ޕީއާރްއައި ކޮންފަރެންސުން، ދާޚިލީ ސަލާމަތާއި ރައްކާތެރިކަން ކަށަވަރުކުރުމުގެ މަސައްކަތަށް ކުރިއެރުން ލިބޭނެ: މިނިސްޓަރު އިމްރާން
ފުލުހުންގެ މަސައްކަތް އިތުރަށް ހަރުދަނާކުރެވިގެންދާނެ
ޕޮލިސް ރިސަރޗް އެންޑް އިނޮވޭޝަން ކޮންފަރެންސްގައި ހޯމް މިނިސްޓަރު އިމްރާން އަބްދުﷲ ވާހަކަފުޅުދައްކަވަނީ
ޕޮލިސް ރިސަރޗް އެންޑް އިނޮވޭޝަން ކޮންފަރެންސް (ޕީއާރްއައި)އިން, ދިވެހިރާއްޖޭގެ ދާޚިލީ ސަލާމަތާއި ރައްޔިތުންގެ ރައްކާތެރިކަން ކަށަވަރުކުރުމަށް ރައީސް އިބްރާހިމް މުހައްމަދު ސާލިހުގެ ސަރުކާރުން ފަށާފައިވާ ގިނަ މަސައްކަތްތަކަށް އިތުރު ކުރިއެރުންތައް ލިބޭނެކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
މި ކޮންފަރެންސް ފެށުމަށް ހޮނިހިރު ދުވަހު ބޭއްވި ޚާއްޞަ ރަސްމިއްޔާތުގައި މިނިސްޓަރު އިމްރާން ވިިދާޅުވީ، ދިވެހި ފުލުހުންގެ ޚިދުމަތް ނުވަތަ ޕޮލިސް ރިފޯމް ކުރުމުގެ މަސައްކަތަކީ ރައީސް ސާލިހުގެ ވައުދުފުޅެއް ކަމަށެވެ. ދިވެހި ފުލުހުންނަށް ރައްޔިތުންގެ ފުރިހަމަ އިތުބާރާއި އިހުތިރާމާއި ލޯބި ހޯދުމަށް ކުރަންޖެހިފައިވާ މަސައްކަތަކީ ނިޒާމީ ގޮތެއްގައި ވަރަށް ތަރުތީބު ކުރެވިގެން ކުރަންޖެހިފައިވާ، ދަތި، ގޮންޖެހުން ބޮޑު، އުނދަގޫ މަސައްކަތެއް ކަމަށް މިނިސްޓަރު އިމްރާން ވިދާޅުވިއެވެ.
މިއީ މިފަދަ ގޮތަކަށް ބޭއްވޭ ފުރަތަމަ ކޮންފަރެންސްކަން ފާހަގަކުރައްވައި މިނިސްޓަރު އިމްރާން ވިދާޅުވީ، ފުރަތަމަ ފަހަރަށް ފުލުހުންގެ ޚިދުމަތް ބައްޓަން ކުރަންވީ ގޮތް، އާއްމު ރައްޔިތުން އެކުވެ ދިރާސާތަކުގެ ހޯދުންތަކާއެކު ހުށަހަޅައިދިނުމަކީ ރާއްޖޭގައި ކުރެވޭ އައު ތަޖުރިބާއެއް ކަމަށެވެ. މިނިސްޓަރު އިމްރާން ވިދާޅުވީ، މި ކޮންފަރެންސްގެ ސަބަބުން ފުލުހުންގެ މަސައްކަތް އިތުރަށް ހަރުދަނާކުރެވިގެންދާނެ ކަމަށާއި، ފުލުހުންގެ ޚިދުމަތުގެ ތެރެއިން ރަނގަޅު ކުރަންޖެހޭ ގިނަ މަސައްކަތްތައް ފާހަގަވެގެންދާނެ ކަމަށެވެ. އަދި ކޮންފަރެންސްގައި ހުށަހެޅޭ ރިސަރޗްތަކަކީ، ރަނގަޅުކުރުމަށް މަގު ދައްކައިދޭނެ ކަރުދާސްތަކަކަށް ވާނެކަމަށް މިނިސްޓަރު އިމްރާން ވިދާޅުވިއެވެ.
މިނިސްޓަރު ވިދާޅުވީ މި ކޮންފަރެންސް ބޭއްވުމަށް މީގެ އަހަރެއްހާ ދުވަސްކުރިން ޕޮލިސް ބޯޑުގެ އިސްނެގުމާއެކު، ހޯމް މިނިސްޓްރީން ގުޅިގެން ގިނަ މަޝްވަރާތަކެއް ކުރެވިފައިވާ ކަމަށެވެ. މިމަސައްކަތް ކުރުމުގައި ގިނަ މުއައްސަސާތަކާއި ދިރާސާކުރާ ގާބިލް ފަރާތްތަކުގެ އެހީތެރިކަން ވަރަށް ބޮޑަށް ލިބިގެންދިޔަކަން މިނިސްޓަރު އިމްރާން ފާހަގަކުރެއްވިއެވެ.
މި ކޮންފަރެންސް ތިން ދުވަހަށް ދެމިގެންދާނެއެވެ.
