ސަރުކާރާއެކު މަސައްކަތް ކުރަން ބޭނުންވާ ގިނަ ބަޔަކު މިރޭ 12:00 ގެ ކުރިން ޖުމްހޫރީ ޕާޓީން ވަކިވާނެ ކަމުގެ މައުލޫމާތު ލިބިފައިވާ ކަމަށް ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު މުޙައްމަދު ރާއީ ވިދާޅުވެއްޖެއެވެ.

ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން ރާއީ ވިދާޅުވީ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ވެރިކަމުގައި ހަމަޖެހިގެން އުޅުމުގެ ފުރުސަތު ލިބިލެއްވި ކަމަށް ޖުމްހޫރީ ޕާޓިގެ ލީޑަރު ގާސިމް އިބްރާހިމް ވިދާޅުވުމަށްފަހު ޖޭޕީ ވަކިން ކުރިއަށް އޮތް ރިޔާސީ އިންތިޚާބުގައި ވާދަ ކުރަން ނިންމެވި ނިންމެވުމާ މެދު ސުވާލު އުފެދޭ ކަމަށެވެ. އަދި ގާސިމް ކެންޑިޑެންސީ ހުށަހެޅުމާއެކު ވެގެންދާނެ ގޮތަކާ މެދު ވިސްނުން މުހިންމު ކަމަށް ވެސް އޭނާ ވިދާޅުވިއެވެ.

ރާއީ ވިދާޅުވި ގޮތުގައި އަރިހުގައި ތިއްބެވި، އިލްމީ ގާބިލު ބޭފުޅުން މިހާރު ވެސް ޖޭޕީއާ ވަނީ ވަކިވެފައެވެ. އަދި މިނިސްޓަރުންނާއި ސަރުކާރުގެ އިސް މަގާމުތައް ހިމެނޭހެން ގިނަ ބަޔަކު މިރޭ ޕާޓީން ވަކުވާނެ ކަމުގެ މައުލޫމާތު ލިބިފައިވާ ކަމަށާއި އެ ފަރާތްތަކުން ޖޭޕީއިން ވަކިވަނީ ސަރުކާރާއެކު މަސައްކަތް ކުރަން ބޭނުންވާތީ ކަމަށް ވެސް އޭނާ ވިދާޅުވިއެވެ.

ސަރުކާރުގެ އެކި މަގާމުތަކުގައި ޖޭޕީގެ ސްލޮޓުތަކުގައި ބޭފުޅުން ތިބިކަން ފާހަގަކުރައްވައި ރާއީ ވިދާޅުވީ ގާސިމް ވިސްނާލައްވަންވީ ޤައުމާއި އެ ފަރާތްތަކުގެ މުސްތަގުބަލާމެދުގައި ކަމަށެވެ.

ޖޭޕީއާ ނުލައި ވެސް ކުރިއަށް އޮތް ރިޔާސީ އިންތިޚާބު ކާމިޔާބު ކުރެވޭނެކަމަށް ވިދާޅުވެ ރާއީ ވިދާޅުވީ ނަމަވެސް އެކަން ކުރުމުގައި އުނދަގޫތަކެއް ހުންނާނެ ކަމަށެވެ. އެހެންކަމުން ގާސިމް ސަރުކާރާ ގުޅިގެން މަސައްކަތް ކުރައްވައި މިއަހަރުގެ ރިޔާސީ އިންތިޚާބު ފަސޭހަކަމާއެކު ކާމިޔާބު ކުރެއްވުމަށް ރާއީ ދައުވަތު ދެއްވިއެވެ.