"ހިލޭ ބޭސްފަރުވާއާއި، އުމުރުން ދުވަސްވީ މީހުންނަށްދޭ އެލަވަންސް ދީގެން ނުވާނެ"

ހިލޭ ބޭސްފަރުވާ ދޭން ނުޖެހޭ ކަމަށާއި، އުމުރުން ދުވަސްވީ މީހުންނަށްދޭ އެލަވަންސް ދީގެން ނުވާނެ ކަމަށް ހޯމް މިނިސްޓްރީގެ ޑެޕިއުޓީ މިނިސްޓަރ އަމާނީ މުޙައްމަދު ވިދާޅުވާ އޯޑިއޯ އެއް ލީކްވެއްޖެ އެވެ.

ހިލޭ ބޭސްފަރުވާގެ އެހީ ދިނުމާއި އުމުރުން ދުވަސްވީ މީހުންނަށް ރައީސް މުޙައްމަދު ނަޝީދުގެ ސަރުކާރުން ދޭން ފެއްޓި އެލަވަންސް ދިނުމާއި ދެކޮޅަށް ވާހަކަ ދައްކަމުން އަމާނީ ވިދާޅުވި ކަމަށްބުނާ އޯޑިއޯގައިވަނީ، މައިން ބަފައިންގެ ޒިންމާ އަދާކުރަންޖެހޭނީ އެމީހަކު އަމިއްލައަށް ކަމަށާއި، މައިންބަފައިން ނުބަލާ މީހުންނަށް އަދަބު ދިނުމަށް ގޮވާލާ ކަމަށެވެ.

"ދާއިމީކޮށް އަޅުގަނޑުމެންވީ ދައުލަތުގައި އެދިގެން ބޭސްފަރުވާކުރަން. އަދި ދާއިމީކޮށް އަޅުގަނޑުމެން ނަގަންވީ އެއްކަލަ ފަސްހާސް ރުފިޔާ. ރައީސް ނަޝީދު އެއޮތީ އެ ޤާނޫނަކަށް ހަދާފައި"

ހޯމް މިނިސްޓްރީގެ ޑެޕިޔުޓީ މިނިސްޓަރ އަމާނީ މުޙައްމަދު

ސަރުކާރަކުން އުމުރުން ދުވަސްވީ މީހުންނަށް ފަސްހާސް ރުފިޔާދޭން ނުޖެހޭ ކަމަށް ތަކުރާރުކޮށް ވިދާޅުވަމުން މިއޯޑިއޯގައި އަމާނީ ވިދާޅުވެފައިވަނީ، މި އެލަވަންސް ނުދީ ހުއްޓާލައިފި ނަމަ މަތީ ތަޢުލީމް ހާސިލް ކުރަންބޭނުންވާ ކުދިންނަށް ސްޓޫޑަންޓް ލޯނު ފަސޭހައިން ދެވޭނެ ކަމަށެވެ.

ރައީސް ނަޝީދު ތަޢާރަފްކުރި އުމުރުން ދުވަސްވީ މީހުންނަށްދޭ ފަސްހާސް ރުފިޔާގެ މިސިޔާސަތަށް ފާޑު ވިދާޅުވަމުން އަމާނީ ވިދާޅުވެފައިވަނީ މިއީ ރައީސް ނަޝީދު މިގައުމު ހަލާކުކޮށްލަން ކުރި ކަމެއް ކަމެއް ކަމަށާއި ރަނގަޅަށް މިކަން ކުރި ނަމަ މުޖުތަމައު ހޭލުންތެރިކުރަން މަސައްކަތްކުރާނެ ކަމަށެވެ.

އަމާނީގެ މިވާހަކަތަކާއި ގުޅިގެން ސޯޝަލް މީޑިއާގައި އޭނާއަށް ވަރަށް ބޮޑަށް ދަނީ ފާޑު ކިޔަމުންނެ އެވެ.