ޕާކިސްތާނު ނުތަނަވަސްކަމުގެ ތެރޭގައި: "އަހަރަމެންގެ ޝަކުވާ އަހާނެ މީހަކު ނެތް"

ބަރަކާތްތެރި ރަމަޟާން މަހާއެކު ދިރިއުޅުމުގެ އާދަތަކަށް އަންނަ ބޮޑު ބަދަލާއެކު، ގަނޑުކޮށް ވިޔަފާރި ކުރުމުގެ ޘަޤާފަތެއް އުފެދިފައި އޮތް އެއް ޤައުމަކީ އަވަށްޓެރި ޕާކިސްތާނެވެ. މަހަށް ވާ ވަރަށް ކާބޯތަކެއްޗާއި ޛަރޫރީ ސާމާނު، ގޭބިސީތަކަށް ހަމަ ކުރުމަށް ބާޒާރުތަކުގައި މީހުން ހޭލަމޭލައަށް އުޅޭތީ ކޮންމެ އަހަރަކުމެހެން ފެނެއެވެ.

ނަމަވެސް، މި ފަހަރު ފެންނަ މަންޒަރު، ހިސާބަކަށް ތަފާތެވެ. އިސްލާމްއާބާދާއި ކަރާޗީގެ ރަށްވެހިންނަށް މިއަދު އުފުލަން ޖެހިފައިވަނީ، ބާޒާރުތަކުގައި ތަކެތީގެ އަގުތައް އުފެލެމުން ދާ ކަމުގެ ބުރައެވެ. މިއިން ދުވަހަކު ނުދެކޭ ދަރަޖައަށް މުދަލުގެ އަގުތައް އުފުލިފައި ވާ އިރު، މި ދަނޑިވަޅަކީ، އިޤްތިޞާދީ ހީނަރުކަމާ ކުރިމަތިވެ، އިޤްތިޞާދު މަޑުޖެހެމުންދާ ދަނޑިވަޅެއްވެސްމެއެވެ.

ޕާކިސްތާނުގެ ވިޔަފާރި މަރުކަޒީ ރަށް ކަމަށްވާ ކަރާޗީގެ ގެއެއްގައި ގެންގުޅޭ މީހެއްގެ ގޮތުގައި މަސައްކަތް ކުރާ ސަލްމާ ބިބީގެ ވާހަކަތަކުން، އާންމު ރައްޔިތުންގެ ހިތުގައި އުފެދިފައިވާ ނުތަނަވަސްކަން ކިތަންމެހާވެސް ރަނގަޅަކަށް އެނގިގެންދެއެވެ.

1444 ވަނަ އަހަރުގެ ރަމަޟާން މަހާ ޕާކިސްތާނުން ކުރިމަތިލީއިރު، އެ ޤައުމު އޮތީ، ބައިނަލްއަޤުވާމީ މާލީ އިދާރާ (އައިއެމްއެފް)އިން ފޯރުކޮށްދޭ 1.1 ބިލިއަން ޑޮލަރުގެ ބެއިލްއައުޓް ޕެކޭޖު ނުވަތަ މާލީ އެހީގެ އިންތިޒާރުގައެވެ.

އައިއެމްއެފްގެ ބެއިލްއައުޓް ޕެކޭޖު ކަށަވަރު ކުރުމަށްޓަކާ، ޕާކިސްތާނުގެ ސަރުކާރުން ވަނީ އެ އިދާރާއިން ކަނޑައެޅި މުހިންމު ފިޔަވަޅުތަކެއް އަޅާފައެވެ. އެގޮތުން ހަކަތައާއި އެކްސްޕޯޓް އަދި ދަނޑުވެރިކަމުގެ ސިނާއަތުން ސަބްސިޑީޒް ކަނޑާލިއެވެ. ނަތީޖާއެއްގެ ގޮތުން، ހަކަތައާއި ތެލުގެ އަގުތައް އުފުލި، ކަރަންޓުގެ ޚިދުމަތުން ނަގާ ސަރޗާޖު ދާއިމީ ގޮތަކަށް އުފުލުނެވެ. އަދި ބޭރު ފައިސާ ގަނެވިއްކާ އަގުތަކަށް ބަދަލު އައިސް، ސަޕްލިމެންޓްރީ ބަޖެޓެއްގެ މަންޒަރުވެސް ފެނިގެންދިޔައެވެ.

