމަށްވާ ”ބަޓިކް އެއަރ މެލޭޝިއާ“ އިން ރާއްޖެއަށް ދަތުރުތައް ފަށަން ނިންމައިފިއެވެ.

އެ އެއަރަލއިނުން ވަނީ މިކަން އިއުލާންކޮށް މިހާރު ބުކިންތަކަށް ވެސް ހުޅުވާލައިފައެވެ. އެގޮތުން އެ އެއަރލައިނުން މި ދަތުރުތައް ފެށުމަށް ހަމަޖެހިފައިވަނީ އަންނަ މެއި މަހުގެ 12ގައެވެ. މި ދަތުރުތަކުގައި އެ އެއަރލައިނުން ބޭނުންކުރާނީ 737 މެކްސް 8 މަރުކާގެ ބޯޓެކެވެ.

ބަޓިކް އެއަރ އިން ބުނެފައިވާ ގޮތުގައި ރާއްޖެއަށް ފުރަތަމަ ކުރާނީ ޓްރާންސިޓް ދަތުރުތަކެކެވެ. އެގޮތުން، މެލޭޝިއާގެ ކުއަލަލަމްޕޫރާއި ސްރީލަންކާގެ ކޮލަމްބޯއިން ރާއްޖެއަށް ކޮންމެ ދުވަހަކު ޓްރާންސިޓް ދަތުރު ކުރާނެއެވެ. އެ އެއަރލައިނުން 2015 ވަނަ އަހަރުން ފެށިގެން 2020 ވަނަ އަހަރާއި ހަމައަށް ވަނީ ސްރީލަންކާއަށް ދަތުރުތައް ކޮށްފައެވެ. ނަމަވެސް މިއީ ރާއްޖެއަށް ދަތުރު ފަށާ ފުރަތަމަ ފަހަރެވެ.

މެއި 12 އިން ފެށިގެން ރާއްޖެއަށް ޓްރާންސިޓް ދަތުރުތައް ފަށަން ނިންމާފައިވާއިރު މިއަހަރު ކުއަލަލަމްޕޫރުން ރާއްޖެއަށް ސީދާ ދަތުރުތައް ފެށުމަށް ވެސް ބަޓިކް އެއަރއިން ވަނީ ނިންމާފައެވެ. އެގޮތުން އެ އެއަރލައިނުގެ ވެބްސައިޓުގައި ބުނެފައިވާ ގޮތުގައި މި ދަތުރުތައް ފަށާނީ 23 ޖޫން 2023ގައެވެ.

މެލޭޝިއާއަކީ ކިޔެވުމާއި ސިއްހީ ބޭނުންތަކާއި އަދި އެނޫންވެސް ކަންކަމަށް ގިނަ އަދަދަކަށް ދިވެހިން ދަތުރުކުރާ ޤައުމެކެވެ.

ދުނިޔޭގެ އެކި ޤައުމުތަކުގައި ރާއްޖޭގެ މަގުބޫލުކަން އިތުރުވެ މިހާރު އެކި ޤައުމުތަކުގެ އެއަރލައިންތަކުން އަންނަނީ ރާއްޖެއަށް ދަތުރުތައް ފަށަމުންނެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާ ގޮތުގައި މިހާރު ވެސް ރާއްޖެއަށް ބައިނަލްއަގުވާމީ 35 އެއަރލައިނަކުން އަންނަނީ ދަތުރުތައް ކުރަމުންނެވެ. މީގެ ތެރޭގައި ޑެއިލީ ފްލައިޓުތަކާއި ޗަރޓަރޑް ފްލައިޓުތައް ހިމެނެއެވެ.