އާރޯ ފެނުގެ 330 އެމްއެލް ފުޅި އުފެއްދުމުގެ ވިސްނުން އެބަހުރި - ޝާހް

އާރޯ ފެނުގެ 330 އެމްއެލް ފުޅި އުފެއްދުމުގެ ވިސްނުން އެބަހުރިކަމަށާއި، އެކަމަށް މަސައްކަތްކުރަމުން އަންނަކަމަށް, އެމްޑަބްލިއުއެސްސީގެ މެނޭޖިންގ ޑިރެކްޓަރ ހަސަން ޝާހް ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމުގައި ވާހަކަފުޅުދައްކަވަމުން ޝާހް ވިދާޅުވީ އެމްޑަބްލިއުއެސްސީން އުފައްދަން ފެށީ އާރޯ ފެނުގެ 1 ލީޓަރާއި 500 އެމްއެލްގެ ފެން ފުޅި ކަމަށެވެ. އަދި މި ފުޅިތައް އެސްޓީއޯ ސުޕަރމާޓް، އެމްއޭސީއެލްގެ ލައުންޖުފަދަ ތަންތަނުން ލިބެން ހުންނާނެކަމަށާއި، އުރީދޫއާއި ބޮޑެތި އެހެން ކުންފުނިތަކުންވެސް ފެން ހޯދުމަށް އެދިގެން އަންނަ ކަމަށެވެ. އަދި އާރޯގެ 330 އެމްއެލްގެ ފެން ހޯދުމަށް ލައުންޖުތަކާއި، ރެސްޓޯރެންޓް އަދި ރިސޯޓްތަކުންވެސް ރިކުއެސްޓް އަންނަ ކަމަށާއި، އެހެންކަމުން އެ ދިމާއަށް ވިސްނުން ބަހައްޓައިގެން އެ މަސައްކަތް ކުރުމަށް މެނޭޖްމަންޓުން މަސައްކަތް ކުރަމުން ދާ ކަމަށެވެ.

ޝާހް ވިދާޅުވީ އާރޯ ފެންނަށް ޑިމާންޑް އެބައޮތް ކަމަށެވެ. އެހެންނަމަވެސް ފެން އުފައްދާއިރު ފެނުގެ ކޮލިޓީއާމެދު ޔަގީންކަން ދޭން ބޭނުންވާކަމަށާއި، ކޮލިޓީގެ ކިރިޔާވެސް ޝައްކެއް އުޅޭނަމަ މާކެޓަށް އެ ނުނެރޭނެ ކަމަށެވެ. ބިއްލޫރި ފުޅި އުފެއްދުމަށްޓަކައި ކުންފުނިން ގާތްގަނޑަށް 60 މިލިއަނަށްވުރެ ގިނަ ރުފިޔާ ހަރަދުކޮށް، އިޓަލީގެ މެޝިންތައް ރާއްޖެ ގެނެސްފައިވާ ކަމަށްވެސް އޭނާ ވިދާޅުވިއެވެ. އަދި މި ބޮޓެލިން ލައިނަކީ ފްލޭވަރޑް ބުއިންތައްވެސް އުފެއްދޭނެ، އަދި އެހެން ސައިޒްގެ ފެންވެސް އުފެއްދޭނެ ލައިނެއްކަމަށާއި، މި ލައިނުން ގަޑިއަކު 2000 ފުޅި އުފެއްދޭނެ ކަމަށެވެ.

ޝާހް ވިދާޅުވީ ޑިމާންޑާ އެއްވަރަށް ފެން ނުއުފެއްދޭ ކަމަށާއި، ބިއްލޫރި ފުޅިއަކީ ބޭރުން ގެންނަންޖެހޭ ފުޅިއެއްކަމުން، މާކެޓަށް ނެރުމުގައި ދަތިތަކެއް އެބަހުރި ކަމަށެވެ. އެހެންކަމުން އެކަން ހައްލުކުރުމަށް މަސައްކަތްކުރަމުން ގެންދާކަމަށް ވިދާޅުވިއެވެ.

ޝާހް ވިދާޅުވީ އާރޯ ފެނަކީ އެމްޑަބްލިއުއެސްސީގެ މުވައްޒަފުން ވަރަށް ބޮޑަށް ފަހުރުވެރިވާނެ ފެނެއް ކަމަށެވެ. އެއީ އާރޯ ފެނުގެ ރަހަތައް ތައްޔާރުކޮށްފައިވަނީ އެމްޑަބްލިއުއެސްސީގެ ލެބޯޓަރީގައި، ދިވެހިންނަށް ކަމުދާ ރަހަ އެކުލެވޭގޮތަށް، އެއަށް ބޭނުންވާ މިނެރަލްސް އަދި ސާމާނު ހިމަނައިގެން ކަމަށެވެ. އަދި އާރޯ ފެން އުފެއްދުމުން ފެށިގެން ގޮސް މާކެޓިންގއާއި އަދި ލޭބަލްކުރުމާ ހަމައަށްވެސް މަސައްކަތްކޮށްފައި ވަނީ ދިވެހިންކަމަށް ޝާހް ވިދާޅުވިއެވެ.