މިއީ އިންތިހާ ނުތަނަވަސްކަން ފެތުރިފައިވާ ފަލަސްޠީނުގެ ޣައްޒާގައި ދިރިއުޅެމުންދާ، ޢުމުރުން އެންމެ 20 އަހަރުގެ މުޙައްމަދު މުސްރާންގެ ވާހަކައެވެ. ނަރުސްކަން ކިޔަވަމުންދާ ދަރިވަރު، މުސްރާންގެ މޫނަކީ، މިއަދު ޣައްޒާގެ މަގުތަކަށް ފަރިތަ މޫނެކެވެ. ސަބަބެއް ނެތިއެއް ނޫނެވެ. ދީނީ ޝިޢާރުތައް ހިމެނޭހެން ތައްޔާރުކޮށްފައިވާ މަދަހައާއި ޘަނާތަކަށް ބެރުގެ ބުން އަޑު ހަމަ ކުރަމުން، މަގުތަކުގައި އޭނާ ހިނގަމުން ދަނީ، ރަމަޟާން މަހުގެ ރޯދައާ ގުޅިފައިވާ ސުހޫރުގެ ސުންނަތް ނުވަތަ ހާރު ދަމަށް މީހުން ހޭލެއްވުމަށެވެ.

ފޯރިއާ ޖޯޝުގައި މިކަން ކުރިއަށް ގެންދިއުމަށް މުސްރާންއަށް ލިބޭ ހިތްވަރަކީ، އޭނާގެ މަދަހަ ޘަނާއާއި ބެރުގެ އަޑު އިވޭ މީހުންގެ މޫނުމަތިން ފެންނަމުންދާ ހިތްގައިމު ހިނިތުންވުމެވެ. މުސްރާންއަކީ 5 މެންބަރުންގެ ގުރޫޕުގެ އެއް މެންބަރެވެ. "މުސާޙިރާތީ"ގެ ނަމުގައި ހަރަކާތްތެރިވާ އެ ގުރޫޕުން މި މަސައްކަތް ކުރާތާ މިއީ 2 ވަނަ އަހަރެވެ.

ގުރޫޕުގައި ހިމެނޭ، 23 އަހަރުގެ އަހުމަދު ދަހްލާން ބުނި ގޮތުގައި މިއީ ޒަމާނުއްސުރެ ހާރަށް ޖަހާ އުޅުނު ދަންބެރުގެ ޘަޤާފަތާ ތަފާތު ގޮތަކަށް ޖަހާ ބެރެކެވެ. އެގޮތުން "މުސާޙިރާތީ"އިން ދީނީ ޝިޢާރުތައްވެސް ހުށަހަޅާދެމުންދާ ދިއުމަކީ، ތަފާތެއްގެ ގޮތުގައި އޭނާ ވަނީ ފާހަގަ ކޮށްފައެވެ.

ތަހާނީ ޞާބިރަކީ ޚާން ޔޫނިސްގެ ރަށްވެއްސެކެވެ. އޭނާ ދިރިއުޅެމުންދާ ގޭއާ މާ ދުރު ނޫން ހިސާބެއްގައި މަޑުކޮށްލައިގެން އިނީ ކުރިއަށް އޮތް ދުވަހުގެ ރޯދައިގެ ކުރިން ހާރު ކާށެވެ. ހާރު ކާން އިނދެ، މީޑިއާއާ ވާހަކަދައްކަމުން ތަހާނީ ބުނީ، މި ފަހަރުގެ ރަމަޟާން މަހަކީ އޭނާގެ ސިޓީއަށް ތަފާތު މައްސަރެއް ކަމަށެވެ. އެގޮތުން ކުލަ ބޮކިތަކުން ސިޓީ ޖަރީ ކުރުމާއި، އުފާވެރި ވަޤުތުތަކެއް ހިއްސާ ކުރުމަށް، އަވަށު މީހުން އެއްތަނަކަށް ޖަމާވެ އުޅުން ފަދަ ކަންކަން ކުރެވެމުންދާކަން ތަހާނީ ވަނީ ފާހަގަ ކޮށްފައެވެ.

ކޮންމެ އަހަރެއްގެވެސް ރަމަޟާން މަހަކީ، ޔަހޫދީ އިޒްރޭލުން ފަލަސްޠީނަށް އަމާޒުކޮށްގެން ދެމުންދާ ހަމަލާތައް ވަރުގަދަ ކުރާ ދުވަސްވަރަކަށް އޮންނަނީ ވެފައެވެ. މިހާރުވެސް އެކަމުގެ ކޮޅުމަތި ވަނީ ފެންނަން ފަށާފައެވެ. ނަމަވެސް މުސްރާންއާއި ތަހާނީ ފަދަ ރައްޔިތުން އަދިވެސް ތިބީ ސާބިތު ކަމާއެކީގައެވެ.