ދިރާގުން "މައިކްރޯ ސޮފްޓު 365" ރާއްޖެއަށް ތައާރަފުކޮށްފި

ރާއްޖޭގެ އެންމެ ބޮޑު މުއާސަލާތީ ކުންފުނި ކަމަށްވާ ދިރާގުން ދިވެހިރާއްޖެ އަށް "މައިކްރޯ ސޮފްޓު 365" ތައާރަފު ކޮށްފިއެވެ.

މިހިދުމަތް ތަޢާރަފްކޮށްފައިވަނީ އަންގާރަ ދުވަހުގެ ހެނދުނު 10:00 ގައި ހޮޓެލް ޖެންގެ ބޯލް ރޫމްގައި ބޭއްވި ހަފްލާއެއްގައެވެ.

"މައިކްރޯ ސޮފްޓު 365" ތައާރަފުކުރުމަށްފަހު ވާހަކަފުޅު ދައްކަވަމުން ދިރާގުގެ ސީއީއޯ އިސްމައިލް ރަޝީދު ވިދާޅުވީ މައިކްރޯސޮފްޓާ ދެމެދު މިވެވުނު އެއްބަސްވުން ރަމްޒުކޮށްދެނީ ދިވެހިރާއްޖެއަށް ޓެކްނޮލޮޖީއާއި ކުރިއެރުން ގެންނަން ދިރާގުން ދޭ އަހައްމިއްޔަތުކަން ކަމަށާއި މިފުރުޞަތުގައި މައިކްރޯސޮފްޓަށް ޝުކުރު ދަންނަވާ ކަމަށެވެ.

އަދި ދިރާގަކީ މުއާސަލާތީ ގުޅުމަށް ދިވެހިރާއްޖޭގައި އިންގިލާބެއް ގެނުވި އަދި ރާއްޖޭގެ ރަށްތައް މުއާސަލާތީ ވިއުގައަކުން ގުޅާލައި ބްރޯޑްބޭންޑްގެ ހިދުމަތް އެންމެ ފުޅާކޮށް ކުރާ ފަރާތް ކަމަށްވެސް އިސްމާއީލް ރަޝީދު ވިދާޅުވިއެވެ.

"މައިކްރޯސޮފްޓް އޮފީސް 365 އަކީ މަސައްކަތް ކުރުމުގައި އިތުރު ފަސޭހައެއް ގެނެސްދޭ އެއްޗެއް. މީގެ ކުރިން އަޅުގަނޑަށް މި ބޭނުން ކުރުމުގެ ނަސީބު ލިބުނު. އެކި ތަންތަނަށް ދަތުރުކުރާއިރު ވެސް މި [އޮފީސް 365] ބޭނުންކޮށްގެން މަސައްކަތްތައް ކޮށް ހެދޭނެ،" އިސްމާއިލް ވިދާޅުވި އެވެ.

މިހިދުމަތަކީ ރާއްޖެ ފަދަ ދުރަށް ބެހިގެން ގޮސްފައިވާ ޖަޒީރާ ރަށްތަކެއް އެކުލެވޭ ގައުމަކަށް މުހިންމު ބޭނުންތެރި ހިދުމަތެއް ކަމަށްވެސް އިސްމާއީލް ރަޝީދު ވިދާޅުވިއެވެ.