އެމެރިކާ ގެ މެންހެޓަންގެ އުސް އިމާރާތެއްގައި ހިނގި ބަޑިޖެހުމުގެ ހާދިސާ އެއްގައި ހަމަލާދިން މީހާ ހިމެނޭގޮތަށް 5 މީހުން މަރުވެއްޖެ އެވެ.

އެމެރިކާގެ މީޑިއާތަކުން ރިޕޯޓުކުރާ ގޮތުގައި މެންހެޓަންގެ މެދުތެރޭގައި ހުރި އުސް އިމާރާތެއްގައި ހޯމަ ދުވަހު ހިނގި ހަމަލާއެއްގައި މަރުވި މީހުންގެ ތެރޭގައި ފުލުހަކު ވެސް ހިމެނެއެވެ.

އެމެރިކާގެ އެންމެ އާބާދީ ބޮޑު ސިޓީގެ މެދުތެރޭގައި ހިނގި މި ހާދިސާ ފެށުނީ ހަވީރު 6:00 ހާއިރު ކަމަށް ރިޕޯޓުތައް ބުނެއެވެ. ބަޑި ޖަހާ އަޑުފައްގަނޑާއެކު ޕާކް އެވެނިއުގައި ހުރި މަޝްހޫރު އޮފީސް ސަރަހައްދަކަށް އެތައް ސަތޭކަ ފުލުހުން އައިސް ހަރަކާތްތެރިވާން ފެށިއެވެ. މި ސަރަހައްދަކީ ފަތުރުވެރިންނާއި ވިޔަފާރި ވެރިންނާއި ދަތުރުވެރިންގެ މެދުގައި މަޤްބޫލު ސަރަހައްދެކެވެ.

ފުލުހުން ބުނާ ގޮތުގައި މި ހާދިސާ ހިނގި ޕާކް އެވެނިއުގައި މަޝްހޫރު އެތައް އޮފީސް އިމާރާތެއް ހުރެއެވެ. އޭގެ ތެރޭގައި، ބްލެކްސްޓޯން ހެޖް ފަންޑް، އޮޑިޓަރ ކޭޕީއެމްޖީ، އަދި ނެޝަނަލް ފުޓްބޯލް ލީގުގެ އޮފީސްތައް ހުންނަ އިމާރާތް ހިމެނެއެވެ. ޙާދިސާ "ކޮންޓްރޯލްކުރެވި އަދި ހަމަލާދިން މީހާ މަރުވެފައިވާ" ކަމަށް ބުނެފައިވެއެވެ.

ފުލުހުން ބުނާ ގޮތުގައި ބަޑިޖެހި ކަމަށް ބެލޭ، 27 އަހަރުގެ ޝޭން ޑެވޮން ޓެމޫރާ ކިޔާ މީހަކު ލާސް ވޭގާސް އިން މެންހަޓަނަށް ދަތުރުކޮށްފައިވާކަމަށް ބެލެވެއެވެ. ނަމަވެސް އޭނާ މި ހަމަލާ ދިން މަޤްޞަދު އަދި ސާފު ނުވާ ކަމަށް ބުނެއެވެ. ފުލުހުން ބުނާ ގޮތުގައި، އޭނާ ހާދިސާ ހިނގި ސަރަހައްދު ބަޑިޖެހި މީހާ އަމިއްލަ އަށް މަރުވެފައި ވަނިކޮށް ވަނީ ފެނިފައެވެ. އަދި އޭނާގެ ކާރުން އިތުރު ވަޒަން ފެނިފައިވެއެވެ.

ފުލުހުން ބުނާ ގޮތުގައި، ބަޑި ހިފައިގެން އުޅުނު މީހާ ރައިފަލް އެއް ހިފައިގެން އޮފީސް އިމާރާތަށް ވަދެ، ލޮބީގައާއި މަތީ ފަންގިފިލާއެއްގައި އެ ގޮތް މިގޮތައް ބަޑިޖަހަން ފެށީއެވެ.

ޕޮލިސް ކޮމިޝަނަރ ޖެސިކާ ޓިޝް އެކްސްގައި ލިޔެފައިވަނީ، "މިވަގުތު، މި ސަރަހައްދު ކޮންޓްރޯލްކުރެވި އަދި ހަމަލާދިން މީހާ ނިއުޓްރަލައިޒްކުރެވިފައިވާ" ކަމަށެވެ.

މި ސަރަހައްދަކީ ގިނަ އަދަދެއްގެ މަޝްހޫރު ވިޔަފާރިތަކާއި، ހޮޓާތަކާއި، އެތައް ކުންފުންޏެއްގެ ހެޑްކުއާޓަރު ތަކާއި، މާލީ އިދާރާތަކާއި، ޤާނޫނީ އޮފީސްތައް ހުންނަ މަޝްހޫރު ސަރަހައްދެކެވެ.