ބާޒާރުން ފިޔާ ލިބުން ދަތިވެ، އެސްޓީއޯއިން ފިޔާގެ ޝިޕްމަންޓެއް ގެންނަނީ
ފިޔާ ލިބުން ދަތިވެ އަގު މައްޗަށް ދިއުމާ ގުޅިގެން އެސްޓީއޯއިން ފިޔާގެ ޝިޕްމަންޓެއް ގެންނަން ވަނީ ނިންމާފަ
ބާޒާރުގައި ފިޔާ ހުސްވެ، އާންމުންނަށް ދަތިވެފައިވުމުން އެސްޓީއޯ އިން ފިޔާގެ ޝިޕްމެޏްޓެއް ގެންނަން ނިންމުން
ރާއްޖޭގެ ބާޒާރުން ފިޔާ ލިބުން ދަތިވެ، ފިޔާގެ އަގު ބޮޑުވެފައިވާތީ، ފިޔާގެ ޝިޕްމެންޓެއް ގެނައުމަށް ނިންމާފައިވާ ކަމަށް އެސްޓީއޯއިން ބުނެފި އެވެ.
އެސްޓީއޯއިން އާންމުކޮށް ފިޔާގެ ޝިޕްމަންޓް ގެންނަނީ ރޯދަ މަހާ ދިމާކޮށެވެ. އަދި ރޯދަމަސް ނޫނަސް މިފަދަ ތަކެތިީގެ އަގުތައް ބާޒާރުގައި މަތިވާ ކޮންމެ ފަހަރަކު އެސްޓީއޯއިން މުދާ އެތެރެ ކުރެ އެވެ. އެހެން ނޫނީ ރާއްޖެއަށް ފިޔާ ގެންނަނީ އަމިއްލަ ވިޔަފާރިތަށް ކުރާ ފަރާތްތަކުންނެވެ.
އެހެން ނަމަވެސް މި ދުވަސްވަރު މޫސުން ގޯސްވެފައިވާތީ ވިޔަފާރިވެރިން ވެސް ފިޔާ ގެނައުމުގައި ދަތިވެ ފިޔާ ނުގެނެވި ބާޒާރުގައި ފިޔާގެ ދަތިކަން ވަނީ ކުރިމަތިވެފަ އެވެ. ފިޔާ އެތެރެނުކުރެވި ގިނަ ދުވަސްތަކެއް ވެފައިވުމާއި އެކު ބާޒާރުގައި ފިޔާ ކިލޯއެއްގެ އަގު މިހާރު ވަނީ ވަރަށް މަތިިވެފަ އެވެ.
އާންމުކޮށް މިހާރު ފިޔާ ކިލޯއެއްގެ އަގު އުޅެނީ 30 ރުފިޔާ އާއި 35 ރުފިޔާއާއި ދެމެދުގަ އެވެ.
އެސްޓީއޯއިން އަންގާރަ ދުވަހު ބުނީ މި މައްސަލަ ހައްލު ކުރުމުގެ ގޮތުން، ފިިޔާ ޝިޕްމެންޓެއް ގެނައުމުގެ މަސައްކަތް ކުރަމުން އަންނަ ކަމަށެވެ. އެސްޓީއޯއިން ފިޔާ ޝިޕްމެންޓް ގެންނަން ނިންމީ ބާޒާރުން ފިޔާ ލިބުން ދަތިވެ، ފިޔާގެ އަގު ބާޒާރުގައި ބޮޑުވަމުން އަންނާތީ އަގުތައް ހަމައަކަށް އަޅުވައި، ދަތިކަން ފިލުވުމަށް ކަމަށެވެ. އެހެން ނަމަވެސް އެ ފަރާތުން ގެންނަ އެ ފިޔާ ޝިޕްމެންޓް ލިބޭނޭ ވަކި ދުވަހެއް އިއުލާނު ކޮށްފަ އެއް ނުވެއެވެ.
އެސްޓީއޯއިން ބުނީ މާކެޓުގައި އަސާސީ މުދަލަށް ދަތިވެއްޖެނަމަ އެސްޓީއޯއިން އެ ވިޔަފާރިތެރެއަަށް ވަންނަ އުސޫލުގެ ދަށުން ފިޔާގެ ޝިޕްމަންޓެއް ގެންނަން ނިންމާފައިވާ ކަމަށެެވެ.
ގިނަ ފިހާރަތަކުން ފިޔާ ހުސްވެފައިވާ އިރު ފިޔާ ލިބޭ މަދު ފިހާރަތަކުން ފިޔާ ވިއްކަނީ ވަރަށް ބޮޑު އަގުގައި ކަން ފާހަގަކޮށްލެވެ އެވެ.
