ފަސް އަހަރަށްވުރެ ގިނަ ދުވަސްވީ އުޅަނދުތައް އެތެރެ ނުކުރެވޭ ގޮތް ހަދަނީ
މައްސަލައަށް އޮތް ހަމައެކަނި ހައްލަކީ އެކްސްޕޯޓް އިމްޕޯޓުގެ ޤާނޫނަށް އިޞްލާހު ގެނައުން
ގިނަ ދުވަސްވީ އުޅަނދުތަކެއް
ފަސް އަހަރަށްވުރެ ގިނަ ދުވަސްވެފައިވާ އެއްވެސް އުޅަނދެއް ރާއްޖެއަށް އެތެރެނުކުރެވޭނެގޮތަށް ޤާނޫނަށް އިޞްލާހު ގެނައުމަށް ހުށަހަޅުއްވާފައިވާކަމަށް މިނިސްޓަރ އޮފް ޓްރާންޕޯޓް އެންޑް ސިވިލް އޭވިއޭޝަން އާއިޝަތު ނަހުލާ ވިދާޅުވެއްޖެއެވެ.
ރައްޔިތުންގެ މަޖިލީހުގެ ޤަވާއިދު ކޮމިޓީގައި އަންގާރަ ދުވަހު ވާހަކަފުޅު ދައްކަވަމުން ނަހުލާ ވިދާޅުވީ އެއްގަމު އުޅަނދުތައް އެއްވެސް ކޮންޓްރޯލެއް ނެތި އެތެރެ ކުރުމުގެ ސަބަބުން ގަރާޖުގެ މައްސަލަ އެންމެ ބޮޑީ މާލެ ސަރަހައްދުގައި ކަމަށެވެ.
އެ މައްސަލައަށް އޮތް ހަމައެކަނި ހައްލަކީ އެކްސްޕޯޓް އިމްޕޯޓުގެ ޤާނޫނަށް އިޞްލާހު ގެނައުންކަން ފާހަގަކުރައްވާ ނަހުލާ ވިދާޅުވީ އެއްގަމު އުޅަނދެއް ރާއްޖެ އެތެރެކުރުމަށް މިހާރުގެ ޤާނޫނުން އެއްވެސް މީހަކަށް އެއްވެސް ހުރަހެއް ނެތްކަމަށެވެ. އަދި އެތެރެކުރާ އުޅަނދުތައް ރަޖިސްޓްރީކޮށްދިނުން ޓްރާންސްޕޯޓް މިނިސްޓްރީއަށް ޤާނޫނުން ލާޒިމްކަމަށް ވެސް ވިދާޅުވިއެވެ. އެކަންކަން ހައްލުކުރުމުގެ ގޮތުން އެކްސްޕޯޓް އިމްޕޯޓް ޤާނޫނަށް އިޞްލާހު ގެނައުމަށް ހުށަހަޅުއްވާފައިވާކަމަށް ވިދާޅުވިއެވެ.
މިނިސްޓަރ ވިދާޅުވީ އެއްގަމު އުޅަނދުތަކުގެ ޢުމުރު ކަނޑައެޅުން ހިމެނޭހެން ތަފްސީލީ ކަރުދާހެއް ވަޒީރުންގެ މަޖިލީހަށް ހުށައަޅުއްވާފައިވާނެކަމަށެވެ. މިނިސްޓަރ ވިދާޅުވީ، މާލެއަށް އުޅަނދުތައް ތޮއްޖެހުން ހައްލުކުރުމުގެ ގޮތުން ފަސް އަހަރު ވެފައިވާ އެއްގަމު އުޅަނދު ރާއްޖެ އެތެރެ ނުކުރެވޭނެގޮތަށް ބަދަލު ގެނައުމުގެ މަސައްކަތް ކުރައްވަމުން ގެންދަވާ ކަމަށެވެ.
ނަހުލާ އިތުރަށް ވިދާޅުވީ މާލެއަށް ވެހިކަލް ތޮއްޖެހުން ހައްލުކުރެވޭނެ އަނެއް ގޮތަކީ އަހަރެއްގެ މައްޗަށް އެތެރެކުރެވޭނެ އުޅަނދުތަކުގެ ޢަދަދު ކަނޑައެޅުން ކަމަށެވެ. މިނިސްޓަރ ވިދާޅުވީ ރާއްޖެއަށް އެތެރެކުރެވޭނެ އުޅަނދުތަކުގެ އަދަދު ކަނޑައެޅުމުގެ ކުރިން ޕަބްލިކް ޓްރާންސްޕޯޓް ނިޒާމް ހަރުދަނާކުރަން ޖެހޭ ކަމަށެވެ.
