"ރައީސް ޔާމީންގެ ސިޔާސީ ބަގީޗާގައި އިތުރަށް ފޮޅޭނެ މަލެއް ނެތް"
ސަރުކާރަށް ފާޑުކިޔާ ފަރާތްތައް ދަނީ އިތުރުވަމުން
ރައީސުލްޖުމްހޫރިއްޔާ ޢަބްދުﷲ ޔާމީން
ރައީސުލްޖުމްހޫރިއްޔާ ޢަބްދުﷲ ޔާމީންގެ ސިޔާސީ ބަގީޗާގައި އިތުރަށް ފޮޅޭނެ މަލެއް ނެތްކަމަށް ޖުމްހޫރީ ޕާޓީގެ ޑެޕިއުޓީ ލީޑަރު، އަމީން އިބްރާހިމް ވިދާޅުވެއްޖެއެވެ.
މުއްދަތެއް ނެތްގޮތަށް ރައްޔިތުންގެ މަޖިލީހުގެ ޖަލްސާތައް މެދުކަނޑާލުމާއި ގުޅިގެން، އަންގާރަދުވަހު އަމީން ކުރެއްވި ޓްވީޓެއްގައި ވިދާޅުވީ، ރައީސް ޔާމިންގެ ރިޔާސި ދައުރު ނިމެންދެން ރައްޔިތުންގެ މަޖިލިސް ސަސްޕެންޑްކޮށްފައި ބޭއްވިޔަސް، އަދި ރައްޔިތުންގެ މަޖިލީހުގެ ގިނަ މެންބަރުންތަކެއް ހައްޔަރުކޮށް އެފަރާތްތަކަށް ބިރުދެއްކި ނަމަވެސް، ރައީސް ޔާމީންގެ ސިޔާސީ ބަގީޗާގައި އިތުރަށް ފޮޅޭނެ މަލެއް ނެތް ކަމަށެވެ.
އަމީން މިފަދައިން ޓްވީޓް ކުރައްވާފައިވާއިރު، ހޯމަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާ ނިންމަވާލައްވަމުން، އަންގާރަ ދުވަހު މަޖިލީހުގެ ޖަލްސާއެއް އޮންނާނެކަން މަޖިލީހުގެ ރައީސް އަބްދުﷲ މަސީހު އިއުލާނު ކުރެއްވި ނަމަވެސް، މުއްދަތެއް ނެތްގޮތަށް ރައްޔިތުންގެ މަޖިލީހުގެ ޖަލްސާތައް މެދުކަނޑާލުމަށް ނިންމާފައިވާކަން، ފަހުން އެސްއެމްއެސްއެއް މެދުވެރިކޮށް މެންބަރުންނަށް ވަނީ އަންގާފައެވެ.
މަޖިލީހުގެ ޖަލްސާތައް މެދުކަނޑާލާފައިވަނީ މަސީހުގެ އިތުބާރު ނެތްކަމުގެ މައްސަލަ މަޖިލީހުގެ ސާޅީސް ފަސް މެމްބަރުންގެ ސޮޔާއެކު ހޯމަ ދުވަހު މަޖިލީހަށް ހުށަހެޅުމުންނެވެ.
