ހޯމް މިނިސްޓަރ އިމްރާން އަބްދުﷲ ދޯހާއަށް ކުރައްވަމުންގެންދަވާ ދަތުރުފުޅުގައި ގަތަރުގެ އިންޓީރިއަރ މިނިސްޓަރ ހަމަދު ބިން ޚަލީފާ އާލް ސާނީއާ ބައްދަލުކުރައްވައިފިއެވެ.
ހޯމް މިނިސްޓްރީން ބުނީ މިދަތުރުފުޅުގައި މިނިސްޓަރ އިމްރާން ގަތަރުގެ އިންޓީރިއަރ މިނިސްޓަރ އަރިހަށް އިހުތިރާމްގެ ޒިޔާރަތެއް ކުރައްވާފައިވާކަމަށެވެ. މި ބައްދަލުކުރެއްވުމުގައި ދެ ބޭފުޅުން ވަނީ، ސެކިއުރިޓީއާ ގުޅޭ ކަންކަމުގައި އެހީތެރިވެ އެ ދާއިރާ ތަރައްގީކުރުމަށް ދެ ގައުމު ގުޅިގެން ކުރިއަށްގެންދެވިދާނެ ކަންކަމާ ގުޅޭގޮތުން މަޝްވަރާކުރައްވާފައެވެ.
އަދި މިނޫންވެސް ދެ ގައުމުގެ މަސްލަހަތު ހިމެނޭ ދާއިރާތަކުން ވަނީ މަޝްވަރާކުރައްވާފައެވެ.
މިނިސްޓަރު އިމްރާން ގަތަރަށް ކުރައްވަމުން ގެންދަވާ މި ދަތުރުފުޅަކީ، މިމަހުގެ 13އިން 15ގެ ނިޔަލަށް އެ ގައުމުގައި ބޭއްވި "ގްލޯބަލް ސެކިއުރިޓީ ފޯރަމް"ގައި ބައިވެރިވެވަޑައިގަތުމަށް ކުރެއްވާ ދަތުރުފުޅެކެވެ.