ޕާކިސްތާނުގެ އިޤްތިޞާދީ މާލީ ނިޒާމަށް ގެނައި ބަދަލުތަކާއެކު، އެ ޤައުމުގެ އިންފްލޭޝަން ރޭޓް ވަނީ ބައި ޤަރުނުގެ ތެރޭގައި ނުދެކޭ މިންވަރަށް މައްޗަށް އަރާފައެވެ. ފެބުރުއަރީ މަހު، ޕާކިސްތާނުގެ އިންފްލޭޝަން ރޭޓް ވަނީ 31.5 ޕަސެންޓަށް އަރާފައެވެ.

އިޤްތިޞާދީ ތަކުލީފުތަކުގެ ވާހަކަ މިފަދަ ގޮތަކަށް ހުރިއިރު، ސިޔާސީ މަސްރަޙުގައިވެސް އޮތީ ހަލަބޮލިކަމާއި ނުތަނަވަސްކަމެވެ. ކުރީގެ ބޮޑުވަޒީރު އިމްރާން ޚާންގެ ސަޕޯރޓަރުންނާއި ސަލާމަތީ ބާރުތަކާ ދެމެދު އުފެދިފައިވާ ނުތަނަވަސްކަން އިންތިހާއެވެ. ޝަރުޢީ މައިދާނުގައި އިމްރާން ޚާން ހަނާ ކުރުމުގެ މަސައްކަތްވެސް ކުރިއަށް ދަނީ ބާރު ދުވެލީގައެވެ. މިދިޔަ އަހަރުގެ ކުރީކޮޅު، ޤާނޫނު ހަދާ މަޖިލީހުގައި ނެގި ވޯޓަކުން މަޤާމުން ދުރުކޮށްފައި ވާ އިމްރާން ޚާންއާ ދެކޮޅަށް އުފުލާފައުވާ ދަޢުވާތަކަށް، ކުރީގެ ކުރިކެޓް ތަރި އިންކާރު ކުރައްވައެވެ.

އިސްލާމްއާބާދު ހޯލްސޭލް ޑިލަރޒް ވެލްފެއަރ އެސޯސިއޭޝަންގެ ޖެނެރަލް ސެކްރެޓަރީ ސަޢީދު ޒާކިރު ޝާހް ފާހަގަ ކުރި ގޮތުގައި، ޕާކިސްތާނުގެ ސިޔާސީ މަސްރަހުގައި އުފެދިފައިވާ ތަޅާފޮޅުންތަކުގެ އަގު އަދާ ކުރާ ބަޔަކީ އެ ޤައުމުގެ އާންމު ރައްޔިތުންނެވެ.

ޢުމުރުފުޅުން 70 އަހަރުގެ އިމްރާން ގެންދަވަނީ ޕާކިސްތާނުގައި އަވަސް އިންތިޚާބެއް ބޭއްވުމަށް ގޮވާލައްވަމުންނެވެ. އަދި ޤައުމުގެ އެކި ހިސާބުތަކުގައި މުޒާހަރާތައްވެސް ކުރިއަށް ގެންދަވަމުންނެވެ. ކަން މިހެން އޮތް ނަމަވެސް، އަދުގެ ބޮޑުވަޒީރު ޝަހްބާޒް ޝަރީފު ވަނީ، އިމްރާންގެ ޑިމާންޑްތަކަށް ފުރަގަސް ދެއްވާފައެވެ. ޝަހްބާޒް ވިދާޅުވާ ގޮތުގައި، އިންތިޚާބު އޮންނާނީ ތާވަލާ އެއްގޮތަށް، މިއަހަރުގެ ފަހުކޮޅުގައެވެ.