މުޅި މެދުއިރުމަތީގެ ހަމަޖެހުން ނަގާލި ޢިރާޤު ހަނގުރާމައިގެ ޖަރީމާއަށް އެމެރިކާ ޒިންމާވާންޖެހޭ!

އެއީ މީގެ 20 އަހަރު ދުވަސް ކުރިއެވެ. އެމެރިކާ އިސްވެ އޮވެ ޢިރާޤަށް އަރާ، އެ ޤައުމުގައި ހަނގުރާމަ ފެށިއެވެ. އެކަމުގެ ސަބަބުން ގެއްލުމާއި ނުތަނަވަސްކަން ކުރިމަތިވީ ހަމައެކަނި ޢިރާޤަކަށް ނޫނެވެ. ނަމަވެސް މުޅި މެދުއިރުމައްޗަށް، އެ ކަމުގެ ސަބަބުން ގެއްލުމާ ކުރިމަތިވިކަމަށް ޢިރާޤުގެ ވަޤުތީ ސަރުކާރުގެ ކުރީގެ ބޮޑުވަޒީރު އަޔާދު އައްލާވީ ވަނީ ވިދާޅުވެފައެވެ.

މަރޗް 2003 ގައި، އެމެރިކާއާއި އެމެރިކާއަށް އެއްބާރުލުންދޭ ބައިނަލްއަޤުވާމީ ބައިވެރިންގެ ފައުޖުތަކުން ޢިރާޤަށް އަރާ، ހަނގުރާމަ ފެށީ، އދގެ އިޒުނައަކާ ނުލައެވެ. އުޒުރެއް ކަމުގައި ހެދީ، ފުޅާ ދާއިރާއެއްގައި ގެއްލުންދެނިވި ބަރު ހަތިޔާރު، ޢިރާޤުގައި ހުރި ކަމަށް ބުނި ބުނުމެވެ. އެމެރިކާ އިސްވެ އޮވެ ޢިރާޤުގައި ކުރަން ފެށި ހަނގުރާމާގައި އާންމުންގެ ތެރެއިން މަރުވެ ދިޔަ މީހުންގެ ޢަދަދު އެތައް ސަތޭކަ ހާހަކަށް އަރާފައި ވާއިރު، ގެދޮރު ގެއްލުނު މީހުންގެ ޢަދަދު، މިލިއަނުން ގުނާލެވެއެވެ.

ޢިރާޤު ހަނގުރާމައަށް 20 އަހަރު ފުރުމާ ދިމާކޮށް، ޗައިނާ ސެންޓްރަލް ޓެލެވިޜަން (ސީސީޓީވީ)އަށް ދެއްވި ބަސްދީގަތުމެއްގައި އައްލާވީ ވިދާޅުވީ، އެމެރިކާގެ އަސްކަރިއްޔާއިން ޢިރާޤުގެ ފަސްގަނޑުގައި ހަނގުރާމައިގެ ޖަރީމާތައް ގިނަ ޢަދަދަކަށް ހިންގާ، މުޅި ސަރަޙައްދުގެ މަސްރަޙު، ނުތަނަވަސްކަމެއްގެ ތެރެއަށް ވައްޓާލި ކަމަށެވެ.

އެމެރިކާއާއި އެމެރިކާއަށް އެއްބާރުލުން ދޭ ޤައުމުތަކުގެ ގުޅިފައިވާ އަސްކަރީ ފައުޖުތަކުން ޢިރާޤަށް އެރި ގޮތަށް އަރާ، އެ ޤައުމުގައި އޮތް އަސްކަރީ ބާރު އުވާލިއެވެ. ޤައުމުގެ ސަލާމަތް ބެލެހެއްޓުމާހަވާލުވެތިބި

ހުރިހާ އިދާރާއެއް އުވާލާ، ޤައުމީ ސަލަމާތް، ނުރައްކަލަށް ހުޅުވާލިއެވެ. ނަތީޖާއެއްގެ ގޮތުން، މެދުއިރުމަތީގެ އެހެން ސަރަޙައްދުތަކަށް އެ ނުރައްކާ ބަންޑުންވެ، ފެތުރިގެން ދިޔައެވެ. އެކަން ވެގެން ދިޔައީ، މެދުއިރުމަތީގައި ޓެރަރިސްޓް ހަރަކާތްތައް ހިންގަން ލިބުނު ހިތްވަރަކަށް ކަމަށް އައްލާވީ ވިދާޅުވިއެވެ.

