މުސާރައާއި އިނާޔަތްތައް ނުލިބޭނަމަ ލޭބަރ ރިލޭޝަންސްއަށް ޝަކުވާ ހުށަހެޅުމަށް އެދިއްޖެ
ރަމަޟާންމަހުގެ އިނާޔަތް ވެސް ނުލިބޭނަމަ ޝަކުވާ ހުށަހެޅުމަށް އެދިފައިވޭ
ލޭބަރ ރިލޭޝަން އޮތޯރިޓީ،
ވަޒީފާ އަދާކުރާ ފަރާތްތަކަށް ދޭންޖެހޭ މުސާރައާއި އިނާޔަތްތައް ނުލިބޭނަމަ ވަޒީފާއާބެހޭ އާންމު ގަވާއިދުގެ ދަށުން ލޭބަރ ރިލޭޝަންސް އޮތޯރިޓީއަށް ޝަކުވާ ހުށަހެޅުމަށް އެދިއްޖެއެވެ.
ލޭބަރ ރިލޭޝަންސް އޮތޯރިޓީން ބުނީ ވަޒީފާ އަދާކުރާ ފަރާތްތަކަށް ދޭންޖެހޭ މުސާރައާއި، ރަމަޟާންމަހުގެ އިނާޔަތާއި، އެނޫން ވެސް އިނާޔަތްތައް، ވަޒީފާދޭ ފަރާތުން ގަވާއިދުން މުވައްޒަފުންނަށް ދެމުން ނުދާނަމަ، ވަޒީފާއާބެހޭ އާންމު ގަވާއިދުގެ 19 ވަނަ މާއްދާގެ (ށ) ގައި ބަޔާންކޮށްފައިވާ ގޮތުގެމަތިން، އެކަމުގެ ޝަކުވާ އެއޮތޯރިޓީއަށް ހުށަހެޅޭނެ ނިޒާމު ގާއިމު ކުރެވިފައިވާ ކަމަށެވެ.
ލޭބަރ ރިލޭޝަންސް އޮތޯރިޓީން ބުނީ ޝަކުވާ ހުށަހެޅުމަށް ޚާއްސަ ކުރެވިފައިވާ ފޯމް، 8 ޖޫން 2021 ވަނަ ދުވަހުން ފެށިގެން، އެ އޮތޯރިޓީގެ ވެބްސައިޓުން ޑައުންލޯޑް ކުރެވެން ހުންނާނެ ކަމަށާއި، އެ އޮތޯރިޓީގެ ކައުންޓަރުން ވެސް ލިބެން ހުންނާނެ ކަމަށެވެ. އަދި ޝަކުވާގެ ފޯމް ސީދާ އޮތޯރިޓީއަށް ހުށަހެޅުމުގެ އިތުރުން، އޮތޯރިޓީގެ ވެބްސައިޓް މެދުވެރިކޮށް ވެސް ޝަކުވާ ހުށަހެޅޭނެ ކަމަށް ލޭބަރ ރިލޭޝަންސްއިން ބުނެއެވެ.
ކޮވިޑް-19އާ ގުޅިގެން ބައެއް ކުންފުނިތަކުން ދޭންޖެހޭ މުސާރައާއި، ރަމަޟާންމަހުގެ އިނާޔަތާއި، އެނޫން ވެސް އިނާޔަތްތައް ހަމައަށް ނުދޭ ކަމުގެ ޝަކުވާ ވަނީ ބޮޑުވެފައެވެ. ވަޒީފާއާ ބެހޭ ގާނޫނުގެ 51 ވަނަ މާއްދާގެ (ހ) ގައި ބުނެފައިވަނީ، ވަޒީފާ އަދާކުރާ ކޮންމެ ދިވެހި މުއައްޒަފަކަށް ވެސް ރޯދަ އިނާޔަތުގެ ގޮތުގައި، ރޯދަ މަސް ފެށުމުގެ ކުރިން 3000 ރުފިޔާ ދޭން ޖެހޭނެ ކަމަށެވެ. ނަމަވެސް އަދިވެސް ބައެއް މުއައްޒަފުންނަށް ރޯދަ އިނާއަތް ނުލިބިގެން އެކަމުގެ ޝަކުވާ ލިބެމުންދެއެވެ.
