2022 ވަނަ އަހަރުގެ އޮގަސްޓް މަހުގެ 18 ވަނަ ދުވަހު, މާލޭގެ އޯކިޑުމަގުގައި ހުންނަ މީޑިއާނެޓްގެ އޮފީހަށް ވަދެ މާރާމާރީ ހިންގި މައްސަލާގައި ހެކި ރައްކާތެރިކޮށްދިނުމަށް ދައުލަތުން އެދިއްޖެއެވެ.

މި މައްސަލައާ ގުޅިގެން ދައުވާކޮށްފައިވާ ފަރާތްތަކަކީ މ. ރޯޝަނީމަންޒިލް، އަހުމަދު އަޝްވާނާއި ސ. ހިތަދޫ ބީޗްކްއީން، ޝާމިހް މުހައްމަދު ނައީމްގެ އިތުރުން ގދ. ރަތަފަންދޫ ވީސަންމާގެ މުހައްމަދު ޝިމްހާޒްގެ މައްޗަށެވެ. އެ ތިން މީހުންގެ މައްޗަށް އުފުލާފައި ވަނީ މީހަކަށް ނުރައްކާތެރި ހާނިއްކައެއްވާގޮތަށް ތޫނު އެއްޗެއް ބޭނުންކޮށްގެން މާރާމާރީ ހިންގުމުގެ ދައުވާއެވެ.

މި މައްސަލަ ކްރިމިނަލް ކޯޓުގައި ބައްލަަވަނީ ގާޒީ އަލީ އާދަމްއެވެ. ހޯމަ ދުވަހު ބޭއްވި މައްސަލައިގެ އަޑު އެހުމުގައި މައްސަލައިގެ ލިޔުންތައް ލިބިފައިވޭތޯ ޝަރީއަތުން ސުވާލުކުރުމުން، ދިފާއުން ވަނީ މި މައްސަލައާ ގުޅުން ހުރި ބައެއް ލިޔެކިޔުންތައް ނުލިބޭކަން ފާހަގަކުރައްވާފައެވެ. އަދި އެކަން ފާހަގަކޮށް ކްރިމިނަލް ކޯޓުގެ މެއިލަށް، އަޑުއެހުން ފެށުމުގެ 10 ވަރަކަށް މިނިޓް ކުރިން މެއިލެއް ފޮނުވާފައިވާ ކަަމަށް ދިފާއީ ވަކީލް ވިދާޅުވިއެވެ. މައްސަލަ ބައްލަވާ ގާޒީ ވަނީ އެ ވަގުތު މެއިލް ފޮނުވައިގެން ޝަރީއަތަށް އެ މެއިލް ނުލިބޭނެކަން ފާހަގަކުރައްވާފައެވެ. އެހެނީ ހޯމަ ދުވަހުގެ އެ އަޑު އެހުން އޮތީ 10:15ގައި ކަމަށް ވުމާއެކު އިދާރީގޮތުން ފުރިހަމަ ކުރަންޖެހޭ ކަންކަން ފުރިހަމަ ކުރުމަށްފަހު ޝަރީއަތަށް އެ ލިޔުން ފޯރުކޮށްދިނުމަށް އެކަށީގެންވާ ވަގުތު ލިބިފައި ނުވުމެވެ.

ދިފާއުގެ އެ ވާހަކަތަކާ ގުޅިގެން ދައުލަތުން ވިދާޅުވީ، މި މައްސަލައާ ގުޅުންހުރި ހެކި ރައްކާތެރިކޮށްދިނުމުގެ އަމުރަކަށް ދައުލަތުން އެދިފައިވާކަމަށެވެ. އެހެންކަމުން ދިފާއަށް ނުލިބޭ ލިޔުންތަކުގެ ތެރޭގައި އެ ލިޔުންތައް ހިމެނޭތޯ ބެއްލެވުމަށް ދައުލަތުން އެދިފައިވެއެވެ. ދިފާއުން ވިދާޅުވީ ރައްކާތެރިކުރުމަށް އެދުނު ހެކީގެގޮތުގައި ފާހަގަކުރި ލިޔުންތައް ހިމެނޭ ފޯލިއޯ ނަމްބަރުތައް ނޫން އެހެން ނަމްބަރުތަކުގެ ދަށުން ހުށަހަޅާފައިވާ ބައެއް ލިޔުންތައްވެސް ނުލިބި ވާކަަމަށެވެ.

އެހެންކަމުން މައްސަލަ ބައްލަވާ ގާޒީ ވިދާޅުވެފައިވަނީ މައްސަލަ ކުރިއަށް ގެންދެވޭނީ މައްސަލައާ ގުޅުންހުރި ލިޔުންތައް ދެ ފަރާތަށް ލިބިގެން ކަަމަށެވެ. ދެން އޮންނަ އަޑުއެހުމުގައި އޮންނާނީ ހެކި ރައްކާތެރިކުރުމުގެ އަމުރަށް ވާހަކަދެއްކުމާއި، އެ މަރުހަލާ ނިމިއްޖެކަމުގައި ވާނަމަ ދައުވާ އިއްވުމާއި، ދައުވާއާ ގުޅިގެން ވާހަކަދެއްކުން ކަމަށެވެ.

2022 ވަނަ އަހަރު މީޑިއާނެޓް އޮފީހަށް ވަދެ ހިންގި އެ މާރާމާރީ ހިންގާފައިވަނީ މޫނު ނިވާކޮށްގެން ތިބެއެވެ. އެމާރާމާރީގައި އެތަނުގައި މަސައްކަތްކުރާ މުވައްޒަފަކަށް ވަނީ ހަމަލާ ދީފައެވެ. އަދި އެ މާރާމާރީގައި އޭނާގެ ބޮލަށް ވަނީ އަނިޔާ ލިބިފައެވެ.

ފުލުހުން ވަނީ މި މައްސަލައާ ގުޅިގެން ހައްޔަރުކުރި މ. ރޯޝަނީމަންޒިލް އަހުމަދު އަޝްވާން ހައްޔަރުކުރިއިރު، ސިފަ ބަދަލުކުރުމަށް މަސައްކަތްކޮށްފައި ވާކަމަށް ވެސް ބުނެފައެވެ. އެހެންނަމަވެސް އަޝްވާން ބުނެފައިވަނީ، ފުލުހުންގެ އޭނާގެ މައްޗަށްކުރާ ތުހުމަތަށް އިންކާރުކުރާ ކަމަށާއި އޭނާއަކީ ވަޒީފާ އަދާކުރަމުންދާ މީހެއް ކަމަށާއި އަދި ސިފަ ބަދަލުކުރުމަށް މަސައްކަތްކޮށްފައި ނުވާނެކަމަށެވެ.