އައްލާވީ ފާހަގަ ކުރެއްވި ގޮތުގައި، މަރޗް 2003 އިން ޑިސެމްބަރު 2011ގެ ނިޔަލަށް އެމެރިކާގެ އަސްކަރިއްޔާއިން ޢިރާޤު ހިފައިގެން އޮތް އޮތުމާ ދެކޮޅަށް، އެ ޤައުމުގައި ގިނަ ހަރަކާތްތަކެއް އުފެދިގެން ދިޔައެވެ.

ޢިރާޤުގައި ކުރަމުން ދިޔަ ހަނގުރާމަ "ހުއްޓާލާ"، ބިދޭސީ އަސްކަރީ ފައުޖުތައް ޢިރާޤުން ފައިބާނެކަން އެމެރިކާއިން އިޢުލާން ކުރީ 2011 ވަނަ އަހަރު ނިމެންދަނިކޮށެވެ. ނަމަވެސް، މިއަދުވެސް، އެމެރިކާގެ އަސްކަރީ މަރުކަޒުތައް ޢިރާޤުގައި އެބަހުއްޓެވެ. އަސްކަރީ ސިފައިން، ޢިރާޤުގެ އެކި ސަރަޙައްދުތަކުގައި އެބަ ތިބިއްބެވެ. އައްލާވީ ވިދާޅުވި ގޮތުގައި އެއީ އަވަށްޓެރި ޤައުމުތަކުގެ ކަންކަން މޮނިޓަރކޮށް، މެދުއިރުމަތީގައި އޮތް އެމެރިކާގެ މަސްލަޙަތު ހިމާޔަތް ކުރުމަށް، އެމެރިކާއިން ކުރާ ކަމެކެވެ.

ބައިނަލްއަޤުވާމީ މައިދާނުގައި އެމެރިކާގެ އެންމެ ވަރުގަދަ ވާދަވެރިޔާ އަދި އެމެރިކާގެ އެންމެ ބޮޑު ޢަދުއްވުގެ ގޮތުގައި އެ ޤައުމުން ދެކޭ ޗައިނާއިން މެދުއިރުމަތީގައި ގެންގުޅޭ ސިޔާސަތާއި އެމެރިކާގެ ސިޔާސަތު އަޅާ ކިއުއްވަމުން އައްލާވީ ވިދާޅުވީ، ރަނގަޅީ ކޮން ޤައުމެއްގެ ސިޔާސަތެއްކަން އާންމުންނަށް އެނގޭ ކަމަށެވެ.

ދުނިޔޭގެ އެކި ކަންކޮޅުތަކުން އިންޓަރނެޓް ބޭނުން ކުރާ މީހުންގެ މެދުގައި ކުރިއަށް ގެންދިޔަ ޚިޔާލު ހޯދުމުގެ ސަރވޭއެއްގެ ނަތީޖާއަށް ބަލާއިރު، ޢިރާޤުގައި އެމެރިކާއިން ހިންގި ހަނގުރާމައިގެ ޖަރީމާތަކުގެ ޒިންމާ، އެމެރިކާއިން އުފުލަން ޖެހޭ ކަމަށް، 93 ޕަސެންޓް މީހުން ވަނީ ބުނެފައެވެ. އަދި 94.6 ޕަސެންޓް މީހުން ވަނީ، އެމެރިކާއިން ޢިރާޤަށް އަރާ، ހަނގުރާމައެއް ކުރަން ޖެހޭ ޤާނޫނީ ސަބަބެއް ސަބަބެއް ނެތް ކަމަށާ، އެމެރިކާގެ އެ ނިންމުމަކީ ނުރަނގަޅު ނިންމުމެއް ކަމަށްވެސް ބުނެފައެވެ.