އިސްލާމީ މަރުކަޒުގައި ކާޕެޓު އެޅުމުގެ މަސައްކަތް ރައީސް ބައްލަވާލައްވައިފި
21 މާރިޗު 2023 | އަންގާރަ 02:05އެމަނިކުފާނު ވަނީ ހޯމަ ދުވަހު އިސްލާމީ މަރުކަޒަށް ވަޑައިގެން ރޯދައިގެ ތައްޔާރީތައް ބައްލަވާލައްވައިފައި
ރައީސް އިސްލާމީ މަރުކަޒުގެ މަސައްކަތްތައް ބައްލަވައިލެއްވުން
އިސްލާމީ މަރުކަޒުގައި ރޯދައަށް ކާޕެޓު އެޅުމުގެ މަސައްކަތް ފަށާފައިވާއިރު އެ މަސައްކަތް ކުރިއަށްދާ ގޮތް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ބައްލަވާލައްވައިފިއެވެ.
އެމަނިކުފާނު ވަނީ ހޯމަ ދުވަހު އިސްލާމީ މަރުކަޒަށް ވަޑައިގެން ރޯދައިގެ ތައްޔާރީތައް ބައްލަވާލައްވައިފައެވެ. މި ޒިޔާރަތުގައި އެމަނިކުފާނާއެކު ސަރުކާރުގެ އިސް ބައެއް ބޭފުޅުންނާއި އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވެސް ބައިވެރިވެވަޑައިގެންނެވިއެވެ.
ރަމަޟާންމަހަށް ތައްޔާރުވުމުގެ ގޮތުން މަސްޖިދުއްސުލްޠާން މުޙައްމަދު ތަކުރުފާނުލް އަޢުޒަމް (އިސްލާމީ މަރުކަޒު)ގައި އައު ކާޕެޓު އެޅުމުގެ މަސައްކަތް އިސްލާމިކް މިނިސްޓްރީން ވަނީ ފަށައިފައެވެ. މިއީ ކޮވިޑަށްފަހު އިސްލާމީ މަރުކަޒުގައި ކާޕެޓު އަޅާ ފުރަތަމަ ފަހަރެވެ.
ކޮވިޑް-19 އާއި ގުޅިގެން އިސްލާމީ މަރުކަޒުގައި ކުރިން އަޅާފައިވާ ކާޕެޓު ނަގައި، ނެވިލޯން އެޅިއެވެ. އޭގެ ފަހުން ކާޕެޓު ބަދަލުކުރުމުގެ މަސައްކަތް ކޮށްފައިނުވަނީ އޭރުގެ ހާލަތަށް ރިއާޔަތްކޮށް ކަމާބެހޭ ފަރާތްތަކުން އެގޮތަށް އިރުޝާދު ދީފައިވާތީ ކަމަށް އިސްލާމިކް މިނިސްޓްރީން ބުނެއެވެ.
2 އަހަރަށްފަހު މިހާރު އައު ކާޕެޓު އަޅަން ފަށާފައިވާއިރު، މިސްކިތް ސާފުކުރުމުގެ މަސައްކަތްތަކާއި، މިސްކިތުގައި ކުރަންޖެހޭ އެހެނިހެން މަސައްކަތްތައް ވެސް ދަނީ ކުރަމުންނެވެ.
