ގެވެށި އަނިޔާ ތަހައްމަލު ކުރާ ފަރާތްތަކަށް އެހީފޯރުކޮށްދިނުމަށް ހާއްސަ އެޕްލިކޭޝަނެއް ތައާރަފުކޮށްފި
މި އެޕްލިކޭޝަން މެދުވެރިކޮށް އަނިޔާ ލިބޭ ފަރާތްތަކަށް ރައްކާތެރިކަމާއެކު މައްސަލަ ރިޕޯޓް ކުރެވޭނެ
ނައިބު ރައީސް މަދަދުގާރު އެޕްލިކޭޝަން ތައާރަފުކޮށްދެއްވަނީ
ގެވެށި އަނިޔާ އާއި ވަކި ޖިންސަކަށްވީތީ ކުރާ އަނިޔާ ތަހައްމަލު ކުރަމުންދާ ފަރާތްތަކަށް އެހީތެރިކަން ފޯރުކޮށްދިނުމުގެ ގޮތުން ހާއްސަ އެޕްލިކޭޝަނެއް ތައާރަފުކޮށްފިއެވެ.
ބައިނަލްއަގުވާމީ އަންހެނުންގެ ދުވަސް ފާހަގަކުރުމަށް ހޯމަ ދުވަހުގެ ރޭ ބޭއްވި ރަސްމިއްޔާތުގައި "މަދަދުގާރު" ގެ ނަމުން ނަން ދީފައިވާ މި އެޕްލިކޭޝަން ތައާރަފު ކޮށްދެއްވީ ރައީސުލްޖުމްހޫރިއްޔާގެ ނައިބު، ފައިސަލް ނަސީމެވެ.
މަދަދުގާރު އެޕްލިކޭޝަނަކީ ގެވެށި އަނިޔާ އާއި ވަކި ޖިންސަކަށްވީތީ ކުރާ އަނިޔާތަކުގައި އެހީތެރިކަން ބޭނުންވާ މީހުންނަށް އެ އެހީތެރިކަން ފޯރުކޮށްދޭނެ މަގުފަހިކޮށްދިނުމަށް ތައްޔާރުކޮށްފައިވާ އެޕްލިކޭޝަނެކެވެ. މިއީ މިނިސްޓްރީ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް އާއި ޔޫއެންއެފްޕީއޭ ގުޅިގެން ތައްޔާރުކޮށްފައިވާ އެޕްލިކޭޝަނެކެވެ.
ޖެންޑަރ މިނިސްޓްރީން ބުނެފައިވާ ގޮތުގައި މި އެޕްލިކޭޝަން ފަރުމާކޮށްފައިވަނީ ބޭނުންކުރާ ފަރާތްތަކަށް ފަސޭހައި ޚިދުމަތް ހޯދޭނެ ގޮތަށެވެ. އަދި އެޕްލިކޭޝަނުގައި ގެވެށި އަނިޔާ އާއި ވަކި ޖިންސަކަށްވީތީ ކުރާ އަނިޔާތަކާ ގުޅޭ މައުލޫމާތާއި އަނިޔާ ލިބޭ މީހުންނަށް ރާއްޖޭގައި ލިބެން ހުންނަ ޚިދުމަތްތަކާ ގުޅޭގޮތުން މައުލޫމާތު ހިމަނާފައިވާނެ ކަމަށް ވެސް އެ މިނިސްޓްރީން ބުނެއެވެ.
މި އެޕްލިކޭޝަން މެދުވެރިކޮށް އަނިޔާ ލިބޭ ފަރާތްތަކަށް ރައްކާތެރިކަމާއެކު މައްސަލަ ރިޕޯޓުކުރެވޭނެ ކަމުގެ ޔަގީންކަން ޖެންޑަރ މިނިސްޓްރީން ދެއެވެ.
ޖެންޑަރ މިނިސްޓްރީން ބުނީ މި އެޕްލިކޭޝަނުގައި ގެވެށި އަނިޔާ އާއި ވަކި ޖިންސަކަށްވީތީ ކުރާ އަނިޔާއާ ގުޅޭގޮތުން މުޖުތަމައު ހޭލުންތެރިކުރުމަށް ތައްޔާރު ކުރާ ވީހާވެސް ގިނަ މެޓީރިއަލް އެއް ޕްލެޓްފޯމެއްގެ ދަށުން ބަލާލެވުމަކީ މި އެޕް ތައްޔާރު ކުރުމުގެ މަގުސަދެއް ކަމަށެވެ. އަދި ކުރިއަށް އޮތްތަނުގައި އެޕް ބޭނުން ކުރާ ނިސްބަތައް ބަލައި، ޚިދުމަތް ހޯދާ ފަރާތްތަކަށް އިތުރު ފަސޭހަތައް ވާނެ ފީޗާތައް ހިމެނުމަށް ރާވާފައިވާ ކަމަށް ވެސް އެ މިނިސްޓްރީން ބުނެއެވެ.
މަދަދުގާރު އެޕްލިކޭޝަން ގޫގަލް ޕްލޭ އާއި އެޕް ސްޓޯރުން ޑައުންލޯޑް ކުރެވޭނެއެވެ.
ބައިނަލްއަގުވާމީ އަންހެނުންގެ ދުވަހާ ގުޅުވައިގެން ބޭއްވި ހަފްލާގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު އާއި އެމަނިކުފާނުގެ އަނބިކަނބަލުން ފަޒްނާ އަހުމަދު ވެސް ބައިވެރިވެވަޑައިގެންނެވިއެވެ.
