ޔޫރޯ ކޮލިފައިންގައި ރޭ އިޓަލީކޮޅަށް 2-1އިން ބަލިކުރި މެޗުގައި ގައުމީ ޓީމަށް އެންމެ ގިނަ ގޯލު ޖެހުމުގެ ރެކޯޑް އިނގިރޭސި ކެޕްޓަން ހެރީ ކޭން މުގުރާލައިފި އެވެ.

މި މެޗުގެ ފުރަތަމަ ގޯލު 13 ވަނަ މިނިޓްގައި ޖެހީ ޑިކްލައިން ރައިސް އެވެ. އިޓަލީގެ ހަމައެކަނި ލަނޑު ޖެހީ 56 ވަނަ މިނިޓްގައި ރެޓޭގީ އެވެ.

އިޓަލީގެ ނަޕޯލީގެ ޑިއެގޯ މަރަޑޯނާ ސްޓޭޑިއަމުގައި ކުޅުނު މި މެޗުގައި ކޭން ރެކޯޑް ހެދީ 44 ވަނަ މިނިޓްގައި ލިބުނު ޕެނަލްޓީ އަކުންނެވެ. މި ގޯލާއެކު ގައުމީ ޓީމަށް އޭނާ ޖަހާދީފައިވާ ގޯލުގެ އަދަދު ވަނީ 54 އަށް އަރައިފަ އެވެ. ކުރިން މި ރެކޯޑް އޮތީ ކުރީގެ ކެޕްޓަން ވޭން ރޫނީގެ އަތުގަ އެވެ. އޭނާ ޖަހާފައިވަނީ 53 ގޯލެވެ.

ކޭން ބުނީ ގައުމީ ޓީމަށް އެންމެ ގިނަ ގޯލު ޖެހި ކުޅުންތެރިޔާ އަށްވެވުމުން ވަރަށް އުފާވި ކަމަށެވެ.

މި މޮޅަކީ 2021 ވަނަ އަހަރުގެ ޔޫރޯ ފައިނަލުގައި އިޓަލީ އަތުން އިނގިރޭސިން ބަލިވުމުގެ ރަނގަޅު ބަދަލު ހިފުމެއްވެސްމެ އެވެ. މިއީ 1961ގެ ފަހުން އިޓަލީގެ ފަސްގަނޑުގައި ކުޅެގެން އިނގިރޭސިން މޮޅުވި ފުރަތަމަ ފަހަރު ވެސްމެ އެވެ.

ކޭން ރެކޯޑް ހެދުމުން އޭނާ އަށް އެންމެ ފުރަތަމަ މަރުހަބާ ކިޔާފައިވަނީ ވެސް 120 މެޗުން ރެކޯޑް ހެދި ކުރީގެ ފޯވަޑް ރޫނީ އެވެ.

މެޗަށް ފަހު ކޭން ބުނީ ރޫނީ ރެކޯޑްހެދި ދުވަހު އޭނާ ހުރީ ދަނޑުމަތީގައި ކަމަށެވެ. އަދި އެކަމުގެ އުފަލުގައި ރޫނީ އަށް ބޫޓެއް ދިނުމުން އެބޫޓު ކޮންމެވެސް ދުވަހަކުން އަނބުރާ އޭނާ އަށް ދޭނެ ވާހަކަ ރޫނީ އެދުވަހު ބުނި ކަމަށެވެ.