ގެސްޓު ހައުސްތަކާއި ސަފާރީތަކަށް އެންމެ ބޮޑު ގޮންޖެހުމަކީ ދަތުރުފަތުރު އަގުބޮޑުވުން: މައުސޫމް
30 މާރިޗު 2023 | ބުރާސްފަތި 17:20އަހަރުގެ ތިންވަނަ ކުއާޓަރަށް ދާއިރު، އަގުތައް ރަނގަޅުވާނެކަމަށް ބެލެވޭކަމަށް މިނިސްޓަރު ވިދާޅުވި
ޓޫރިޒަމް މިނިސްޓަރ، ޑރ. އަބްދުﷲ މައުސޫމް
ރާއްޖޭގެ ގެސްޓު ހައުސްތަކަށާއި ސަފާރީތަކަށް އެންމެ ބޮޑު ގޮންޖެހުމަކީ ދަތުރުފަތުރުގެ އަގުބޮޑުވުންކަމަށް, ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖެ ޓީވީގެ ފަލަސުރުހީ ޕްރޮގްރާމުގައި ބުރާސްފަތި ދުވަހުގެ ރޭ ވާހަކަފުޅުދައްކަވަމުން މައުސޫމް ވިދާޅުވީ، ފަތުރުވެރިކަމުގެ ދާއިރާއަށް އެންމެ ބޮޑު ޗެލެންޖަކަށް އަދިވެސް އޮތީ މަތިންދާބޯޓު ދަތުރުގެ އަގު ބޮޑުވުން ކަމަށެވެ. އެ ވާހަކަ ފަތުރުވެރިކަމުގެ ދާއިރާގެ އެންމެންވެސް ދައްކަން ފަށައިފިކަމަށާއި، މަތިންދާބޯޓު ދަތުރުގެ އަގުތައް ތިރިނުވެގެން އުޅެނީ ކީއްވެތޯ ސުވާލު އުފައްދަމުންދާ ކަމަށެެވެ.
މައުސޫމް ވިދާޅުވީ އެ އަގުތައް ބިނާވަނީ ޑިމާންޑާއި ސަޕްލައިގެ މައްޗަށް ކަމަށެވެ. އޭނާ ވިދާޅުވީ ޑިމާންޑު ވަރަށް މަތިކަމަށާއި ދަތުރުކުރަން ތިބި މީހުންގެ އަދަދުވެސް ގިނަ ކަމަށެވެ. އެހެން ނަމަވެސް، ހުރިހާ ބޯޓުތައް ސަރވިސްއަށް ނުނެރެވޭކަމަށާއި ބޯޓުތަކުގެ ކުރޫއިންވެސް ޕެންޑަމިކްތެރޭގައި "ބަނޑުދަމައިލިގޮތަށް" ހުރިހާ ތާކުން އެ އެންމެންވެސް ނާންނަކަމަށް އޭނާ ވިދާޅުވިއެވެ. އޭނާ ވިދާޅުވީ، ލޮޖިސްޓިކް ދަތިތަކާ ގުޅިގެން ހުރިހާ ފްލީޓްތައް އޮޕަރޭޓް ނުކުރާކަމަށާއި، އޭގެ ސަބަބުން ޑިމާންޑަށް ކޭޓަރ ނުކުރެވޭ ކަމަށެެވެ. އަދި އަގުބޮޑުވާ ސަބަބަކީވެސް އެއީކަމަށް އޭނާ ވިދާޅުވިއެވެ.
