ވަޒީފާއާބެހޭ ގާނޫނުގައި ބަޔާންކޮށްފައިވާ ރޯދަ އިނާޔަތް ނުލިބޭނަމަ ލޭބަރ ރިލޭޝަންސް އޮތޯރިޓީއަށް ޝަކުވާ ހުށަހެޅުމަށް ހުޅުވާލައިފިއެވެ.

ލޭބަރ ރިލޭޝަންސް އޮތޯރިޓީން މިއަދު އެދިފައިވަނީ ގާނޫނާ އެއްގޮތަށް ރޯދަ މަހުގެ އިނާޔަތް ލިބިފައިނުވާނަމަ އެ އޮތޯރިޓީއަށް ޝަކުވާ ހުށަހެޅުމަށެވެ. ޝަކުވާ ހުށަހެޅުމަށް އެ އޮތޯރިޓީގެ ވެބްސައިޓުން ނުވަތަ އެ އޮތޯރިޓީއަށް ގޮސްގެން ފޯމު ހުށަހެޅުމަށް ވަނީ އެދިފައެވެ.

މާރިޗު މަހުގެ ކުރީކޮޅު ލޭބަރ ރިލޭޝަންސް އޮތޯރިޓީން ވަނީ، ވަޒީފާއާބެހޭ ގާނޫނުގައި ބަޔާންކޮށްފައިވާގޮތުގެ މަތިން، ރޯދަ މަސް ފެށުމުގެ ކުރިން ދިވެހި ކޮންމެ މުވައްޒަފަކަށް 3000 ރުފިޔާ ދޭންވާނެކަމަށް ބުނެ، ރޯދަ އިނާޔަތް ދިނުމަށް ހަނދާންކޮށްދީފައެވެ. އަދި ވަޒީފާ ދޭ ބައެއް ފަރާތްތަކުން މުވައްޒަފުންނަށް ރޯދަމަހުގެ އިނާޔަތް ނުދޭކަމާއި، އިނާޔަތް ދިންކަމުގައި ވިޔަސް ގާނޫނުގައި ބަޔާންކޮށްފައިވާވަރަށް ދީފައި ނުވާކަން މީގެ ކުރިންވެސް ފާހަގަކުރެވިފައިވާކަމަށް އޭރު އެ އޮތޯރިޓީން ވަނީ ބުނެފައެވެ.

ލޭބަރ ރިލޭޝަންސް އޮތޯރިޓީން މީގެ ކުރިން ބުނެފައިވާގޮތުގައި، ރޯދަ އެލަވަންސް ނުދީގެން މިދިޔަ އަހަރު އެ އިދާރާއަށް ވަނީ 65 ޝަކުވާ ހުށަހަޅާފައެވެ. އަދި އޭގެ ތެރެއިން 53 މީހުން މަސައްކަތްކުރާ ތަނާ މަޝްވަރާކޮށް އެ މައްސަލަ ހައްލުކޮށްދީފައިވާކަމަށް ވެސް އެ އިދާރާއިން އޭރު ބުންޏެވެ. އަދި އެކަމަށް އެއްބާރުލުން ނުދިނުމުން ބައެއް ތަންތަން ވަނީ ޖޫރިމަނާވެސް ކޮށްފައެވެ.

ވަޒީފާއާބެހޭ ގާނޫނު ބުނާގޮތުގައި، ރޯދަ އެލަވަންސް ނުދީފިނަމަ އެ ކަމަށް ނަސޭހަތްތެރިވެ، އެ ކަން ތަކުރާރުވެެއްޖެނަމަ 5000އާ 50،000އާ ދެމެދުގެ އަދަދަކުން ޖޫރިމަނާ ކުރެވިދާނެއެވެ. އަދި ވަޒީފާ ދޭ ފަރާތްތަކަށް ސަރުކާރުންދޭ ހުއްދަ ބާތިލުކުރުންފަދަ ފިޔަވަޅުތައްވެސް އެޅިދާނެކަމަށް ގާނޫނުގައި ބަޔާންކޮށްފައިވެއެވެ.