ރަންތާޖު ޤުރުއާން މުބާރާތުގެ ބައިވެރިންނަށް ކުރުނބާ މޯލްޑިވްސްގެ ފަރާތުން ޚާއްސަ ރޯދަވީއްލުމެއް ދީފިއެވެ.
އަންގާރަ ދުވަހު ދިން މި ރޯދަ ވީއްލުމަކީ ރަންތާޖު ޤުރުއާން މުބާރާތުގެ ބައިވެރިންނަށް ލިބުނު މިފަދަ ފުރަތަމަ ދައުވަތެވެ. އަދި ރަންތާޖުގެ ބައިވެރިންނަށް ރިސޯޓުގެ ފަރާތުން ހޫނު މަރުހަބާ އެއް ކިޔާފައިވާއިރު، އެ ރޯދަ ވީއްލުމުގެ ހުރިހާ އިންތިޒާމެއް ވެސް ވަރަށް ފުރިހަމައެވެ.
މިރޯދަ ވީއްލުމާއި ގުޅޭގޮތުން ކުރުނބާ މޯލްޑިވްސްގެ ޖެނަރަލް މެނޭޖަރު އެެންޑްރޫ ޖެންސަން ވަނީ ދައުވަތު ގަބޫލުކުރެއްވީތީ ރާއްޖެޓީވީއަށް ޚާއްސަ ޝުކުރެއް ދަންނަވާފައެވެ. އަދި ޤުރުއާން މުބާރާތުގެ ބައިވެރިންނަށް ޚިދުމަތް ކުރުމުގެ ފުރުސަތު ލިބުމަކީ ލިބޭ ވަރަށް ބޮޑު އުފަލެއް ކަމަށް އެެންޑްރޫ ޖެންސަން ވިދާޅުވިއެވެ.
ކުރުނބާ މޯލްޑިވްސްއަށް މަރުހަބާ. އަޅުގަނޑުމެން ވަރަށް އުފަލާއެކު ބައިވެރިންނަށް ދައުވަތު އަރުވަން. އަޅުގަނޑުމެން ވަރަށް ފަހުރުވެރިވެ ޝަރަފުވެރިވޭ ކޮންޕެޓިޝަންގެ ބައިވެރިން އަޅުގަނޑުމެންނާއެކު މިއަދު ހޯސްޓް ކުރާތީކުރުނބާ މޯލްޑިވްސްގެ ޖެނަރަލް މެނޭޖަރު އެެންޑްރޫ ޖެންސަން
20 ބައިވެރިންނާއެކު ކުރިއަށްގެންދާ ރަންތާޖު ޤުރުއާން މުބާރާތުގެ ފުރަތަމަ އެޕިސޯޑް ހުކުރު ދުވަހުގެ ރޭ ވަނީ ކުރިއަށް ގެންގޮސްފައެވެ. އަދި 2 ވަނަ އެޕިސޯޑްގައި 5 ބައިވެރިން އެލިމިނޭޓް ވާނެއެވެ.
ރަންތާޖު ޤުރުއާން މުބާރާތަކީ ރާއްޖެ ޓީވީ، މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓާއި އަދި އިސްލާމިކް މިނިސްޓްރީ ގުޅިގެން ކުރިއަށްގެންދާ މުބާރާތެކެވެ.
16 އަހަރާއި 45 އަހަރާ ދެމެދުގެ އުމުރުފުރާގެ ފަރާތްތަކަށް ހުޅުވާލެވިފައިވާ މި މުބާރާތަކީ 3 ލައްކަ ރުފިޔާގެ އިނާމަކާއެކު ކުރިއަށްގެންދާ މުބާރާތެކެވެ. މުބާރާތުގެ ފައިނަލް 20 ބައިވެރިން ހޮވާފައި ވަނީ މި މުބަރާތުގެ އޮޑިޝަންގައި ބައިވެރިވި 111 ބައިވެރިންގެ ތެރެއިންނެވެ. ރާއްޖެ ޓީވީއިން މި މުބާރާތް ގެނެސްދޭނީ ރަމަޟާންމަހުގެ ކޮންމެ ހުކުރު ދުވަހެއްގެ ރޭ 9:30ގައެވެ. މި މުބާރާތުގެ ފަނޑިޔާރުންނަކީ އަލްޤާރީ އިބްރާހިމް ޝިފާއުއާއި އަލްޤާރީ މުހައްމަދު ތައުފީގާއި އަލްޤާރީ އަބްދުލް ވާހިދު އަބްދުﷲ، އަދި އައްޝައިޚް ނަސްރުﷲ އަލީއެވެ.
