މާލޭގައި 13،000 ކިއުބިކް މީޓަރުގެ 2 ފެންތާންގި ބަހައްޓަނީ
30 މާރިޗު 2023 | ބުރާސްފަތި 05:01މާލެ ސަރަހައްދަށް ފޯރުކޮށްދޭ ފެނުގެ ރައްކާތެރިކަން އިތުރުވާނެ
އެމްޑަބްލިއުއެސްސީގެ އެމްޑީ ހަސަން ޝާހް
މާލޭގައި 13،000 ކިއުބިކް މީޓަރުގެ 2 ފެންތާންގި ބެހެއްޓުމުގެ މަސައްކަތް ކުރަމުންދާކަމަށް މޯލްޑިވްސް ވޯޓަރ އެންޑް ސްވެރޭޖް ކޮމްޕެނީ (އެމްޑަބްލިއުއެސްސީ)ގެ މެނޭޖިންގ ޑިރެކްޓަރ ހަސަން ޝާހް ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ބައިވެރިވެވަޑައިގެން ވާހަކަދައްކަވަމުން ޝާހު ވިދާޅުވީ މިހާރު އެމްޑަބްލިއުއެސްސީން ކުރަމުންދާ އެންމެ މުހިންމު މަސައްކަތަކީ ފެނުގެ ރިޒާވެއް ގާއިމްކުރުމުގެ މަސައްކަތް ކަމަށެވެ.
މިގޮތުން ފެނުގެ ރިޒާވެއް ގާއިމްކުރުމަށް ކުރީގެ އެސްޓީއޯ ރެޑީމިކްސް ބިން ސަރުކާރުން އެ ކުންފުންޏަށް ދީފައިވާކަމަށް ޝާހު ވިދާޅުވިއެވެ. މި ކޮށީގައި 13،000 ކިއުބިކް މީޓަރުގެ 2 ފެންތާންގި ބެހެއްޓުމުގެ މަސައްކަތް ކުރަމުންދާކަމަށާއި، ޑިޒައިނާ އެއްގޮތަށް ޕައިލް ކުރުމުގެ މަސައްކަތް ކުރިއަށްދާކަމަށް ޝާހު ވިދާޅުވިއެވެ.
މި ފެންތާންގިތައް ބެހެއްޓުމުން މާލެ ސަރަހައްދުގެ ރައްޔިތުންނަށް ފޯރުކޮށްދެވޭ ފެނުގެ ރައްކާތެރިކަން އިތުރުވާނެކަން ޝާހު ފާހަގަކުރެއްވިއެވެ. އަދި މެދުނުކެނޑި ފެން ލިބޭނެކަން ޔަގީންކުރުމަށް އިތުރު ބެކްއަޕް ތަކެއްވެސް ގާއިމްކުރެވިފައިވާކަން ޝާހު ފާހަގަކުރެއްވިއެވެ.
މީގެ އިތުރުން އިއާދަކުރަނިވި ހަކަތަ ބޭނުންކޮށްގެން ފެން އުފެއްދޭނެ ނިޒާމެއް ގާއިމްކުރުމުގެ މަސައްކަތްވެސް ކުރިއަށްދާކަމަށް ޝާހު ވިދާޅުވިއެވެ. މިހާރު އޮތް ގާނޫނުގައި ކުރިއަށްއޮތް 5 އަހަރު ދުވަހުގެ ތެރޭގައި ފެން އުފައްދައި ޑީސެލިނޭޝަން ޕްލާންޓުތައް ހިންގަންވާނީ އިއާދަކުރަނިވި ހަކަތައިންކަމަށް ބަޔާންކޮށްފައިވާކަމަށް ޝާހު ވިދާޅުވިއެވެ.
މިކަމަށް ތައްޔާރުވުމަށް ގުޅީފަޅުގައި 1.5 މެގަވޮޓުގެ އިއާދަކުރަނިވި ހަކަތައިން ކަރަންޓު އުފެއްދޭނެ ނިޒާމެއް ގާއިމްކުރުމުގެ މަސައްކަތް ކުރިއަށްދާކަމަށް ޝާހު ވިދާޅުވިއެވެ. ޖަޕާނުގެ ކުންފުންޏަކާއި ދިވެހި ކުންފުންޏަކާ ގުޅިގެން މި މަސައްކަތް ކުރިއަށްގެންދާކަން އޭނާ ވަނީ ފާހަގަކުރައްވާފައެވެ.
