ރަނގަޅު އޮފިސަރުން ބައްޓަންކުރުމަށް ދައުލަތުން އިސްކަންދޭން ޖެހޭ: މިނިސްޓަރު އިމްރާން
ފުލުހުންގެ މުއައްސަސާ ހަރުދަނާކުރުމަށް ކުރެވޭ މަސައްކަތުގައި ރައްޔިތުންގެ އެއްބާރުލުން ބޭނުންވޭ
ޕޮލިސް ރިސަރޗް އިނޮވޭޝަން ކޮންފަރެންސްގައި ހޯމް މިނިސްޓަރު އިމްރާން އަބްދުﷲ ވާހަކަފުޅުދައްކަވަނީ
ފުލުހުންގެ އިސް ސަފު ތަރުތީބުކޮށް، ރަނގަޅު އޮފިސަރުން ބައްޓަންކުރުމަކީ ދައުލަތުން އިސްކަން ދޭން ޖެހިފައިވާ މަސައްކަތެއް ކަމަށް, ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.
ހޮނިހިރު ދުވަހު ފެށި ޕޮލިސް ރިސަރޗް އިނޮވޭޝަން ކޮންފަރެންސްގައި ވާހަކަފުޅުދައްކަވަމުން މިނިސްޓަރު އިމްރާން ވިދާޅުވީ، ރާއްޖޭގައި މުއައްސަސާތައް ހަރުދަނާ ކުރުމަށް ފަށާފައިވާ މަސައްކަތުގެ ތެރެއިން، ފުލުހުންގެ މުއައްސަސާ ހަރުދަނާ ކުރުމަށް ކުރެވޭ މަސައްކަތް ކުރިއަށް ގެންދެވޭނީ އިލްމީ ހަމަތަކާއި ދިރާސާތަކުގެ މަތިން ކޮންފަރެންސްތަކާއި ވޯކްޝޮޕްތައް ބާއްވައިގެން ކަމަށެވެ. އަދި އެ މަސައްކަތުގައި ޔުނިވަރސިޓީތަކާއި ކޮލެޖްތަކުގެ ފުރިހަމަ އެއްބާރުލުން ބޭނުންވާކަން މިނިސްޓަރު ފާހަގަކުރެއްވިއެވެ.
ފުރިހަމަ ފުލުހުންގެ މުއައްސަސާއެއް ގާއިމްކުރުމަކީ އެދޭ އެންމެ ބޮޑު އެދުންކަން ފާހަގަކުރައްވައި މިނިސްޓަރު އިމްރާން ވިދާޅުވީ، މި މަސައްކަތް ކުރުމަށް އާއްމު ރައްޔިތުންގެ އެހީތެރިކަމާއި އެއްބާރުލުން ބޭނުންވާ ކަމަށެވެ. ނަމަވެސް އެމަގަށް ދިއުމުގައި ހުރި ދަތިތަކާއި ގޮންޖެހުންތަކުގެ ބޮޑުކަން ރައްޔިތުންނާއި ދިރާސާކުރާ ފަރާތްތައް އެނގެންޖެހޭ ކަމަށާއި، އެކުގައި ތިބެގެން މަޝްވަރާ ކުރެވެންޖެހޭކަމަށް މިނިސްޓަރު އިމްރާން ވިދާޅުވިއެވެ.
ދިމާވާ ދަތިތަކަށް އިޝާރާތް ކުރައްވައި މިނިސްޓަރު އިމްރާން ވިދާޅުވީ ފުލުހުންގެ މުއައްސަސާގެ ވެރިން އެއްގޮތެއްގައި ހިފެހެއްޓެވުމުގައި ވޭތުވެދިޔަ 10 ނުވަތަ 15 އަހަރުގެ ތެރޭގައި ވަރަށް ބޮޑެތި ދަތިތަކާ ކުރިމަތިލާން ޖެހުނު ކަމަށެވެ. މިކަންކަމުން އަރައިގަނެ، ފުލުހުންގެ އިސް ސަފު ތަރުތީބުކޮށް ރަނގަޅު އޮފިސަރުން ބައްޓަންކުރުމަކީ އެންމެ ބޮޑު އިސްކަމެއް ދީގެން ދައުލަތުން ކުރަންޖެހޭ މަސައްކަތް ކަމަށް އެމަނިކުފާނު ވިދާޅުވިއެވެ.
މީގެ އިތުރުން މިނިސްޓަރު އިމްރާން ވިދާޅުވީ ފުލުހުންގެ މުއައްސަސާއަށް ބޭނުންވާ ޒަމާނީ ވަސީލަތްތައް ހޯދައިދިނުމާއި، އެކަމަށް މަގުފަހިވާނެ ގޮތްތައް ފަހިކޮށްދިނުމަކީ ސަރުކާރުތަކުގެ އެންމެ ބޮޑު އެއް ޒިންމާކަމަށެވެ.
މިނިސްޓަރު ވިދާޅުވީ ތިން ދުވަހަށް ކުރިއަށް ގެންދާ ޕޮލިސް ރީސަރޗް އިނޮވޭޝަން ކޮންފަރެންސް ނިމިގެންދާއިރު، ފުލުހުންގެ ޚިދުމަތް ފުޅާކޮށް ރަނގަޅުކުރުމަށް ރައީސް އިބްރާހީމް މުހައްމަދު ސާލިހުގެ ސަރުކާރުން ކޮށްފައިވާ މުހިންމު މަސައްކަތްތައް ހާމަވާނެކަމަށެވެ. އަދި ހޮނިހިރު ދުވަހު ސެޝަންގައި 10 ރީސަރޗް ޕޭޕަރު ހުށަހެޅިގެންދާނެކަމަށް މިނިސްޓަރު އިމްރާން ވިދާޅުވިއެވެ.
