އެއްބަސްވުން އައުކުރުމާ ގުޅޭ ގޮތުން އޮލީވިއޭ ޖިރޫޑުގެ އެޖެންޓް އެ ކުލަބާއެކު މަޝްވަރާ ކުރަން ފަށައިފި އެވެ.

އުމުރުން 36 އަހަރުގެ ފޯވާޑް އޭސީ މިލާނަށް ބަދަލުވީ 2021 ވަނަ އަހަރު އެވެ. ޗެލްސީ ދޫކޮށް ޖިރޫޑް އޭސީ މިލާނަށް ބަދަލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެ ކުލަބާއެކު އޭނާ ހަދާފައިވާ އެއްބަސްވުމުގެ މުއްދަތު ހަމަވާނީ މިއަހަރުގެ ޖޫން މަހުގެ ނިޔަލަށެވެ. އެހެންކަމުން ޖިރޫޑް ބޭނުންވަނީ އޭސީ މިލާނާއެކު ހަދާފައިވާ އެއްބަސްވުމުގެ މުއްދަތު އިތުރު ކުރުމަށެވެ. އެކަމުގެ މަޝްވަރާތައް މީގެ ކުރިން ޖިރޫޑު ވެސް ވަނީ އެ ކުލަބާއެކު ކޮށްފަ އެވެ.

އިޓަލީގެ މީޑިއާތަކުގައި ބުނެފައިވާ ގޮތުން ޖިރޫޑުގެ އެޖެންޓް ވަނީ ބުދަ ދުވަހުގެ ވަގުތެއްގައި އޭސީ މިލާންގެ ބޯޑާއެކު ބައްދަލުވުމެއް ބާއްވައިފަ އެވެ. އެ ބައްދަލުވުމަކީ އައު އެއްބަސްވުމުގެ މަޝްވަރާތައް ކުރުމާއި، އެއްބަސްވުމުގައި ސޮއިކުރާނެ މުއްދަތަކާ ގުޅޭ ގޮތުން މަޝްވަރާކުރުމަށް ބޭއްވުނު ބައްދަލުވުމެއް ކަމަށް ވެސް ރިޕޯޓުތައް ބުނެ އެވެ. މުސްތަޤުބަލާ ގުޅޭ ގޮތުން މީގެ ކުރިން ޖިރޫޑު ބުނެފައިވަނީ، އޭނާ ބޭނުންވަނީ ކުލަބުގައި މަޑު ކުރަން ކަމަށާއި، ކެރިއަރު ނިންމާލަން ވެސް ބޭނުންވަނީ އޭސީ މިލާނުން ކަމަށެވެ. މީގެ އިތުރުން ޖިރޫޑ ބުނީ އަދިވެސް އޭނާ ބޭނުންވަނީ އޭސީ މިލާނާއެކު ހޯދެން ހުރި ހުރިހާ ކާމިޔާބެއް ހޯދަން ކަމަށެވެ.

އޭސީ މިލާނަށް ބަދަލުވެ ޖިރޫޑް ވަނީ މިހާތަނަށް އެ ކުލަބަށް ކުޅެދިން 72 މެޗުގައި 26 ލަނޑު ޖަހައިފަ އެވެ. އޭނާ ވަނީ އެ ކުލަބާއެކު 22-2021 ވަނަ ސީޒަންގެ އިޓާލިއަން ލީގު ކާމިޔާބުކޮށްފަ އެވެ. ފްރާންސްގެ ޤައުމީ ޓީމަށް ވެސް ކުޅެމުން އަންނަ ޖިރޫޑް އަންނަނީ މިހާރު ވެސް މޮޅު ކުޅުމެއް ދައްކަމުންނެވެ. މިދިޔަ އަހަރު ޤަތަރުގައި ނިމުނު ވޯލްޑް ކަޕްގައި އޭނާ ވަނީ ފްރާންސްގެ ތިއެރީ އޮންރީ ހަދާފައިވާ ރެކޯޑެއް ވެސް މުގުރާލާފަ އެވެ. އެއީ ފްރާންސް ޤައުމީ ޓީމަށް އެންމެ ގިނަ ލަނޑު ޖަހައިދިން ކުޅުންތެރިޔާގެ ރެކޯޑެވެ. ޖިރޫޑް ވަނީ ޤައުމީ ޓީމަށް ކުޅެދިން 122 މެޗުގައި 53 ލަނޑު ޖަހައިފަ އެވެ.