އެސްޓީއޯއިން ގެންނަ ކާށި އަންނަ ހަފްތާގައި ލިބެން ހުންނާނެ
އެސްޓީއޯގެ ބޭނުމަކީ އާންމުކޮށް ބޭނުންކުރާ ތަކެތި ހެޔޮއަގުގައި ފޯރުކޮށްދިނުން
ރޯދަމަހާ ދިމާކޮށް ކާށީގެ އަގުވަނީ ވަރަށް ބޮޑަށް އުފުލިފައި
އެސްޓީއޯއިން އަންނަ ހަފްތާގައި ކާށި ހެޔޮއަގުގައި ވިއްކަން ފަށާނެކަމަށް އެ ކުންފުނިން ބުނެފިއެވެ.
ރަމަޟާން މަހުގެ ފުރަތަމަ ދުވަސް ނަމުގައި ރާއްޖެޓީވީން އެކި ކުންފުނިތަކުގެ މަސައްކަތްތަކާއި ރަމަޟާން މަހަށް ވެފައިވާ ތައްޔާރީތަކާއި ގުޅޭގޮތުން ގެނެސްދިން ޕްރޮގްރާމުގައި ވާހަކަ ދައްކަވަމުން، އެސްޓީއޯގެ ޕީޕަލްސް ޗޮއިސް އެންޑް ފުޑް ސެކިއުރިޓީގެ ސޭލްސް މެނޭޖަރު އަބްދުﷲ ވިސާމް ވިދާޅުވީ ރޯދަމަހުގައި އެންމެ ބޮޑަށް އަގު އުފުލެމުންދާ އެކައްޗަކީ ކާށި ކަމަށެވެ.
އެގޮތުން އެސްޓީއޯއިން މަސައްކަތް ކުރަނީ އެ ކުންފުނި މެދުވެރިވެގެން ކާށީގެ އަގު ދަށްކުރުމަށްޓަކައި ނުވަތަ ސްޓޭބަލް އަގެއްގައި ކަސްޓަމަރުންނާ ހަމައަށް ކާށި ލިބޭނެ އިންތިޒާމްތައް ހަމަޖެއްސުމަށް ކަމަށެވެ. ލަފާކުރެވޭގޮތުގައި މި ފެށޭ ހަފްތާ ތެރޭގައި ޝިޕްމަންޓް އަންނާނެ ކަމަށާއި، އަދި ހަމަ އަގުގައި ރައްޔިތުންނަށް ކާށި ލިބޭނެ ކަމަށް ވިސާމް ވިދާޅުވިއެވެ.
އޭނާ ވިދާޅުވީ ރަމަޟާން މަހާ ދިމާކޮށް، އެހެން އަހަރުތަކެކޭ އެއްފަދައިން މިއަހަރުވެސް އާންމުން ބޭނުންވާ އަސާސީ ބާވަތްތައް އެތެރެކުރުމަށް އިސްކަމެއް ދެމުންގެންދާ ކަމަށެވެ. އަދި ރޯދަމަހާ ދިމާކޮށް ތަކެތީގެ އަގު އުފުލިގެންދާ މިންވަރު ދިރާސާކުރަމުން ގެންދިޔަ ކަމަށެވެ. އަދި އަގުތައް އެއްވަރެއްގައި ހިފެހެއްޓުމަށް ގިނަ މަސައްކަތްކަތެއް ކުރުމަށް ރާވާފައިވާ ކަމަށެވެ.
ވިސާމް ވިދާޅުވީ މުދާތައް ކަސްޓަމަރުންނާ ހަމައަށް ފޯރުކޮށްދިނުމަށްޓަކައި އިތުރު މަސައްކަތްތަކެއް ކޮށްފައިވާނެ ކަމަށެވެ. އެގޮތުން މިދިޔަ ރޯދަ މަހު ހޯލްސޭލް ސެންޓަރުން ހޯދާ ހިދުމަތްތަކަށްފަހު މުދާ ބަލާ ދާންޖެހެނީ އިންޑަސްޓްރިއަލް ވިލެޖުގައި ހުންނަ ގުދަނަށް ކަމަށެވެ. އެކަމަށް އިސްކަމެއް ދީގެން މިފަހަރު ހޯލް ސޭލް ސެންޓުން ހިދުމަތް ހޯދާ ފަރާތްތަކަށް އެތާ ކައިރިން ފިޔާ، ބިސް އަދި އަލުވިއާއި އެހެނިހެން ބާވަތްތައް ލިބޭނެ ގޮތް ހަމަޖައްސާފައިވާނެ ކަަމަށެވެ.
މީގެ އިތުރުން ހުޅުމާލޭގައި ދިރިއުޅޭ ރައްޔިތުންނަށް ހާއްސަކޮށްގެން ރޯދަމަހާ ދިމާކޮށް އެސްޓީއޯއިން މުދާ ވިއްކުމަށްޓަކައި ރޯދަ މާޓުގެ ނަމުގައި ވިނަރެސްގައި ފިހާރައެއް ހުޅުވާފައިވާނެކަމަށް ވެސް ވިސާމް ވިދާޅުވިއެވެ.
