އިޓަލީގެ ކޯޗަކަށް ގަޓޫސޯ ހަމަޖައްސައިފި

އިޓަލީގެ ޤައުމީ ފުޓުބޯޅަ ޓީމުގެ ކޯޗުގެ މަޤާމަށް، ކުރިން އެ ޓީމަށް ކުޅުނު ޖެނާރޯ ގަޓޫސޯ ހަމަޖައްސައިފި އެވެ.

އިޓަލީގެ ކޯޗުކަމުގައި ހުރި ލޫސިއާނޯ ސްޕަލެއްޓީ މަގާމުން ވަކި ކުރުމަށް ފަހު، އެ މަޤާމަށް ގަޓޫސޯ ހަމަޖައްސާފައިވާކަން އިޓަލީގެ ފުޓުބޯޅަ ފެޑެރޭޝަން އިން ވަނީ އިއުލާާން ކޮށްފަ އެވެ.

އުމުރުން 47 އަހަރުގެ ގަޓޫސޯ ވަނީ އިޓަލީގެ ޤައުމީ ޓީމާ ހަވާލުވީއިރު، އޭނާ އެންމެ ފަހުން އިރުޝާދު ދިނީ ކްރޮއޭޝިއާގެ ހަޑްޖުކް ސްޕްލިޓަށެވެ. އެ ކުލަބާ އެކު އޭނާ ސޮއި ކޮށްފައި އޮތް އެއްބަސްވުން އަންނަ އަހަރު ހަމަވާން އޮތް ނަމަވެސް، އެ އެއްބަސްވުން ވަނީ މި އަހަރު އުވާލައިފަ އެވެ.

އިޓަލީގެ ޤައުމީ ޓީމުގެ ކޯޗުގެ ގޮތުގައި ގަޓޫސޯ ރަސްމީކޮށް ދައްކާލުން އޮތީ މި މަހުގެ 19 ވަނަ ދުވަހު އެވެ.

ގަޓޫސޯ އަކީ މީގެ ކުރިން އިޓަލީގެ ޤައުމީ ޓީމަށް ވެސް ކުޅެފައިވާ ކުޅުންތެރިޔެކެވެ. ފުޓުބޯޅަ ކެރިއަރުގައި އޭނާ ވަނީ އިޓަލީ ޤައުމީ ޓީމަށް 73 މެޗު ކުޅެދީ، އެއް ލަނޑު ޖަހައިފަ އެވެ. އިޓަލީގެ ޤައުމީ ޓީމާ އެކު އޭނާ ވަނީ 2006 ވަނަ އަހަރު އޮތް ފީފާ ވޯލްޑް ކަޕް ކާމިޔާބު ކޮށްފަ އެވެ.

ކުޅުން ހުއްޓާލުމަށް ފަހު، ގަޓޫސޯ އޭނާގެ ކޯޗިން ކެރިއަރު ފެށީ 2013 ވަނަ އަހަރު އެވެ. ސްވިޒަލެންޑުގެ ސިއޯން އިން ކޯޗިން ކެރިއަރު ފެށި ގަޓޫސޯ ވަނީ އިޓަލީގެ އޭސީ މިލާން އަދި ނަޕޯލީގެ އިތުރުން، ސްޕެއިންގެ ވެލެންސިއާ އަދި ފްރާންސްގެ މާސޭ އަށް ވެސް އިރުޝާދު ދީފަ އެވެ.

އިޓަލީގެ ޤައުމީ ޓީމުގެ ކޯޗުކަމުގެ މަގާމުން ސްޕަލެއްޓީ ވަކި ކުރަން ނިންމީ، އޭނާގެ އިރުޝާދުގެ ދަށުން އެ ޓީމުގެ ނަތީޖާތައް ދަށްވުމުންނެވެ. އިޓަލީގެ ކޯޗުކަމަށް އޭނާ ހަމަޖެއްސީ 2023 ވަނަ އަހަރު އެވެ.

ސްޕަލެއްޓީގެ އިރުޝާދުގެ ދަށުން އިޓަލީ އިން ވަނީ 24 މެޗު ކުޅެފަ އެވެ. އޭގެ ތެރެއިން 12 މެޗުން އެ ޓީމު މޮޅުވެފައިވާއިރު، ހަ މެޗުން އެއްވަރުވެ، އަނެއް ހަ މެޗުން ވަނީ ބަލިވެފަ އެވެ.